الحلقة الثامنة
(. بعد شوية اتنقلت رواء لـ العمليات واتخدرت وبدأت العمليه بنفس الخطوات اللى شرحها الدكتور قبل كده بعد مده ليست بالقليلة خرج الفريق الطبي من العمليات .)
وداد و وسيم لـ الجراح : خير يا دكتور ايه الاخبار
الجراح : خير يا جماعه انتوا قلقانين كده ليه ، الام والجنين فى احسن حال
وداد : يعني العملية نجحت ؟
وسيم بلهفة : رواء كويسة !!
الجراح : العملية نجحت والمدام كويسة جداً والجنين كمان متقلقوش
وسيم : الحمد لله ، احمدك يارب
الجراح : حمد الله على سلامتهم
وداد : الله يسلمك ، نقدر نشوفها
الجراح : بمجرد ما تتنقل اوضتها تقدروا تشوفوها ، عن اذنكم
وداد : الحمد لله ، حمد الله سلامتهم يا وسيم
وسيم : الله يسلمك يا طنط ، انا هروح اصلى ركعتين شكر لله
وداد : روح يا حبيبي ربنا يتقبل منك
*_____________________________________________**___________________________*
فى الامارات ....
(. حسام بيكلم روان على السكايب .)
روان : انا مش فاهمه ليه الخلاف ده مع باباك
حسام : مانا برضه مش فاهم انتِ شاغله نفسك ليه
روان : يعني ايه شاغله نفسي ليه !! هو مش المفروض ان حضرتك خطيبي وامرك يهمنى
حسام : فكك من الحوار ده يا روان ممكن ؟
روان : لا مش ممكن ، انت كده هتخسر باباك
حسام : بتشوفى حبيبة اختى ؟
روان : اه احياناً بنتقابل بين المحاضرات
حسام : وبتكلمي امى ؟
روان : ايوة ، حتى ماما عايزة تعزمهم
حسام : تمام
روان : مش هتقولى مالك برضه
حسام : انتِ بقيتي زنانه اوى كده ليه
روان : عايزة اطمن عليك
حسام : متخافيش يا رونه بغسل سناني ورجلى وبشرب اللبن قبل ما انام
روان : ايه الظُرف ده
حسام : بصى انا هكيلك مش عشان خايف على زعلك ولا عشان زهقت من زنك
روان : امال هتحكيلي ليه ؟
حسام : عشان لو حصل حاجة تبقي عارفة الدنيا ماشية ازاى
روان : خير يا حسام خضتنى احكى
حسام : حكى لـ روان قصة امه ازابيلا والقصة اللى ابوه حكاها وكذلك انه بيدور عليها
(. روان اتصدمت ومعرفتش ترد .)
حسام : مالك
روان : انا طول عمرى بسمع عن الحاجات دى بس بين الاجانب مش العرب
حسام : حاجات ايه !! الالحاد بقي موجود فى مصر كتير جداً وكمان حالياً فى مصر وفى اكتر من دوله عربيه بنات بتهرب من اهاليهم وستات بتهرب من اجوازهم
روان : بس مكنتش اتوقع ان الموضوع يبقي قريب اوى كده منى
حسام : يا ستى انا اصلاً مش مصدق القصة دى
روان : وباباك هيكذب ليه بقي ؟
حسام : عشان نكرها من قبل حتى ما نشوفها
روان : حسام يا حبيبي ، اللى عايز حد بيعرف ازاى يوصله وانت بتقول ان باباك فى الامارات من زمان ومغيرش سكنه نهائي
حسام : انتِ عايزة تقولى ايه ؟
روان : عايزة اقولك ان هى لو كانت عيزاكوا فعلاً كانت عرفت توصلكم وان باباك عنده حق حرام عليك تهد حياته
حسام : يا بنتى فى حاجة غلط فى القصة ، القصة دى ممكن تكون حصلت بس برضه ناقصها حاجات كتير
روان : وانت هتفضل تنخور لحد ما تهد كل حاجة
حسام : انا بحاول افهم ايه اللى حصل
روان : طيب خد بالك
حسام : حاضر
(. فضلوا يتكلموا شوية فى مواضيع مختلفه .)
