امومه بلا انجاب (الثانية عشر)

الحلقة الثانية عشر

وداد : مالك يا حبيبة انتِ كويسة

حبيبة : مش عارفة 

وداد : مالك حاسة بـ ايه

حبيبة :  حاسة انى ........... (وسكتت)

وداد : حبيبة حبيبة ردى عليا يا جمال الحقنا يا ابنى

(. هنا جه جمال من بره .)

جمال : فى ايه يا ماما .. ايه ده حبيبة !!

(. لقي جمال حبيبة شبه فاقدة الوعى ، شالها ونزل بيها على العربية و وداد وراه .)

وداد : وديها على مستشفى عمك

جمال : حاضر بس عمو دلوقتى مش موجود فى المستشفى

وداد : انا هكلمه وهخليه يجيلنا هناك

(. اتصلت وداد بـ عبد الوهاب .)

عبد الوهاب : خير يا وداد الولاد كويسين ؟

وداد بدموع : حبيبة يا عبد الوهاب 

عبد الوهاب بقلق : مالها حبيبة ؟

وداد : عندها نزيف وتقريباً فاقدة الوعى

عبد الوهاب : متقلقيش انا هـ اجى دلوقتى

وداد : احنا رايحين بيها على المستشفى

عبد الوهاب : خلاص ماشى وانا هـ احصلكم على هناك

(. قفل عبد الوهاب مع وداد واتصل بـ دكتور النسا اللى متابع حالة حبيبة وطلب منه يجيله المستشفى بتاعته .)

*_____________________________________________**___________________________*

فى مـستشفى دكتور عبد الوهاب ...

(. وصلت حبيبة لـ المستشفى وهى فى حالة اعياء شديدة من شدة النزيف ، دكتور النساء اللى متابع معاها فحصها ودكتور عبد الوهاب كان معاه .)

عادل(دكتور النسا) : لازم تعمل العملية حالاً

عبد الوهاب : هو ايه اللى حصل ؟

عادل : الرحم حصول هبوط اكتر ودخلت منطقة الحوض ، البنت كانت قربت تفقد عذريتها

عبد الوهاب : يعني انتِ دلوقتى هترجع الرحم مكانه ولا ايه ؟

عادل : انا هـ احاول اعمل تثبيت لـ الرحم بس كده كده الاربطه ضعيفه جداً بس هنحاول

عبد الوهاب : فى امل ان العملية تنجح ؟

عادل : هو مفيش امل نعمل العملية لو فضلنا نتكلم كتير ، يُستحسن نأجل النقاش لـ بعد العملية

عبد الوهاب : تمام انا هخليهم يجهزوا اوضة العمليات حالياً

(. خرج عبد الوهاب وطلب منهم يجهزوا اوضة العمليات والمعدات واطباء النساء والتوليد اللى موجودين فى المستشفى عشان يكونوا مساعدين لـ دكتور عادل .)

وداد : خير يا عبد الوهاب ، حبيبة مالها ؟

عبد الوهاب : حبيبة هتعمل عملية ؟

وداد بقلق : يالهوى عملية ايه !!

عبد الوهاب : عملية تثبيت لـ الرحم ، الرحم نزل فى الحوض خالص 

وداد : بس حبيبة بتاخد العلاج بـ انتظام وقالتلى انها بـ تتحسن

عبد الوهاب : هى للاسف مكنتش بـ تتحسن انا كنت مضطر اقولها كده عشان تتفائل ونفسيتها متتدمرش عشان تحسن نفسيتها عامل قوى فى تحسن صحتها

وداد : يعني ايه يا عبد الوهاب !! البنت مكنتش بـ تتحسن !!

(. جمال واقف مش فاهم اى حاجة خالص .)

جمال : ولو انى مش فاهم حاجة بس الكلام واضح يا ماما عمو كان بيقول لـ حبيبة انها بتتحسن لكنها مكنتش بـ تتحسن

وداد بدموع محبوسة : هـ تشيلولها الرحم يا عبد الوهاب

جمال باستغراب : يشيلوا الرحم !!

