امومه بلا انجاب (الخامسة عشر)

الحلقة الخامسة عشر

فى الامارات ....

(. عبد الله قاعد حزين ومهموم جداً بسبب اختفاء حبيبة ، وقرر ميقولش لـ حسام عشام ميقلقوش هو كمان ، حسام كان راجع من شغله .)

حسام : سلام عليكم

عبد الله : وعليكم السلام

حسام : بابا كنت عايز اوريك حاجة

عبد الله : حبيبة اختك مش كلمتك

حسام : لا ليه ؟

عبد الله : عادى ، انت كنت عايز توريني ايه ؟

حسام : تقدر تعرف الصورة دى بتاعة مين (واداله الموبايل)

عبد الله بقلق : انت جبت الصورة دى منين ؟

حسام : جبتها وخلاص ، مين دى يا بابا !!

عبد الله : دى ازابيلا

حسام : يعني دى امى

عبد الله : ايوة هى

حسام : بس هى قالت انها متعرفش حضرتك وانها متجوزتكش ولا خلفتونا

عبد الله : ياااه للدرجة دى بقت قليلة الاصل وواطيه

حسام : قصد حضرتك ايه ؟

عبد الله : قصدى انها بتنكر ، انا اتجوزتها وخلفتكم منها لكنها زى ما باعتكوا زمان بتبيعكوا دلوقتى

حسام : بس هى رفعت قضية عشان تاخدنا

عبد الله : هى رفعت القضيه عند وتحدى مش حب فيكم والدليل انها دلوقتى بتنكركوا

(. حسام اتصدم تماماً من الكلام ده ومشى من قدام ابوه ودخل اوضته .)

__**__**__

حسام لنفسه >>  معقول يعني افضل ادور عليها كل ده عشان فى الاخر تنكرنى ، معقولة يطلع كلام بابا كله صح ، يعني كنت هخسر ابويا عشان ولا حاجة .. ااااه يااااارب صبرنى

*_____________________________________________**___________________________*

بالليل فى بيت مارى ...

مريم (ام مارى) : يعني البوليس مش لاقيها

مارى : لا لسه

مريم : ربنا يكون فى عونها فعلاً ، الموضوع مش سهل خالص ، دى الست المتجوزه اللى بتبقي مخلفه اتنين وتلاته لو حصل لها اى حاجة وقرروا يشيلوا الرحم لها بيبقي الموضوع ده صعب اوى عليها

مارى : ما بالك بقي يا ماما ان دى بنت صغيره عندها ١٨ سنه 

مريم : هى مارحتش الكلية خالص

مارى : لا اظن هتأجل السنه دى

مريم : حرام كده ، دى كانت بترتب على دفعتكم دايماً

مارى : ربنا يستر ، المهم انها ترجع بالسلامه

مريم : الرب يحميها

(. هنا ضرب الجرس .)

مريم : قومى افتحى ده باينه ابوكى

مارى : ابويا معاه مفتاح 

(. وقامت مارى تفتح لقيت حبيبة ، حبيبة كان باين عليها التعب والارهاق جداً وتقريباً مش قادرة تقف .)

مارى بقلق : حبيبة

(. قامت مريم تشوف حبيبة واتصدمت لما شافتها ، حبيبة متكلمتش خالص ، سندوها ودخلوها جوه وغسلوا لها وشها ومريم عملت لها اكل وحبيبة كانت بتاكل بالعافيه ، هانى ابو مارى لما جه ولقاها تعبانه اداها مسكن وراحت حبيبة فى النوم كأنها منمتش من سنين .)

__**__**__

مريم : البنت خلصانه خالص

هانى : من الالم وقلة الاكل 

مارى : طيب انا اكلم طنط وداد دلوقتى ولا اعمل ايه

مريم : ايوة كلميها طمنيها زمانها هتموت من القلق

هانى : بس ممكن تكون مش عيزاهم يعرفوا مكانها والمفروض ان اللى بينهم احنا مالناش دعوه بيه

مريم : بصى يا مارى كلميها وقولى لها متقولش لـ حبيبة انك عرفتيها 

مارى : وافرضوا بقي قالوا لازم نجى ناخدها عشان تعمل العملية

هانى : قولي لها اننا هنقنعها وهنجيبها 

مارى : ماشى

(. واتصلت مارى بـ وداد وطمنتها وعملت زى ما ابوها وامها قالوا بالظبط .)

__**__**__

بـعـد سـاعـتيـن ...

(. كانت حبيبة صحيت من النوم .)

