امومه بلا انجاب (العاشره)

الحلقة العاشرة

بعد اسبوع فى الامارات فى الامارات ...

(. حسام كان بره واتأخر جداً وابوه قلق عليه وفضل مستنيه .)

عبد الله : انت كنت فين كده قلقتنى عليك

حسام : كنت فى مشوار

عبد الله : وقافل الزفت الموبايل ليه ؟

حسام : فصل شحن

عبد الله : مالك يا حسام

حسام واقف وساكت

عبد الله : مالك يا ابنى رد عليا فى ايه

حسام : انت عملت ايه فى امى يا بابا ؟

عبد الله : يعني ايه عملت فيها ايه ؟

حسام بعصبيه : انت عارف كويس اوى انا قصدى ايه 

عبد الله بصوت عالى : انا قرفت منك ومن تصرفاتك فوق بقي انت ليه بتعمل فينا كده !! ليه عايز تهد حياتنا كلنا ؟؟

حسام : انت اللى هديتها زمان لما رميت امى

عبد الله : الكلام اللى هقوله ده كلام نهائي بدل ما فى يوم اخبطك خبطة اموتك ، بص تلاقى امك متلاقيهاش ، عايز تعيش معاها او مش عايز ، اتأكدت من كلامى او متأكدش كل ده انا مش عايز اعرفه متكلمنيش فيه ماشي يا حسام

حسام : بس انا عايز .............

عبد الله يقاطعه : ميخصنيش انت عايز ايه ، انا مش مقصر معاك فى حاجة اكل لبس تعليم شغل عيشة مرفهه وفوق ده كله جبتلك ام تانيه ، كونك بقي  قليل الاصل مش مُعترف بيها ، كونك مش مصدقنى كل ده ميخصنيش ماليش دعوه بيه ، اللى عليا عملتهولك (ومشي)

حسام : ازابيلا جورج الترك رفعت عليك قضيه لـ ضم حضانه ولادها ليها والمحكمه ضمت الحضانه ليك انت عشان هى غير اهليه لانها مُختله عقلياً 

(. وقف عبد الله مكانه وضهره لـ حسام واتلفتله تانى .)

حسام : يعني هى مش مشيت وسابتنا ولا الحدت ، يعني هى كانت عيزانا ، يعني انت راميتها فى الشارع عشان هى مُختله عقلياً

عبد الله : انت جبت الكلام ده منين ؟!

حسام : صح ولا غلط يا بابا !!

عبد الله (بيحاول ميتعصبش) : بص يا ابني انا مش هفضل اعيد وازيد فى نفس الكلام (بزعيق) الموضوع ده ميتفتحش معايا تانى فاهم ولا لا ، اكتشف الحقيقة بنفسك (ومشي وسابه)

حسام لنفسه >> يارب اوصلها ، يارب اعرف طريقها فين !!

*_____________________________________________**___________________________*

فى احدى الكافيهات ...

(. حبيبة ومارى قاعدين مع بعض .)

حبيبة : بقالنا ١٥ يوم على الحال ده

مارى : يعني انتِ متصلتيش عليه خالص ؟

حبيبة : مرة او اتنين لما بيكون هو اتصل وانا مشوفتش الموبايل

مارى : وهو عمل ايه ؟

حبيبة : كل فين وفين لما بيتصل ، حاسة بـ فتور رهيب

مارى : يبقي مفيش الا حل واحد 

حبيبة : حل ايه ؟

مارى : انك تسبيه 

حبيبة : اسيبه !!

مارى : ايوة هتتصلي عليه تقوليله انك سمعتى كلامه اهو وخفيتي من الاتصالات ومبتشوفوش بعض بس كنتى فاكره انك هتوحشيه وكلام من ده وبعدين قوليله انكوا لازم تسيبوا بعض لانك حاسه انك مش مرتبطه وحاسه انه مبقاش يحبك

حبيبة : وبعدين ؟

مارى : فى الاول هـ يرفض انكوا تسيبوا بعض بس لازم تلحى عليه وتزنى عشان تسيبوا بعض

حبيبة : واشوف بقي اذا كان هيتمسك بيا ولا لا صح ؟

مارى : هو هـ يحصل حاجة من تلاته 

حبيبة : ايه هما.؟

مارى : لاما هـ يتمسك بيكي ومش هيوافق تسيبوا بعض ويحاول يرضيكي لاما هـ يوافق تسيبوا بعض وبعد شوية هـ يعرف قيمتك ويرجعلك لاما ............ (وسكتت)