عبد الوهاب : لا طبعاً يا وداد احنا هنثبته

وداد : انت مش بتقول ان الاربطه ضعيفه ودى خلقة ربنا

عبد الوهاب : بس الطب تطور ولو معرفناش نعلاجها هنا هـ نسفرها بره والله لو وصلت اسفرها اخر الدنيا ما هتأخر عليها

وداد : هى العملية ابتدت ؟

عبد الوهاب : اهاا اقعدوا انتوا فى الكافتريا او فى الاستراحة بتاعتى لحد ما العملية تخلص وانا هلبس وادخل العمليات معاهم عشان ابقي مطمن اكتر

وداد : لا انا هفضل جنبها لحد ما تخلص وتقوم

عبد الوهاب (وهو ماشى) : جمال خد امك من هنا

جمال : يالا يا ماما وعمو معاها جوه اهو

وداد بدموع : مش هقدر امشى من هنا مش هبقي مطمنه

جمال : يا ستى بقولك معاها عمو وحتى لو عمو مش جوه ، معاها ربنا احسن من الكل

وداد : ونعمَ بالله يا ابني ونعمَ بالله

(. خد جمال وداد الاستراحة وجمال سألها ايه اللى عند حبيبة وهى حكيتله وجمال توتره زاد عن الاول .)

__**__**__**__

بعد مـرور ساعة ونص ....

(. خرجت حبيبة من العمليات واتنقلت اوضة خاصة بيها وعبد الوهاب راح الاستراحة لـ وداد يطمنها .)

وداد : العملية خلصت ؟

عبد الوهاب : اه خلصت ونجحت كمان 

وداد : يعني هى كويسة ؟

عبد الوهاب : الحمد لله ، الرحم اتثبت مكانه 

وداد : اوعى يا عبد الوهاب تكون بتقولى كده عشان تطمنى

عبد الوهاب : لا والله هى بقت كويسة بس مقدرش اضمنلك ان الرحم مش هيتحرك تانى

وداد : يعني ممكن يتحرك

عبد الوهاب : وممكن لا وكله هيبان مع الوقت بس الاهم انها كويسة

وداد : عايزة اشوفها

عبد الوهاب : ماشى بس تفوق الاول وبعدين تشوفوها

(. فاقت حبيبة من التخدير ودخلت وداد وجمال اطمنوا  عليها وباتوا معاها فى المستشفى ، و وداد حكت لـ عبد الله كل ظروف حبيبة الصحية .)

*_____________________________________________**___________________________*

تانى يوم الصبح فى بيت الياس(المنصورة) ...

(. الياس بـ يتصل على حبيبة طول الليل محدش بيرد وفى الاخر الموبايل اتقفل لانه فصل شحن لكن الياس فاكر انها قفلته .)

الياس لنفسه >> يا ترى يا حبيبة مالك !! ايه خلاكى تاخدى موقف كده منى !! طيب انا الفترة اللى فاتت دى معملتش حاجة تضايقها ، ممكن تكون مبقتش تحبنى او حد قالها عنى !! مصيبه لتكون تعبانه ولا حاجة !! طيب هى لو تعبانه موبايلها يدي جرس وبعدين يتقفل .. يارب استر

(. دخلت احلام ام الياس على الياس وقطعت حبل افكاره .)

احلام : الياس ، واد يا الياس 

الياس : واد يا الياس !! هى حصلت يا حجة

احلام : مانا بقالى ساعه بكلمك وانت ولا هنا

الياس : فى حاجة ولا ايه

احلام : مالك يا باش مهندس ، سرحان فى ايه ؟

الياس : لا انا مش سرحان ولا حاجة

احلام : يا واد على امك برضه ، بـ تحب ولا ايه

الياس : والله يا ام الياس احب اصارحك واقول ان ابنك للاسف بيحب

احلام : طيب ما دى حاجة كويسة ، اول ما تتخرج نخطبهالك واهى شقتك موجوده وان شاء الله تشتغل على طول

الياس : ربنا يسهل يا ماما اصلها مش كبيره اوى

احلام : عارفة ، عندها ١٨ سنة 

الياس : عرفتى منين ؟؟

احلام : يا واد ده انت وهى مفضوحين فى العيلة

الياس باستغراب : مفضوحين !! وفى العيلة !! انتِ قصدك على مين ؟

احلام : احلام بنت خالتك

الياس : يا نهار مش فايت !! احلام العيلة

احلام : عيلة ايه دى عندها ١٨ سنة 

الياس : بس عشان متربية قدامى وكبرت قدامى بشوفها لسه احلام الصغيره الكتكوته اللى بنبعتها تجيبلنا طلبات من السوبر ماركت

احلام : امال انت بقي بسلامتك بتحب مين ؟

الياس : بنوته من القاهرة 

احلام : ودى معاك فى هندسة ؟

الياس : لا دى فى طب ، عندها ١٩ سنة ورايحه تالته

احلام : ما شاء الله ، ودى بقي عرفتها ازاى ؟

الياس : هاه !! الصدفة خير من الف ميعاد يا حجة 

احلام : بس يا ابنى دى لسه مشوارها طويل واحنا عايزين نجوزك بقي ونفرح بيك ده انت البكرى واخواتك البنات صغيرين