مارى : مالك يا حبيبة ؟

حبيبة : لما سمعت عمو وماما بيتكلموا وبيقولوا انى لازم اعمل العملية لقيت نفسي مش طيقاهم 

مارى : بس العملية دى عشان مصلحتك يا حبيبه

حبيبة بعصبية : ايه المصلحة فى انى يبقي عندى ١٩ سنه واشيل الرحم ، ليه يعني كده ؟

مارى : انا مش عايزه اقولك كلام مثالى يا حبيبة ، بس انتِ بتدرسي  وعارفة الصح من الغلط

حبيبة بدموع : انا مش عارفة اعمل ايه !! اعمل العملية واحكم على نفسي طول العمر بالاعدام

مارى : انا عارفة ان الموضوع مش سهل بس صدقيني ربنا مش بيختار لنا اى حاجة وحشة

حبيبة : ونعمَ بالله

مارى : لازم مامتك تطمن عليكي يا حبيبة

حبيبة : ماما صعبانه عليا اوى بس انا مش هقدر اعمل العملية

مارى : والالم ده هتقدر تستحمليه

حبيبة : هاخد مسكنات 

مارى : يا سلام !! عشان متعمليش العملية تضيعي نفسك ، انتِ ناسيه ان المسكنات الكتير بتدمر الكلي

حبيبة : انا مش عارفة اعمل ايه

مارى : اقل حاجة طمني مامتك عليكي

حبيبة : انا اسفة انى جيتلك فجأة كده 

مارى : اسفة ايه يا بنتى انتِ هبلة ولا ايه ، بصى احنا ننام دلوقتى وبكرة لما نصحى نشوف هتعملى ايه

حبيبة : ماشى

(. وخدت حبيبة المسكن ونامت هى ومارى .)

*_____________________________________________**___________________________*

تانى يوم فى الامارات ...

فى المركز الطبي للاسنان ...

(. عبد الله راح المركز الطبي للاسنان وطلب يقابل المدير الطبي للمركز .)

عبد الله : السلام عليكم

على (المدير) : وعليكم السلام ، اذيك يا عبد الله

عبد الله : الحمد لله يا على انت عامل ايه

على : بخير ، ايه اخبار حسام دلوقتى

عبد الله : مصدوم ، بيحاول يستوعب الصدمه

على : انا برضه مش فاهم انت ليه عملت كل ده ، ما كنت تسيبه يقابل امه الحقيقية وخلاص

عبد الله : عشان صدمة نكرانها ليه ولاخواته ارحم بكتير من اللى ممكن يعرفه لو قابلها

على : اللى هى ايه الحقيقة دى يا عبد الله ، يعني هيكون ايه ابشع من انها الحدت وعرفت واحد على جوزها

عبد الله : هتعرف فى الوقت المناسب

على : انا اسف انا عارف ان الموضوع ده بيضايقك بس الكلام جاب بعضه

عبد الله : لا خلاص مبقاش بيفرق معايا ، قولى صحيح ايه اللى حصل مع حسام

على : هو لما جالى من شهرين ، انا سكته لحد ما اعرفك ان حسام جه واسالك اتصرف ازاى

عبد الله : منين جاتلك فكرة انك تقوله ان فى واحده اسمها ازابيلا وواخده اجازة

على : لان اللبنانيه الوحيدة اللى فى سن ازابيلا كانت واخده اجازة 

عبد الله : تمام

على : وعملنا زى ما قولت ، هى قالتله انها ازابيلا جورج الترك بس هى مش امه

عبد الله : وانا اكدتله انها فعلاً امه

على : تفتكر هيجي هنا تانى

عبد الله (وهو بيقوم) : حتى لو جه خلينا زى ماحنا هى معترفه انها ازابيلا بس مش مُعترفه انها امه

على : ايه على فين كده ؟

عبد الله : يدوب امشى عشان عندى شغل

على : ربنا معاك

عبد الله : يالا اشوفك على خير (ومشي)

*_____________________________________________**___________________________*

فى بيت مارى ...

(. صحيت مارى على صوت الم حبيبة .)

ماري بقلق : حبيبة انتِ كويسة !!

حبيبة : انا تعبانه اوى يا مارى 

مارى : بطنك برضه

حبيبة : هاتيلي المسكن اللى انتِ ادتيني منه امبارح

مارى : حاضر

(. وراحت مارى تجيب المسكن وهى بتديه لـ حبيبة لقيت دم كتير .)

مارى : حبيبة ، ده فى نزيف

حبيبة : نزيف !!

مارى : انتِ لازم تروحى مستشفى حالاً 

حبيبة : مستشفى ليه !!