حبيبة : لاما ايه ؟

مارى : لاما هـ يسيبك خالص

حبيبة : لانه مبيحبنيش صح ؟

مارى : فى كل الاحوال انتِ المُستفيدة 

حبيبة : يعني لما يسيبنى هستفاد ايه بقي ؟

مارى : هـ تتأكدتى انه مش بيحبك وانك خساره فيه

 حبيبة : عندك حق

(. فضلوا يرغوا شوية وقطع كلامهم اتصال الياس بـ حبيبة .)

الياس : اذيك يا بيبة

حبيبة : اهلاً يا الياس

الياس : ايه يا بنتى هو لو انا متصلتش متتصليش

حبيبة : معلش مشغوله فى المذاكرة ماهو مش عشان نحب نسقط

الياس : حبيبة انتِ زعلانه منى فى حاجة

حبيبة : الياس احنا لازم نسيب بعض

الياس : نسيب بعض !! ليه انا زعلتك فى حاجة

حبيبة : بلاش نكدب على بعض ، انت مبتحبنيش

الياس : ايه اللى انتِ بتقوليه ده !! 

حبيبة : بقول الحقيقة

الياس : وجبتى الحقيقة دى منين ؟

حبيبة : من تصرفاتك ، شوف انت بتعمل ايه !!

الياس : قصدك ايه ؟

حبيبة : انت فاهم قصدى كويس اوى

الياس : والله العظيم انا بحبك وعمرى ما حبيت غيرك

حبيبة : ماليش دعوة بالكلام لان تصرفاتك بتقول غير كده

الياس : احنا مينفعش نسيب بعض ، انا مصدقت ارتبطنا 

حبيبة : مش ده اذا كنا مرتبطين اصلاً 

الياس : حبيبة انا بحبك وانتِ بتحبيني يبقي نسيب بعض ليه ؟

حبيبة : عشان مش حاسة انك بتحبنى

الياس : طيب اديني فرصه اخيره

حبيبة : سلام يا الياس

(. وقفلت السكه فى وشه وقفلت الموبايل .)

مارى : تمام كده دلوقتى هو لاما هيحاول يثبتلك انه بيحبك لاما هيتلكك ويقول انك قفلتى فى وشه السكه وميكلمكيش تانى

حبيبة : حاسة انى اتسرعت فى الارتباط بـ الياس

مارى : بلاش نسبق الاحداث وتندمى بسرعه كده ، خلينا نشوف ايه هـ يحصل

حبيبة : ربنا يستر

*_____________________________________________**___________________________*

فى احدى الكافيهات فى الزقازيق ...

(. الياس راح لـ سعيد بيته لقاه مش موجود وعرف انه فى الكافيه اللى متعودين يقعدوا فيه ، الياس اول ما دخل وشاف سعيد مسك فى خناقه .)

سعيد : فى ايه ياد انت

الياس : مكنتش اعرف انك عيل كده

سعيد : ايه يا ابنى حصل ايه ؟

الياس : انت قولت لـ حبيبة ايه عنى ؟

سعيد : حبيبة مين ؟

الياس : متستعبطش يا سعيد انت عارف حبيبة مين

سعيد : ايوة عارف بس انا اعرفها منين عشان اقولها حاجة ؟

(. الياس هدى شوية وحكى لـ سعيد حكايه مكالمه حبيبة وانه شاكك ان سعيد كلمها وقالها حاجة .)