الياس : متقلقيش ان شاء الله كلها تلت او اربع سنين واتجوز

احلام :  تلت اربع سنين !! ده ابوك عايزك تتخرج وفى نفس السنه تكون خاطب وبعدها على طول تتجوز

الياس : انتوا متسربعين على ايه كده ؟ تلت سنين مش كتير ومش ازمه

احلام : ماشى حتى لو اتجوزتها كمان تلت سنين كده كده هى هتكون لسه بتدرس ويا ابنى بتوع الطب دول بيفضلوا عمرهم كله يدرسوا لكن احنا عايزين نجوزك واحدة فاضيه ومورهاش حاجة غيرك

الياس : ومين قالك يا ماما انى عايز اتجوز واحده فاضيه ، انا عايز اتجوز واحدة ليها شخصيتها ، يعني سواء عايزه تشتغل او عايزة تقعد فى البيت يبقي بارادتها

احلام : بس دى عمرها ما هتقعد فى البيت ودى غصب عنها مش بمزاجها

الياس : ربنا يسهل بلاش نسبق الاحداث

احلام : ربنا ييسرلك الامور ويصلحلك الاحوال يا ابنى

الياس : يارب يا ماما

*_____________________________________________**___________________________*

فى بيت رواء ...

(. وسيم صحى من النوم لقي رواء شايله فرحة ومش على بعضها .)

وسيم : خير يا روءه ، مالك !! فرحة كويسة ؟

رواء : متقلقش يا حبيبي فرحة بخير

وسيم : امال مالك ؟

رواء : بتصل على ماما مبتردش لا على الموبايل ولا الارضى وحبيبة موبايلها مقفول ، قلقت عليهم اوى

وسيم : طيب ما تتصلى على جمال 

رواء : جمال !!

وسيم : ايوة اكيد هيبقي عارف هما فين ، صاحيين ولا نايمين موجودين ولا خرجوا كده يعني

رواء : انا قصدى ان جمال دايماً فى دنيا تانيه غير اللى احنا فيها

وسيم : بس لو لا قدر الله حصلهم حاجة وحشة اكيد هيبقي عارف   

رواء : اه عندك حق

وسيم : اتصلي عليه ولو مردش هطلع انا اضرب عليهم الجرس

رواء : تمام

(. واتصلت رواء على جمال .)

رواء : صباح الخير اذيك يا جمال

جمال : الحمد لله يا روءة انتِ عامله ايه وفرحه ووسيم عاملين ايه

رواء : كلنا كويسين ، ماما وحبيبة فين بتصل عليهم مبيرودوش

جمال (وعمل hold) : ثوانى كده يا رواء خليكي معايا

رواء : معاك

جمال لـ وداد >> ماما هى رواء عارفه اللى عند حبيبة

حبيبة : اه يا جيمي عارفه كل حاجة

جمال : اصلها بتسأل عليكوا

وداد : طمنها على اختك زمنها قلقانه 

جمال لـ رواء >> ايوة يا روءة

رواء : فى ايه يا جمال

جمال : حبيبة تعبت امبارح بالليل وجبناها على مستشفى عمو عبد الوهاب

رواء : تعبت !! حصلها ايه وهى عامله ايه دلوقتى

جمال : متقلقيش يا روءة زى القرد اهيه

رواء : طيب يا جمال ممكن تجى تاخدنى عشان اجى اشوفها

جمال : تجى فين يا بنتى انتِ هبله

وداد لـ جمال >> هات اكلمها

جمال لـ رواء >> خدى ماما عايزة تكلمك

وداد : ايوة يا روءة يا حبيبتي ، حبيبة بقت كويسة وكلها يومين وتجى البيت

رواء : انا لازم اشوفها واطمن عليها بنفسي

وداد : بطلي هبلة انتِ بنتك لسه حتة لحمه وانتِ والدة قيصري كني في بيتك وانا كده كده جايه على الضهر عشان اعملك  غدا

رواء : ماشى يا ماما

وداد : وسيم ماشى امتى

رواء :  اخر النهار ان شاء الله

وداد : يوصل بالسلامه ان شاء الله (وقفلوا)

__**__**__

وسيم : ها اطمنتي ؟

رواء : حبيبة تعبت وودوها المستشفى

وسيم : طيب وايه الاخبار ؟

رواء : بيقولوا بقت احسن

وسيم : طيب الحمد لله ، متقلقيش كده وقومى نامي شوية قبل ما فرحة تصحى

رواء : يارب يجيب العواقب سليمه ان شاء الله

وسيم : ان شاء الله خير متقلقيش

*_____________________________________________**___________________________*

فى الامارات ...

