الحلقة السابعة
فى احدى عيادات النساء والتوليد ....
(. رواء و وداد راحوا لـ دكتور النساء والتوليد عشان يطمنوا على رواء وعلى الجنين .)
الدكتور : انتِ عملتى سونار 3D فى الوقت المناسب
وداد : حضرتك اول ما قولتلنا نعمله عملناه
الدكتور : اهو انا طلبته فى الوقت المناسب بس المشكله ان مفيش عندى فى العيادة سونار 3D
رواء : المهم الجنين بخير ؟
الدكتور : متقلقيش هو فى مشكله بسيطه جداً
رواء و وداد بقلق : مشكلة ايه خير !!
الدكتور : الجنين مصاب بـ تشوه اسمه الفتق الحجابى
رواء و وداد بقلق : تشوه !!
الدكتور : الفتق الحجابى ده بيضع الكبد الى القفص الصدرى وبيكون دافعاً على الرئتين فـ يعيق نموهم وتطورهم بشكل طبيعي
رواء : طيب وده فى خطوره عليه !!
الدكتور : الخطورة عليه بمجرد ما يتولد
وداد : يعني يا دكتور هنسيب الجنين فى بطنها
الدكتور : لا طبعاً احنا هنعمل لـ الجنين جراحة
رواء مخضوضة : جراحة !!
الدكتور : ايوة بس وهو لسه فى رحمك
وداد باستغراب : ازاى يا دكتور !!
الدكتور : يعني الجراح هـ يفتح جزء من الرحم كأنها بتولد قيصري ويخرج برضه جانب من الجنين ، الجانب اللى هيتعمل فيه العملية ويخلص العملية ويرجع الجنين مكانه ويقفل الرحم ويكمل فترة نموه عادى جداً ويتولد انسان طبيعي
وداد : طيب الجراحه دى مفهاش خطورة على رواء
رواء : وكمان الجنين في اى خطوره عليه
الدكتور : انتوا قلقانين كده ليه !! الجراحة دى بقت منتشره جداً واجنه كتير بنعالج تشوهاتهم وهما فى رحم امهاتهم ومفيش اى خطورة على الاتنين
رواء : طيب مينفعش تتعمل بالمنظار
الدكتور : للاسف لا ، فى تشوهات معينه ممكن تتعمل بـ منظار لكن الفتق الحجابى لا ، لازم تدخل جراحى
وداد : واى جراح يقدر يعمل العمليه دى
الدكتور : احنا عشان ظروف رواء الصحيه هنسق مع طبيب القلب تبعها وهنتفق على جراح كويس
رواء : يعني انا المفروض هعمل العملية امتى
الدكتور : عشر ايام بالكتير ، انتِ هتروحى لـ طبيب القلب هيعملك التحاليل والفحوصات المعتادة وهيطمن على القلب بعدها هيعملك تحويل للجراح وهتاخدى منه تقرير مفصل عن حالتك وحالة الجنين وازاى العملية هتم بس كده
وداد : اوك يا دكتور شكراً جداً
الدكتور : العفو
(. نزلت وداد ورواء من عند دكتور النساء والتوليد وراحوا لـ دكتور القلب وكتبلهم تقرير لـ الجراح وادالهم اسمه وعنوان المستشفى اللى بيشتغل فيها .)
*_____________________________________________**___________________________*
فى احدى الكافيهات ...
(. الياس نزل القاهرة لـ حبيبة عشان يشوفها .)
الياس : مالك يا حبيبة وشك مقلوب كده ليه (عامل حادثة ياخويا :D )
حبيبة : مخنوقه شوية
الياس : من ايه يا حبيبتي
حبيبة : بسبب سفر حسام اخويا احنا متعلقين ببعض اوى
الياس : ماهو لازم يسافر ويستقر ويشوف مستقبله
حبيبة : ربنا معاه
الياس : مالك يا حبيبة !! مش موضوع سفر اخوكى بس هو اللى مضايقك
حبيبة : مفيش حاجة
الياس : هتخبى على حبيبك
حبيبة : انا فعلاً نفسى اقولك بس مش عارفة اقولك ايه ولا اقولك ازاى
الياس : اتكلمي براحتك خالص
(. فضلت حبيبة رافضة الكلام والياس يقنع فيها فـ قررت تقوله وحكتله على حوار تعبها والعلاج والخ الخ .)