*_____________________________________________**___________________________*
فى المستشفى فى اوضة رواء ....
(. رواء فاقت لقيت وسيم جنبها وماسك ايدها .)
وسيم : حمد الله على سلامتك يا حبيبتى
رواء(بتجاهد عشان تتكلم) : الله يسلمك يا حبيبي
وسيم : انا كنت هموت من القلق عليكي
رواء : بعد الشر عليك يا حبيبي
وسيم : رواء انا بحبك اوى ومقدرش اعيش من غيرك
رواء : وانا بحبك اكتر ربنا يخليك ليا
وسيم : اوعديني انك مش هتسبيني ابداً
رواء : هسيبك واروح فين يعني !! انا معاك لحد اخر لحظه فى عمرى
وسيم : وانا هفضل معاكى لحد ما اموت وحتى لو مُت مش هتمنى فى الاخرة غيرك
رواء : بس لو انا مُت قبلك لازم ..........
وسيم يقاطعها ويحط ايده على بوؤها : هٌـش اياكى تقولى كده ان شاء الله هـ تعيشي لحد ما يبقى عندك ١٠٠ سنة
رواء : يااااه وهتفضل تحبنى حتى بعد ما اعجز
وسيم : بحبك فى كل حالاتك يا احلى حاجة حصلتلى
رواء بتبتسم بالعافيه : ربنا يخليك ليا مش عارفة من غيرك كنت هكمل حياتى
وسيم : هتكملى حياتك بيا او من غيري
رواء : ربنا ما يحرمنى منك
(. وهنا خرج الجنين من بطن رواء وضربهم كل واحد كف وقالهم راعوا انى سينجل :D .)
*_____________________________________________**___________________________*
تانى يوم فى جامعه جمال ...
(. جمال بيدور على هايدي مش لاقيها وبيتصل على الموبايل مبتردش ، فسأل واحدة زميلتها عليها قالتله انها فى الكافتريا .)
جمال : مبترديش هلى موبايلك ليه ؟
هايدي : مسمعتوش
جمال : فى ايه بتكلميني كده ليه ؟
هايدي : مفيش حاجة ، انت كنت عايز حاجة ؟
جمال : ما تظبطي يا بت انتِ بتتكلمى كده ليه ؟
هايدي بعصبية : انا مش بت ومش معوجوه عشان اتظبط
جمال بحزم : طيب وطى صوتك ، فى ايه مالك ؟
هايدى : بص يا جمال ، انا مش حاسه انك بتحبنى وانت عمرك ما حاولت ولا فكرت تثبتلى ده بس خلاص بقي
جمال : خلاص بقي ايه ؟
هايدي : خلاص كفاية كده انا زهقت من عدم اهتمامك بيا ، ازاى ابقي مرتبطه ومن جوايا حاسه انى لوحدى
جمال : يعني انتِ عايزة ايه ؟
هايدى باستغراب : مش فاهم انا عايزة ايه ؟
جمال : لا
هايدى (بتلم حاجتها) : عيزاكى تسبنى فى حالى ممكن
جمال : اقعدى هنا وفهميني فى ايه ، ايه اللى غير حالك كده
هايدى : انا تعبت وفاض بيا ، انت فاكر انى مش عارفة انك كل يوم مع واحدة شكل
جمال : واحدة شكل !!
هايدى : انت بتحبنى يا جمال ؟
جمال : اكيد طبعا بحبك امال انا معاكى ليه ؟
هايدي : طالما بتحبنى يبقي تعملى اللى انا عيزاه
جمال : اللى هو ايه ؟!
هايدى : اولاً تهتم بيا ونخرج سوا
جمال : وثانياً !!