(. حسام كان بيكلم روان على السكايب،حسام عمال يحكي على حكاية امه الحقيقية وحواره الاخير مع ابوه وروان ساكته .)

حسام : حاسس ان لو ضغطت شوية كمان بابا هيقولى اسرار اكتر

روان ساكته

حسام : مالك يا روان في ايه ؟

روان : مالى ازاى ؟

حسام : عمال اتكلم وانتِ ساكته

روان : بصراحة انا تعبت وقرفت من السيرة دى 

حسام : قرفتى !!

روان : من يوم ما سافرت الامارات وانت مفيش على لسانك الا سيرة امك الحقيقية والطريقة اللى انت عايز توقع ابوك بيها فى الكلام ارحمنى بقي يا حسام حرام عليك

حسام : الله !! هو فى ايه !! هو ده جزائي انى بحكيلك

روان : بس بحكاويك دى بكتشف فيك جزء جديد من شخصيتك اول مرة اخد بالى منه

حسام : اللى هو ايه بقي !!

روان : شخص جاحد وناكر للجميل بتدور على ست ممكن تكون بتشوفها كل يوم بس لا هى هتعرفك ولا انت هتعرفها وناسي الست اللى ضيعت من عمرها ٢٢ سنه عشان تربيك وانت لا من لحمها ولا دمها

حسام : انا منكرتش فضلها ولا حبها ومعزتها قلوا فى قلبى ، وفعلاً انا مبحسهاش الا امى

روان : يا سلام !! امال ليه قولت لـ ابوك ان وداد مش امى

حسام : الشخص ميخرجش اللى جواه اللى اذا اتنرفز وانا كنت بنرفزه

روان : طيب لما انت مش حاسس بـ ام الا طنط وداد ليه بتدور على الست دى

حسام : يا روان يا حبيبتي انا مبدورش عليها بـ عينها انا بدور على الحقيقة

روان : وهتستفاد ايه بقي ؟

حسام : مش هستفاد حاجة بس هيبقي اسمى عرفت الحقيقة

روان : بص يا حسام مش دايماً اللى ورا الكواليس بيبقي حلو ، ومتنساش ان اخواتك مش واقفين معاك يعني لو الست دى ظهرت وفعلاً زى ما ابوك قال هتبوظ حياتكم اخواتك مش هيسامحوك لانهم مكنوش عايزينها

حسام : صدقيني يا رونه انا اكتشفت حوار شهادات الميلاد البطاقة ده بالصدفة ، كذلك حوار القضيه وبرضه حوار انها مُختله عقليه ، انا مدورتش كل دى حاجات بتقع تحت ايدي بالصدفة

روان : بالصدفة !!

حسام : صدقيني بالصدفة

روان : انهى صدفة دى اللى تخليك تكتشف كل ده ؟

حسام : هقولك عليها فى الوقت المناسب ، سيبك من الحوار ده دلوقتى ، اختى حبيبة 

روان : مالها ؟

حسام : تعبت شوية ونقلوها المستشفى ابقي اتصلى اطمنى عليها

روان : الف سلامه عليها ، عندها ايه ؟

حسام : معرفش ومتبقيش تسأليها اكتر من مرة ولو مقالتلكيش متزعليش

روان : حاجة خطيرة يعني

حسام : لا بس حاجة بناتيتي وممكن تتكسف تقولك

روان : ربنا يشفيها يارب ويقومها بالسلامه

حسام : الله يسلمك يا حبيبتى 

(. وفضلوا يتكلموا شوية مع بعض وبعدين قفلوا .)

*_____________________________________________**___________________________*

بعد مرور اسبوعين ...

- حبيبة لسه محجوزه فى المستشفى لحد ما يتأكدوا ان الرحم والمبيضين شغالين طبيعي

 - حبيبة اتصلت بـ الياس مرتين طمنته عليها

- وسيم رجع شغله

- حالة رواء الصحية والنفسية مستقرة وسعيدة جداً بـ فرحة بنتها

- عبد الوهاب اجل سفره لـ لندن لحد ما يطمن على حبيبة

*_____________________________________________**___________________________*

فى بيت رواء ...