حبيبة : انا منتظمه على العلاج بس مش حاسة انى بتحسن بالعكس حاسة انى بتعب اكتر
الياس : انا مش فاهم انتِ ليه نكديه كده
حبيبة : انا نكدية !!
الياس : ايوة نكدية ، الدكتور قالك انك مش هتتحسنى قبل ست شهور من بداية العلاج لسه معداش ست شهور
حبيبة : ايه البرود اللى انت فيه ده
الياس : انا مش بارد بس مبسبقش الاحداث ، عيشي اللحظه واستمتعى بيها
حبيبة : يا سلام !!
الياس : مالك
حبيبة : يعني انت بتعيش اللحظه معايا لكن مبتفكرش فى بكرة ممكن يبقي عامل ازاى
الياس : فى ايه !! مالك عصبية كده ليه
حبيبة : ممكن اسألك سؤال
الياس : اتفضلى
حبيبة : لو فرضنا ان العلاج مجبش نتيجه واضطريت اشيل الرحم هتفضل معايا ولا هتسبنى
الياس : مقدرش اقول اه ومقدرش اقول لا
حبيبة بارتباك : يعني مش عارف اذا كنت هتكمل معايا تحت اى ظرف ولا لا
الياس : ايوة مش عارف لانى معشتش الموقف
حبيبة تبص الناحية التانيه بسبب خنقتها
الياس : على قكرة انا كان ممكن اقولك انى عمرى ما هسيبك وبحبك ومش مهم الخلفة طالما احنا مع بعض ، بس كنت هبقي بثبتك ، انتِ عيزانى اجاوب على حاجة لسه محصلتش وجايز متحصلش
حبيبة : بس على الاقل انت عارف عايزنى تحت اى ظرف ولا لا
الياس : انا فعلاً عايزك تحت اى ظرف بس ده احساسي حالياً معرفش كمان عشر سنين احساسي هيبقي ازاى جايز افضل زى مانا وجايز اتغير عشان كده مش عارف اجاوب فهمانى
حبيبة : ماشى
الياس : متزعليش وان شاء الله العلاج يجيب نتيجه ونتجوز ونخلف عيال كتير اوى وساعتها هتقولى يارتني ما خلفت
حبيبة : ياريت فعلاً نتجوز ونخلف
الياس : طيب وريني ضحكتك
حبيبة : ماليش نفس
الياس : لا هتضحكى عشان خاطرى
حبيبة : خاطرك غالى عندى بس ماليش نفس
الياس : طيب بحبك
حبيبة ابتسمت تلقائي
الياس : ايوة كده متكشريش تانى
حبيبة : انا كمان بحبك اوى
الياس : ربنا يخليكي ليا
(. ما كفاية ياد منك ليها :D .)
*_____________________________________________**___________________________*
فى جامعة جمال ....
(. جمال واقف مع بنت المفروض انه مرتبط بيه ، هايدي ١٨ سنة فى صيدلة خاص .)
هايدي : حسام خطب اهو وهو ٢٢ سنة
جمال : والمطلوب
هايدي : يعني اكيد انت هتبقي زى اخوك
جمال : هايدي انتِ عايزة ايه !! بقالك ساعه بتلفي وتدورى على ايه فهميني
هايدى : بصراحة يا جمال انا اللى عايزة افهم
جمال : عايزة تفهمى ايه ؟
هايدي : عايزة افهم انت بتحبنى ولا لا
جمال : يوووووه مش هنخلص من الاسطوانه دى
هايدي : لا مش هنخلص ، ازاى انت بتحبنى بس مبتهتمش بيا ، لا بتكلمنى ولا بشوفك الا بطلوع الروح
جمال : يا هايدي انا خايف عليكي من كلام الناس عشان كده مش بقابلك كتير
هايدي : واشمعنى مخلتنيش اجى خطوبة اخوك
جمال : مانا قولتلك انها كانت خطوبة عائليه
هايدي : ومش المفروض ان انا حبيبتك يعني واحدة من العيلة
جمال : يا سلام !! والمفروض اقدمك لـ اهلى على انك مين !! هايدي حبيبتي ولا صاحبتي
هايدي : وانت لو كنت سبتني اروح كانوا هيهتموا مين دى
جمال : يالهوووى ، مانا قولتلك انها عائليه ومكنش فيها اى حد غير العيلة اكيد وجودك كان هيلفت الانتباه
هايدي : طيب
جمال : انا هطير بقي دلوقتى عندى محاضرة سلام
(. مشى جمال وساب هايدي وراح قعد مع مجموعه شباب فى كافتريا الكلية .)