سعيد : ده انت واد واطى والله انا اعمل فيك كده

الياس : امال قصدها ايه بقي ؟

سعيد : هو لازم يعنى يكون قصدها على البت الوقيع اللى انت عرفتها 

الياس : امال ممكن يكون ايه ؟

سعيد : ممكن يكون تقصد بـ التصرفات دى انك متغير ومش مهتم بيها وكلام من ده

الياس : طيب انا اعمل ايه هى عايزة دلوقتى تسيبني

سعيد : وانت عايز تسيبها ؟

الياس : لا طبعاً انا ما صدقت لقيتها

سعيد : بس انت قولت انت زهقت منها

الياس : بس اول ما حسيت انها هتروح منى كل حاجة اتغيرت 

سعيد : يبقي تقولها الكلام ده ، لازم تحسسها بـ حبك لها واهتمامك بيها

الياس : يومين كده واكلمها

سعيد : لا فى ساعتها كده

الياس : طيب هطير انا دلوقتى ، هروح واكلمها 

___***___***___***__

(. خرج الياس بره الكافيه واتصل بـ حبيبة كتير وفى الاخر ردت .)

الياس : انا اسف انا بحبك اوى

حبيبة : بس انا مش حاسة انك بتحبنى

الياس : اديني فرصه بس اثبتلك فيها انى فعلاً بحبك وعايزك

حبيبة : ماشى يا الياس لما نشوف

الياس : بحبك اوى

حبيبة : وانا كمان

الياس : بتاخدى دواكى

حبيبة : اه

الياس : خدى بالك على نفسك 

حبيبة : حاضر

الياس : فاضيه اخر الاسبوع

حبيبة : ليه ؟

الياس : هـ اجى اشوفك عشان وحشتيني

حبيبة : وحشتك بجد ؟

الياس : انا اسف يا حبيبه مش هزعلك تانى ومش هـ اهملك تانى 

حبيبة : ماشى

الياس : بـ تحبيني ؟

حبيبة : وانا ايه يخليني ارجعلك الا اذا كنت بحبك

الياس : وانا بموت فيكي

(. اتفقوا انهم يرجعوا زى بعض والياس وعدها انه هيثبتلها حبه بالافعال .)

*_____________________________________________**___________________________*

تانى يوم فى الامارات ...

حسام : بابا كنت عايز حضرتك فى موضوع 

عبد الله : خير 

حسام : انا خلاص مش هدور على الست اللى اسمها ازابيلا دى تانى

عبد الله : دى حاجة متخصنيش ، عايز تدور انت حر مش عايز برضه انت حر

حسام : بابا انا هعمل كده عشان ارضى حضرتك 

عبد الله : وانا مش غضبان عليك

حسام : بس انا بعد ما فكرت اكتشفت ان حضرتك واخواتى عندكوا حق ، هى لو كانت عيزانا كانت عرفت توصلنا

عبد الله : ماشى يا حسام بس برضه لازم تبقي مقتنع وزى ما قولت قبل كده لو عايز تدور عليها انا مش همنعك

حسام : لا خلاص يا بابا انا مقتنع جداً

عبد الله : واشمعنى فجأة كده ؟

حسام : خايف ادور اكتر من كده اكتشف حاجات توجعني وتصدمنى اكتر

عبد الله : اممممم مهما دورت مش هتكتشف ابشع من اللى انا قولته ، المهم عامل ايه فى شغلك ؟

حسام : تمام يا بابا الحمد لله

عبد الله : مبسوط مع روان ؟

حسام : هى طيبه وبتحبنى

عبد الله : وكمان بنت ناس ، ربنا يحفظها ويسعدكوا 

حسام : يارب

عبد الله : عايز تتجوز امتى ؟

حسام : مش عارف بس تقريباً كمان سنه

عبد الله : ماشى يا حبيبي ربنا يجمعكم على خير

حسام : انا نازل شوية بقي

عبد الله : خد بالك على نفسك (ونزل)

*_____________________________________________**___________________________*

فى جامعه جمال ...

(. جمال كان راكن عربيته فى مكان مستخبى قبل الجامعه وكان معاه واحده ومقضيها ، لقي حد بيخبطله على ازاز العربية ، بـ يبص لقاها هايدي ، نزل وراها .)

جمال : استنى يا هايدي

هايدي بدموع : كنت متوقعه انك بتعمل كده مع اى واحده بتعرفها بس قولت يمكن ظلماك ولما شوفت بـ عيني طلعت ظلماك فعلاً لانك اقذر مما توقعت

جمال : صدقيني بحبك

(. هنا نزلت البنت اللى كانت معاه .)