هايدى : تبطل تتكلم مع اى بنت غيري حتى لو زميلتك
جمال : اممم وثالثاً ؟
هايدى : تعرفيني على اختك وخطيبة اختك
جمال : ومش عايزة تتعرفى على امى ؟
هايدي : ياريت
جمال : هايدي !!
هايدي : نعم !!
جمال : اتكلى على الله يا ماما
هايدي : انا فعلاً غلطانه انى عرفت واحد حقير زيك
جمال : لا مانا حقير فعلاً انتِ لسه واخده بالك
هايدي : يارتنى ما عرفتك
جمال (وهو ماشى) : قول للزمان ارجع يا زمان
*_____________________________________________**___________________________*
فى احدى الكافيهات ...
(. حبيبة ومارى قاعدين مع بعض .)
مارى : على فكرة كلامه منطقى
حبيبة : يا سلام !!
مارى : ايوة انتِ ازاى عيزاه يحكم على حاجة لسه محصلتش وجايز متحصلش
حبيبة : كنت متوقعه انه يقولى انه مش هيسبنى تحت اى ظرف
مارى : لو قال كدن يبقي بيشتغلك
حبيبة : انا حاسة انه مبيحبنيش
مارى : بالعكس يا حبيبة الياس لو كان بيلعب بيكي كان ثبتك بـ كلمتين واظن التثبيت مفيش اسهل منه
حبيبة : وباجابته دى يبقي بيحبنى
مارى : لا يبقي واقعى وعقلانى هو مش عارف بعد كام سنة هيبقي عايز ايه ؟
حبيبة : انا خايفة اوى انى اشيل الرحم
مارى : مظنش ، ان شاء الله الدوا يجيب نتيجه ؟
حبيبة : يارب
مارى : اه صحيح لسه بتاخدى المروفين
حبيبة : لا خلاص بطلته الدكتور كاتبلى على مُسكن اخده ساعة اللزوم
مارى : يالا يا حبيبتى ربنا يكمل شفاكى على خير
حبيبة : يارب يا مارى لاحسن انا تعبت وفقدت الامل
مارى : لا خلي عندك امل ، احنا عايشين فى الدنيا عشان عندنا امل
حبيبة : ربنا يخليكي ليا يا مارى انتِ احسن صاحبه قابلتها بحبك زى رواء بنت عمى
مارى : اه صحيح اخبار رواء ايه وعملت العملية ولا لا
حبيبة : الحمد لله عملت العملية امبارح وهى كويسة هى والجنين
مارى : ربنا يشفيها
حبيبة : نفسى انا والياس نحب بعض زى وسيم ورواء
مارى : اشمعنى بقي
حبيبة : وسيم من الرجالة النادرة فى الزمن ده ، جدع كده وشهم واتحدى الدنيا كلها عشان يتجوزها وتقريباً خسر اهله
مارى : يااااه على كده بيحبها من زمان ؟
حبيبة : رواء اول حب بجد فى حياتها هو وسيم ، حبت واحد قبل كده وهى فى اولى جامعه بس لما عرف ظروفها الصحيه خلع
مارى : الاندال كتير
حبيبة : بس ربنا عوضها بـ وسيم ، انا كنت بقولها لو كان وسيم مش جوزك كنت حبيته
مارى : ههههههههه يا هبله
حبيبة : ههههههه ، ربنا يسعدهم يارب ويكمل لها حملها على خير
مارى : يارب
*_____________________________________________**___________________________*
فى جامعه الياس .....