صديق ١ : ايه ده انت نفضت لـ هايدي بدرى كده ليه
صديق ٢ : فاكرينك هـ تكت معاها النهاردة
جمال : اكت مع مين يا عم دى بنت خنيقة
صديق ٣ : لما هى خنيقة نفسي اعرف مصاحبها ليه
جمال : هى اللى لزقة ، شبطت فيا ومش عارف اخلص منها
صديق ٢ : بس مُزة والله
جمال : يا عم مفيش اكتر من المُزز لكن لو بالخنقة دى يغوروا بـ تُقل دمهم
صديق ٣ : طيب انت ارتبطت بيها ليه ؟
جمال : اهو حد يسليني فى الجامعه
صديق ١ : انا بصراحة مش عارف احنا بنجى المكان ده ليه
جمال : اللى رماك على المر ، انا لو منجحتش السنة دى امى هتقول لابويا انى بعيد وانا مش ناقص
صديق ٢ : انا قررت اظبط واحدة معانا فى الدفعه بس دحيحه ومعايا فى اللجنه
صديق ١ : مش فاهم !!
صديق ٢ : يا عم كل ما تظبط البنت تظبطك هى
جمال : من الاخر هيثبتها عشان تغششه فى اللجنه
صديق ٣ : لا صايع
جمال : بقولكم ايه ، ما تجى ندخل نشوف بيعملوا ايه جوه
كلهم : ماشى يالا
صديق ٢ : روحوا انتوا وقولولى عملتوا ايه
جمال : قشطة
*_____________________________________________**___________________________*
فى الامارات ....
(. حسام رجع من شغله وفتح اللاب ، وبعدين فتح الفيس وبدأ يعمل بحث على الفيس بوك بـ اسم ازابيلا جورج الترك ، شوية يكتبه عربي وشوية انجليزى ، مرة يكتب ازابيلا الترك ومرة ازابيلا جورج ومرة الاسم كامل ، عمل بحث عن الاسم والجنسية والديانه والسن وظهرله كذا نتيجه ، بدأ يقلب فى البروفايلز موصلش لحاجة مؤكده بس عمل حفظ لاى صورة شخصية كان شاكك انها امه ، بعد ما خلص كلم روان على النت شوية وبعدها ابوه رجع من الشغل .)
حسام : حمد الله على السلامه يا بابا
عبد الله : الله يسلمك ، اتغديت
حسام : لا مستني حضرتك
عبد الله : طيب فى اكل فى الفريزر طلعه حطه فى الميكروويف لحد ما اغير
حسام : معلش يا بابا عايز اسألك حضرتك على حاجة قبل الغدا
عبد الله : خير يا حسام
حسام : لو شوفت شكل امى وهى فى السن ده تفتكرها
عبد الله : جايز افتكرها وجايز لا
حسام : طيب ممكن اوريك شوية صور وتقولى مين فيهم امى ولو مش متأكد مين هى ممكن تقولى مين اكتر صورة شاكك انها هى او انها اقرب لها فى الشكل
عبد الله : ماشى
(. عرض حسام الصور على ابوه اللى اكد ان مفيش ولا واحدة فيهم ازابيلا ومفيش اى واحدة تشبهها .)
عبد الله : استريحت كده
حسام : اكيد لا ، ممكن سؤال
عبد الله : هاااا
حسام : بعد ما امى سابتنا وكتبتلك ورقة فيها تنازل عننا مرجعتش تانى خالص
عبد الله : لا
حسام : ولا قالت انها ندمانه او حتى عايزة تشوفنا
عبد الله : محصلش
حسام : لو انا حكيتلك ان امك سابتك انت واخواتك عشان واحد تانى وعشان الحدت هتصدق ؟
عبد الله : طالما الكلام اتقال من شخص موثوق منه هصدق
حسام : هتصدق بسهوله !!