رانا : حبك بورص ، ده انت فعلاً انسان واطى وقذر

جمال : امشى يا رانا مش عايز اشوفك تانى

رانا : انا اللى مش عايزة اشوفك يلعن ابو معرفتك القذره (ومشيت)

جمال لـ هايدي : انا اسف

هايدي بدموع وحرقه : طالما مكنتش بتحبني مكنتش تلوثني معاك كنت سبنى بـ برائتى وهبلي زى مانا ، كنت سيبني نضيفة

جمال : والله انتِ انضف بنت قابلتها

هايدي : كنت ، كنت انضف بنت دلوقتى بقيت زيي زى اى واحده مش كويسه ، عارف انا بقيت ايه !! بقيت .........

جمال يقاطعها : متقوليش على نفسك كده (انت جميل :D ) صدقيني انتِ من البنات الكويسين النادرين

هايدي : بتضحك عليا ولا بتضحك على نفسك ، انا يمكن غلطت بس لولا وجودك فى حياتى كان استحاله اعمل كده

جمال : انا واطى وقذر وانا السبب بس اديني فرصه اثبتلك انى كويس

هايدي : معدش ينفع نكمل مع بعض ، لا انت هتثق فيا ولا انا هثق فيك ، لا انت هـ تحترمنى ولا هـ احترمك (ومشيت وسابته)

جمال بصوت عالى : هايدي يا هايدي عشان خاطرى اخر فرصه

هايدي لنفسها وهى بتعيط >> انا بلومه ليه !! انا فعلاً اللى مش كويسه انا اللى غلطت هو مالوش دخل وعمره ما كان السبب يارتني ما كنت عملت كده ، يارتني ما كنت رخصت نفسى

جمال لنفسه >>> هو احنا فعلاً ينفع نكمل !! هتثق فيا بعد اللى هى شافته بعينها ولا انا هثق فيها بعد اللى عملته فيا بس انا ليه حاسس انى مش قادر ابعد عنها !! ليه حاسس انى محتاجلها !! يارب ما اكون بحبها 

*_____________________________________________**___________________________*

فى خلال شهرين ....

- الكل امتحن الترم التانى ماعدا حبيبة ومارى فاضل لهم مواد

- حبيبة مستمرة على العلاج وبتتحسن

- رواء فى الشهر التاسع ومستنيه الولادة

- هايدي اختفت تماماً خصوصاً بعد الامتحانات وجمال مش عارف يوصلها

- حسام و روان فى حالة استقرار عاطفى وكذلك الياس وحبيبة

*_____________________________________________**___________________________*

فى عيادة دكتور عبد الوهاب ....

عبد الوهاب : نتيجه التحاليل ظهرت

حبيبة : وايه الاخبار

عبد الوهاب : فى تحسن الحمد لله

حبيبة : بجد يا عمو

عبد الوهاب : بجد يا حبيبة عمو

حبيبة : فين النتيجه عايز اشوفها بنفسى

عبد الوهاب : للاسف مروحتش المستشفي النهاردة بس كلمت المعمل وقالولى النتيجه فى التليفون

حبيبة : انا مبسوطه اوى يا عمو

عبد الوهاب : طيب بما ان الجرعه الزيادة جابت نتيجه يبقي هنزود كمان عشان النتيجه تبقي اقوى

حبيبة : ماشي ماشى مفيش مشكله طالما بتحسن

عبد الوهاب : هـ تستمرى عليها فترة اطول ست اسابيع

حبيبة : اوكى يا عمو

عبد الوهاب : خدى الروشته اهيه ودى ادويه هتكفيكي الشهر ونص

حبيبة : عمو انا بحبك اوى

عبد الوهاب : وانتِ بنتى يبقي اكيد بحبك جداً 

حبيبة : ربنا يخليك ليا يا عمو

عبد الوهاب : اخبار رواء ايه ؟

حبيبة : فى الشهر التاسع اهيه مستنيه الولاده

عبد الوهاب : ربنا يكملها على خير

حبيبة : همشي بقي يا عمو عشان عندى كورس

عبد الوهاب : ربنا معاكى وشدى حيلك عشان تجى تشيلي المستشفى معايا

حبيبة : ان شاء الله (ومشيت)

*_____________________________________________**___________________________*

بالليل فى بيت وسيم و رواء ....