مارى : انتِ نزفتى كتير اوى ، قومى معايا

حبيبة بدموع الم وخوف : لو روحت مستشفى هيعملولى العملية

مارى : يا حبيبتى لو فضلتى تنزفى كده ممكن تموتى قومى معايا

حبيبة : خديني مستشفى عمو عبد الوهاب 

مارى : حاضر حاضر

(. شال هانى حبيبة وخدها فى عربيته لـ المستشفى ومارى معاها ، واتصلت مارى بـ وداد عشان تعرفها انهم رايحين على المستشفى .)

*_____________________________________________**___________________________*

فى مستشفى دكتور عبد الوهاب ....

(. دخلت حبيبة المستشفى وكان فى انتظارها امها واخوها وعمها ، كشف عليها دكتور عادل وخرج لهم .)

عادل : زى ما قولت قبل كده لازم تشيل الرحم

وداد بقلق : هى بتصرخ وبتعيط كده ليه ؟

عادل : من الالم ، الرحم عمال ينزل فى الحوض 

عبد الوهاب : طيب اديها اى مسكن

عادل : لا مش لازم مسكن عشان تحس بالالم وتوافق تعمل العمليه

وداد : انا هدخلها اقولها

(. دخلت وداد لـ حبيبة اللى كانت بتصرخ وبـ تبكي من الالم .)

حبيبة بدموع : ماما خليهم يدونى مسكن يا ماما ، الحقيني انا بموت

وداد بدموع : بعد الشر عليكي ، حبيبة لازم تعملى العمليه يا ماما

حبيبة : اعملوا اى حاجة بس خلصونى من الوجع ده

وداد بدموع : يعني موافقة تعملى العمليه ؟

حبيبة بدموع وتوسل : ابوس ايدك يا ماما خليهم يعملوا اى حاجة انا تعبانه اوى مش قادرة استحمل

وداد : حاضر يا حبيتي حاضر

(. وخرجت وداد وقالت لـ دكتور عادل يعمل العمليه ، جهزوا اوضة العمليات ودخلت حبيبة العمليات وعملت العمليه بنجاح واتنقلت لـ الجناح الخاص بيها وكانت لسه مفقتش .)

__**__**__**__

بعد ما فاقت ...

كلهم : حمد الله على سلامتك يا حبيبة

حبيبة بتتكلم بالعافيه : خلاص شيلتوا الرحم

وداد : المهم سلامتك يا حبيبتى

حبيبة بدموع : اخرجوا بره مش عايزة اشوف حد

عبد الوهاب : خلاص تعالوا نخرج ونسيبها براحتها

(. خرجوا كلهم وقعدوا فى استقبال الجناج .)

وداد : هى مالها يا عبد الوهاب

عبد الوهاب : اتوقع انها هتصاب بـ اكتئاب الفترة الجايه وهتتصرف تصرفات غير معتاده

وداد : طيب والتعامل معاها هيكون ازاى

عبد الوهاب : لازم تستحملوها وتتعاملوا معاها عادى

وداد : ربنا يستر يارب

جمال بعصبية : انا مش فاهم يعني مكنش فى حل تانى غير العملية

مارى : للاسف لا 

عبد الوهاب : الاربطه كانت ضعيفه خلقة ربنا كده واحنا حاولنا بس ربنا عايز كده

وداد : ربي لا اسألك رد القضاء ولكنى اسألك اللطف فيه

عبد الوهاب : ربنا يصبرها ويسترها

*_____________________________________________**___________________________*

بعد مرور شهر ...

- حبيبة بعد العملية اصيبت بـ اكتئاب حاد ومرحتش الكلية ولا يوم

- علاقة الياس وحبيبة مش مستقرة بسبب اكتئاب حبيبة

- حسام فاق من الصدمه وقرر ينسى الموضوع كأنه لم يكن

- عبد الله ووداد وجمال وحسام ومارى واهلها والياس ، كلهم زعلانين جداً على حبيبه ومتعاطفين معاها وعشان كده مستحملين عصبيتها وكلامها اللى يضايق

- الحاجة الوحيدة اللى بتخرج حبيبة من اللى هى فيه ، فــرحــة

*_____________________________________________**___________________________*

فى احدى النوادى الاجتماعيه ...

(. وسيم ورواء وحبيبة والياس كانوا مع بعض عشان وسيم والياس يتعرفوا ، واندمجوا مع بعض وتبادلوا ارقام الموبايلات بعدها مشى رواء ووسيم وفضل حبيبة والياس مع بعض شوية .)

الياس : ايه بقي يا قمر

حبيبة : قمر !!