عبد الله : بص يا ابنى ، انا مش جايبك هما عشان تعملى قلق فى دماغى انا مش ناقص وفيا اللى مكفيني ، انا قولتهالك قبل كده وهقولها دلوقتى ولاخر مرة ، اعمل اللى انت عاوزه واللى انت مقتنع بيه بس ياريت بعد كده متندمش
حسام : مانت مش عايز تساعدنى
عبد الله بعصبية : انا مش مُجبر ومعنديش معلومات اكتر من كده ، اسمعنى يا حسام ، حط احتمال ولو ١٪ ان كلامى عن ازابيلا صحيح ، خليك فاكر ان بـ مجرد ظهورها حياتنا كلنا هتتلخبط ، ولو لقيتها وكلامى طلع غلط لك الحق تعمل اللى انت عاوزه بس لو طلع صح والحياة اللى بقالى عشرين سنة ببنيها ليكم اتهدت صدقني مش هرحمك ، لانى معنديش اى استعداد اهد البيت والعيلة والاستقرار تانى
(. ومشى عبد الله وسابه وقعد حسام يعقل فى كلام ابوه .)
*_____________________________________________**___________________________*
فى بيت رواء ...
(. وسيم جه اجازة ٣٥ يوم ، رواء مكنتش عارفه تقوله حوار العمليه ده ازاى فاتصلت بـ وداد عشان تقوله هى .)
وسيم : خير يا طنط
وداد : خير متقلقش ، دلوقتى عشان حمل رواء يكمل محتاجين نعمل عمليه بسيطه
وسيم بقلق : عملية !! مالها رواء
وداد : متقلقش رواء كويسة بس الجنين هو اللى تعبان
وسيم : تعبان !! وهو لسه جوه
وداد : ايوة احنا عملنا كذا سونار واشاعات واكتشفنا ان الجنين عنده تشوه لو اتولد بيه مش هيعيش لكن ممكن التشوه يتعالج وهو فى رحم امه ويكمل حمله عادى ويعيش طبيعي
وسيم : رواء عارفة الكلام ده
وداد : اه عارفة ومترددة تقولك عشان خايفة تقولها تنزل الجنين
وسيم : ماهو الموضوع مش سهل
وداد : العملية سهله ومفهاش اى خطوره عليها ولا على الجنين
وسيم : انا موافق بس بشرط
وداد : شرط ايه خير !!
وسيم : اقعد مع الدكتور اللى هيعمل العملية ويطمنى هو بنفسه
وداد : خلاص ماشى نروحله كلنا سوا
وسيم : معلش عايز عنوانه وهروحله انا لوحدى
وداد : حاضر هجبلك العنوان بس روحله بسرعه لاننا لازم نعمل العمليه فى اسرع وقت
وسيم : هاروحله دلوقتى ، هقوم اغير لحد ما حضرتك تكتبيلي العنوان
وداد : طيب ماشى
(. خد وسيم العنوان وراح لـ الدكتور وسأله اسئلة كتيرة والدكتور طمنه وقاله ان العملية هتتعمل بحرص شديد وحذر وعنايه اشد وهيكون موجود فريق طبي متكامل تحسباً لاى مفاجأة اثناء الجراحة ، ووسيم بذلك اطمن واتحدد معاد العمليه .)
*_____________________________________________**___________________________*
فى اوضة حبيبة ....
(. جمال وحبيبة قاعدين فى اوضة حبيبة .)
جمال : عرفتى ان حسام بيدور على الست اللى بيقول عليها امنا
حبيبة : بجد !! ولقاها
جمال : لسه ، بس بيقول ان تحت ايده ادله بتأكد ان القصة اللى ابوكى حكاها مش حقيقة
حبيبة : يعني بابا هيكدب
جمال : او جايز خبى جزء من الحقيقة
حبيبة : انت مقتنع !!
جمال : انا مقتنع ان سواء ابوكى قال الحقيقة ولا لا فـ لو هى فعلاً كانت عيزانا كانت هتعرف توصلنا
حبيبة : وافرض حسام لاقاها وظهرت فى حياتنا تانى هنعمل ايه
جمال : انا غير مُعترف بيها
حبيبة : ازاى دى مهما كان امك
(. هنا دخلت وداد تسأ حبيبة على حاجة ومش عارفة هما بيتكلموا فى ايه .)
جمال (بيقوم ويروح عند وداد) : انا معرفش امهات الا الست دى
وداد باستغراب : فى ايه !!
حبيبة : مفيش يا ماما اصل جمال بيقول ان حسام بيدور على امنا الحقيقية
وداد بابتسامه : الحقيقية !! والمفروض انى انا المُزيفة ؟!