(. وسيم من يوم ما رواء دخلت فى الشهر فى التاسع وهو خد اجازة عشان لما تولد يكون جنبها ، رواء جالها مغص خفيف بالليل قلقها وصحيت وقامت دخلت الحمام ، وسيم صحى ملقهاش جنبه اتخض عليها وقام يشوفها فين .)

وسيم(بيخبط عليها) : روءه انت هنا يا حبيبي

رواء (بتخرج من الحمام) : انت ايه صحاك كده

وسيم : مالقتكيش جبنى فـ قلقت ، انتِ كويسة ؟

رواء : اه يا حبيبي متقلقش

وسيم : برضه مش عارفه تنامى

رواء : انا من يوم ما دخلت فى التاسع وانا نومى مقلق كده

وسيم : طيب تعالى استريحي

(. وخدها وسيم ودخلها اوضه نومها ومددت على السرير .)

وسيم (بيحطلها مخدات) : ارفعى رجلك يا حبيبتى على المخدات دى

رواء : تسلملي يا حبيبي

وسيم : انت ِ متأكده انك كويسة ؟

رواء : بطل قلق بقي ، انا بس عندى شوية مغص

وسيم : طيب اعملك حاجة تاكليها او تشربيها

رواء : لا يا حبيبي تعالى بس اقعد معايا

وسيم : يعني فعلاً مش عايزة حاجة اعملهالك ؟

رواء : ممكن اطلب منك طلب

وسيم : اوؤمريني

رواء : احضنى 

(. خد وسيم رواء فى حضنه وفضلت رواء حضناه كتير وبعدين فضلت تعيط .)

وسيم : الله الله مالك يا روحى

رواء : انا خايفة اوى من الولادة

وسيم : احنا مش اتفقنا ان مينفعش نخاف وربنا جنبنا ،  ها ردى عليا اتفقنا ولا مش اتفقنا 

رواء : اتفقنا

وسيم : طيب خلاص خايفة ليه بقي ؟

رواء : مش عارفة !! خايفة البيبي يحصله حاجة وخايفة انا يحصلي حاجة

وسيم : مش هيحصل الا كل خير ، انا واثق اوى فى ربنا اصله بيحبنا اوى يا روءه

رواء :  ونعم بالله ، انا بحبك اوى

وسيم : وانا بموت فيكي ، ايه ده انتِ قايمه رايحه فين كده ؟

رواء : هروح الحمام

وسيم : طيب استنى اسندك

(. وقام يسندها وفجأة وقفت رواء مكانها .)

وسيم : فى ايه ؟

رواء : تقريباً المياة بتاعة البيبي نزلت

وسيم : يعني هتولدى !!

رواء : الدكتور قال لو حصل حاجة زى كده لازم اروحله

وسيم : طيب تعالى اساعدك تلبسي والبس انا كمان ونروح المستشفي

رواء : ماشى بس كلم ماما

وسيم : حاضر حاضر هكلمها

(. غيروا هدومهم واتصلوا بـ وداد ورواحوا المستشفى .)

___***___***___***____

فــى الـمـسـتـشـفـى ...

(. دخلت رواء اوضة العمليات والطبيب قرر انها تولد قيصري عشان قلبها مش هيستحمل الطلق وعشان جرح العملية اللى عملتها قبل كده ، عدى وقت طويل على غير المعتاد ، و وسيم و وداد وحبيبة وجمال كلهم واقفين بره وكلهم قلقانين عليها لانهم عارفين ظروفها الصحيه ، فجأة لقيوا ممرضة بتطلع جرى من اوضة العمليات ، كلهم اتخضوا وقلقوا جداً .)

وسيم بقلق : فى ايه !! بتجرى كده ليه !! مالها رواء ؟

الممرضة : ..........................

اشوفكم الحلقة الجاية

ارجو التقييم بـ كومنت

*_____________________________________________**___________________________*

بـ قلمى / آلاء الشريفى

(. لو حد عايز ينقل القصة يراسلنى على رسايل صفحة الفيس بوك .)

www.facebook.com/sh5abyt.bnoota

sh5abytalaa.blogspot.com