سعيد : يعني انت بتحبها ولا لا
الياس : ساعات بحس انى بحبها اوى وساعات بحس انها عادية بالنسبة ليا
سعيد : هى فزوره يا ابنى ؟
الياس : حاسس انى ورطت نفسى فى علاقتى بيها
سعيد : يعني انت مبتحبهاش ؟؟
الياس : يا عم بحبها بس غير ما كنت متوقع قبل ارتباطنا
سعيد : يعنى هى ممله ؟
الياس : بالعكس لذيذه وحبوبه وطيوبه خالص وتتحب جداً
سعيد : امال بقي
الياس : فكك فكك تلاقيني بس متلخبط بسبب الامتحانات
سعيد : امتحانات ايه ياد انت متصعش عليا
الياس : بص قبل ما نرتبط حبيبة كانت بالنسبة ليا نجم عالى صعب المنال وكنت متعلق بيها جداً ونفسى كل شوية اسمع صوتها ودايماً شايفها حواليا
سعيد : تمام
الياس : الايام دى مبقتش حاسس نفس الاحاسيس ، حاسس انى زهقان
سعيد : يبقي لازم توحشك ، مش لازم كل شويه تتكلموا ومش لازم كل يومين تنطلها على القاهرة
الياس : يعني لسه بتحبها ؟
سعيد : انت بس مش متعود انك تبقي مع بنت واحدة ، متعود ان يبقي حواليك خمس ست بنات فـ مبتحسش بـ الزهق لكن عشان انت مبتتكلمش الا مع واحدة ومبشوفش الا واحدة فـ حسيت بالملل
الياس : جايز
سعيد : هفك انا دلوقتى
الياس : رايح فين ؟
سعيد : مظبط حتة بنت فى تجارة
الياس : يا ابنى اللى يسمعك بتتكلم يقول عليك عاقل ورزين واللى يشوف تصرفاتك يقول اهبل
سعيد : لا متعه للحياة بدون حبة هبل عن اذنك يا برنس (ومشي)
الياس لنفسه >> الله يخربيتك يا سعيد هتخلينى احن لـ ايام العكعكه تانى
*_____________________________________________**___________________________*
الفجر فى اوضة وداد ...
(. وداد بتكلم عبد الله فى الموبايل .)
عبد الله : متعيطيش بقي
وداد : زعلانه اوى ان الولاد شاكين فى حبي ليهم
عبد الله : متزعليش بكره يتجوزوا ويخلفوا ويعرفوا انتِ بتحبيهم قد ايه
وداد : ماهى المشكلة انهم رابطين الحب بـ الخلفه (بدموع) مش ذنبى ان ربنا حرمني من النعمه دى
عبد الله : والله انتِ مقيش ام زيك ولو امهم الحقيقية كانت موجوده مكنتش هتربيهم كده
وداد : وانت هتسيب حسام كده ؟
عبد الله : هو حر بقي انا نصحته وهو مش متقبل النصيحه خليه يتصدم بالواقع والحقيقة المرة اكتر
وداد : طيب خد بالك منه بالله عليك
عبد الله : متقلقيش
وداد : هروح اصحى حبيبة ماشى
عبد الله : ليه بدرى كده
وداد : قالتلى اصحيها الفجر عشان تذاكر
عبد الله : ماشى يا حبيبتى تصبحوا على خير
وداد : وانت بخير
(. قفلت وداد وراحت تصحى حبيبة .)
__**___**__**__
فى اوضة حبيبة ....
(. حبيبة كانت نايمه وطلبت من امها تصحيها الفجر عشان تذاكر شوية .)
وداد : حبيبة ، قومي يا حبيبتي يالا الساعه خمسه
حبيبة : سبيني كمان شوية
وداد : قومى يالا (وشالت البطانيه)
حبيبة : يوووووه يا ماما سبيني
وداد (بتطبق البطانيه) : ايه ده يا حبيبة ؟
حبيبة : فى ايه يا ماما ؟
وداد : انتِ مش شايفة يا بنت ولا ايه ؟
حبيبة : ....................
اشوفكم الحلقة الجاية
ارجو التقييم بـ كومنت
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
www.facebook.com/sh5abyt.bnoota
sh5abytalaa.blogspot.com
الحلقه تحفه بس قصيره
ردحذفوهنا خرج الجنين من بطن امه وضربهم قلمين وقال حسوا بيا انا سينجل وربنا انتي مشكله
ردحذفالحلقه تحفه ماشاءالله نزلى واحده تانى دلوقتى يلا
ردحذف