حبيبة : لا يا ماما مقصدش بس قصدى اللى خلفتنا
وداد : ومين قالك ان الام هى اللى بتخلف !! اى نعم الحمل والولادة حاجة صعبه على حسب ما اسمع بس مش هما لوحدهم الامومه ، ربنا مخلاش الجنه تحت اقدام الام اللى خلفت وبس ومش اى ام تحت اقدامها الجنه ، انا ربيتكم كلكم زى بعض سواء انتوا او رواء وعمرى ما حسيت غير انكم ولادى
جمال : حبيبة متقصدش حاجة وحشة يا ماما
وداد : حبيبة لسه صغيره وفاكرة ان الواحدة طالما مخلفتش تبقي مش ام
حبيبة بخجل : انا بس مستغربه ان حضرتك بتحبينا الحب ده وانتِ عارفه اننا مش ولادك
وداد : فعلاً كنت عارفة انكم مش ولادى وان ليكم ام ممكن تظهر فى اى لحظة وتاخدكم منى بس اللى اتحرم من حاجة وربنا يبعتله اللى يعوضه بيحاول يتمسك بيه ويتقنه
جمال : والله يا ماما انا عمرى ما حبيت ولا هحب زيك ، انت احلى ام فى الدنيا ربنا يخليكي لينا
وداد : ويخليكيوا ليا يا حبايب قلبى ، انا جهزت العشا لينا بس خد يا جمال الصينيه اللى على السفره طلعها شقة رواء
جمال : حاضر يا ماما (وخرج)
وداد لـ حبيبة : انتِ بنتى ، انا اللى تعبت وربيت وسهرت الليالى ومكنتش عايزة اكتر من انكم تبقوا كويسين ، الامومه ملهاش علاقة بالانجاب ، فى انجاب بلا امومه وفى امومه بلا انجاب
حبيبة : انا اسفة يا ماما حقك عليا
وداد : متتأسفيش يا حبيبتى (وحضنتها)
*_____________________________________________**___________________________*
بعد اسبوع فى عيادة دكتور عبد الوهاب ...
حبيبة : ايه الاخبار يا عمو
عبد الوهاب : للاسف لسه مفيش تحسن
حبيبة : يعني انا هفضل كده
عبد الوهاب : اهدى ممكن
حبيبة : يا عمو حضرتك مش حاسس بيا
عبد الوهاب : يا بنتى انا اكتر واحد حاسس بيكي
حبيبة : ازاى حاسس بيا وانا .........
عبد الوهاب يقاطعها : بصى ، احنا هنزود جرعه العلاج ودى هتتعبك شوية بس مفهاش حاجة كله لمصلحتك
حبيبة : وان مجبتش نتيجه
عبد الوهاب : فى محاوله ان احنا نعمل جراحة نعيد فيها تثبيت الرحم
حبيبة : وان ...........
عبد الوهاب يقاطعها : بلاش نسبق الاحداث ممكن
حبيبة : حاضر
عبد الوهاب(بيديها روشته) : دى روشته الجرعات الجديدة اللى كتبها لك دكتور النساء
حبيبة : اوكى يا عمو هنزل اجيبهم
عبد الوهاب : ماشى يا حبيبة عمو وعدى عليا عشان اروحك فى طريقي
حبيبة : حاضر
*_____________________________________________**___________________________*
فى احدى المستشفيات ...
(. رواء كانت فى غرفه خاصة بيها قبل ما تتنقل لـ العمليات .)
رواء : وسيم ممكن اطلب منك طلب
وسيم : اؤومرى يا حبيبتى
رواء : صالح اهلك يا وسيم عشان خاطرى
وسيم : حاضر يا روءة اول ما تقومى بالسلامه هاخدك واروحلهم
رواء : ربنا يخليك ليا
وسيم : ويخليكي ليا
رواء (بتمسك ايده) : خليك جنبى انا خايفة اوى
وسيم : انا جنبك على طول ومتخافيش ربنا معانا
(. بعد شوية اتنقلت رواء لـ العمليات واتخدرت وبدأت العمليه بنفس الخطوات اللى شرحها الدكتور قبل كده بعد مده ليست بالقليلة خرج الفريق الطبي من العمليات .)
وداد و وسيم لـ الجراح : خير يا دكتور ايه الاخبار
الجراح : ....................
اشوفكم الحلقة الجاية
ارجو التقييم بـ كومنت
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
www.facebook.com/sh5abyt.bnoota
sh5abytalaa.blogspot.com
حلقه روعه
ردحذف