(. رواء كانت مشغله قرآن جنب فرحه وكانت هى كمان بتسمع ، قطع خلوتهم جرس الباب ، فتحت لقيته عبد الله .)

رواء (بتحضنه) : بابا ، وحشتنى اوى

عبد الله : انتِ وحشتيني اكتر 

رواء : اتفضل يا بابا

(. ودخل .)

رواء : حضرتك جيت امتى من السفر

عبد الله : والله لسه واصل ، لو بصيتي من البلكونه هتلاقي جمال لسه بيطلع الشنط

رواء : يا حبيبي يا بابا (وحضنته تانى)

عبد الله : فين فرحة بقي ؟ هموت واشوفها

رواء : جوه ثوانى اجبهالك

عبد الله : لا تجيبيها ايه انا هدخلها ، انا تقريباً نازل لها مخصوص

(. دخلوا جوه فى الاوضة اللى فيها فرحة ، عبد الله شالها وخدها فى حضنه .)

عبد الله : بسم الله الرحمن الرحيم ، ما شاء الله يا روءه نسخه منك

رواء : حلوة ؟

عبد الله : دى زى القمر ، عيلة الحديدى متخلفش بنات وحشة

رواء : كان نفسي بابا وماما يشوفوها كان هيفرحوا بيها اوى

عبد الله : ربنا يرحمهم ويجعل مثواهم الجنه ، هما مالهمش نصيب يفرحوا بيكي او بيها لان ربنا اراد لهم الخير وهو ده الخير

رواء : ونعمٓ بالله

عبد الله : صدق اللى قال اعز من الولد ، ولد الولد

رواء : ههههه بس برضه لما حسام وجمال وحبيبة يخلفوا هتحبهم اكتر ، لان هما ولد الولد فعلاً

عبد الله : انتِ هبلة يا بت ولا ايه !! انتِ بنتى زيك زى حبيبة زى حسام زى جمال ، وولادهم هتبقي غلاوتهم من غلاوة فرحة ويمكن فرحة اكتر لانها الحفيد الاول

رواء : انا بحبك اوى يا بابا ربنا يخليك ليا يارب

عبد الله (بيبوس دماغها) : ويخليكي ليا ، تعالى بقي عايز اسألك على حاجة مهمه

رواء : خير يا بابا

عبد الله : انتِ مبسوطه مع وسيم ؟

رواء : اه الحمد لله

عبد الله : مفيش حاجة نقصاكى

رواء : لا خالص الحمد لله

عبد الله : وبالنسبه لـ شغله بقي ؟

رواء : ماله شغله ؟

عبد الله : انه بيسيبك ٣٥ يوم ، بتهيألى لو بيمشى الصبح ويجي اخر النهار يبقي احسن

رواء : هو اكيد احسن بس انا مرتاحه ومش معترضه

عبد الله : اصل انا لقيتله شغل هنا فى القاهرة وبمرتب كويس جداً

رواء : خلاص لما يجي اجازة نقوله

عبد الله : ابقي قوليله فى الموبايل وعرفيني رأيه ماشى

رواء : ماشى

عبد الله : انا هروح لـ حبيبة اشوفها بقي وجمال هيجيبلك شنطه الهدايا بتاعتك انتِ وفرحة

رواء : اوك يا بابا سلملى عليها

عبد الله : الله يسلمك (ومشي)

*_____________________________________________**___________________________*

فى مستشفى دكتور عبد الوهاب ....

(. عبد الله راح اوضة حبيبة وسلم عليها وعلى وداد وعلى عبد الوهاب وقعد معاهم شوية وبعدها عبد الوهاب خده وراحوا مكتبه .)

عبد الله : خير يا عبد الوهاب

عبد الوهاب : خير ان شاء الله متقلقش

عبد الله : انت مقولتليش ليه حبيبة محجوزه بقالها اسبوعين !!

عبد الوهاب : لحد ما نتأكد ان الرحم مش هينزل تانى من مكانه

عبد الله : وان نزل ؟

عبد الوهاب : بلاش نسبق الاحداث ، انا عايزك فى حاجة اهم 

عبد الله : حاجة ايه خير ؟

عبد الوهاب : ..............................

اشوفكم الحلقة الجاية

ارجو التقييم بـ كومنت

*_____________________________________________**___________________________*

بـ قلمى / آلاء الشريفى

(. لو حد عايز ينقل القصة يراسلنى على رسايل صفحة الفيس بوك .)

www.facebook.com/sh5abyt.bnoota

sh5abytalaa.blogspot.com