الياس : قمر ومُزة كمان

حبيبة : انت مصدق نفسك يا الياس

الياس : يعني ايه

حبيبة : يعني متضحكش عليا ، انت لا بتحبنى ولا نيلة انت بتشفق عليا

الياس : واشفق عليكي ليه مناخيرك بـ تلت فتحات

حبيبة : يا سلام !! يعني انت لسه بتحبنى وعايز تتجوزنى وانت عارف انى عمرى ما هخلف

الياس : حبيبة انا فعلاً بحبك ومش عارف اعمل ايه عشان اثبتلك كده

حبيبة : انت مستوعب اللى انا فيه ، انا بنت من بره بس لكن من جوه انا فاضيه زيي زيك بالظبط

الياس : ده على اساس انى لسه عارف بحوار العملية امبارح !! فى ايه يا حبيبة

حبيبة : الياس سبنى فى حالى ممكن

الياس : اسيبك فى حالك يعني ايه ؟

حبيبة : يعني مبقتش بحبك

الياس : امال جبتيني اتعرف على قريبك ليه

حبيبة : عشان قرفت من زنك

الياس : اهدى يا حبيبة ، انتِ بس لسه مصدومه من حوار العمليه ده بس بكره هتتعودى و ......

حبيبة تقاطعه : لا بكرة ولا بعده ، انا هعيش لنفسي وبس 

(. ومشيت حبيبة وسابته وقرر الياس يسيبها براحتها شوية لانها لسه مرجعتش لحالتها الطبيعيه .)

*_____________________________________________**___________________________*

فى بيت وداد ...

(. وداد بتكلم عبد الله فى الموبايل .)

وداد : قلبى واجعنى اوى عليها يا عبد الله

عبد الله : هى فين دلوقتى ؟

وداد : عند رواء ، تقريباً مبتنزلش من عندها 

عبد الله : بتعمل ايه عند رواء ؟

وداد : قاعدة مع فرحة

عبد الله : بصى هى هتاخد فترة ، هى اصلاً ممكن يكون عندها اكتئاب

وداد : طيب نوديها لـ دكتور وتاخد مضادات للاكتئاب 

عبد الله : مش هتوافق وخدى بالك انها هتعاند معاكوا كتير الفترة اللى جاية

وداد : دى مش طايقه حد فينا وبتكلمنا بـ اسلوب وحش

عبد الله : الاهم من ده كله انها لازم تروح الكليه وتقدم عذر مرضى على الشهرين اللى فاتوها دول

وداد : مش عايزة

عبد الله : انا هحاول اخد اجازة ان شاء الله يومين واجى اتكلم معاها

وداد : حاول بالله عليك يا عبد الله بدل ما مستقبلها فى الكلية يروح

عبد الله : ربنا يسهل 

(. قعدوا يتكلموا شوية عن جمال وحسام وبعدين قفلوا .)

*_____________________________________________**___________________________*

فى بيت رواء .....

(. وسيم و رواء قاعدين فى اوضة نومهم .)

وسيم : مالك يا روءة

رواء : صعبان عليا حبيبة

وسيم : هى مشيت ولا ايه ؟

رواء : لا هى قاعدة مع فرحة فى اوضتها وتقريباً كده هتبات هنا

وسيم : مينفعش يا رواء تسيبي فرحة لـ حبيبة طول الوقت كده ممكن تتعلق بيها اكتر مننا

رواء : طيب اعمل ايه !! انا مقدرش اقولها هاتيها لانها اختى واللى حصلها مش شوية 

وسيم : انا والله متعاطف معاها اكتر منك بس انا عايز العلاقة بينك وبين فرحة تبقي اقوى من علاقتها بـ اى حد

رواء : متقلقش انا وحبيبة وفرحه هنبقي ثلاثى مالوش مثيل ، اصحاب واخوات وكله

وسيم : اصل انا لاحظت ان حبيبة بتتعامل مع فرحة انها بنتها

رواء : مش مشكله ، متنساش انها هتفضل محرومه مفيش مانع لو حسيت احساس الامومه ده تجاه فرحة واهى فرحة يبقي لها بدل الام اتنين

وسيم : بكرة لما فرحة تتعلق بيها اكتر منك هتندمى

رواء : مفيش ندم ولا حاجة ، حبيبة اختى وفرحه بنت اختها يعني بنتها

وسيم : ماشي يا حبيبتى زى ما تشوفى

رواء : انا بحبك اوى يا وسيم

وسيم : وانا بعشقك يا ام فرحة

رواء : ربنا يخليك ليا يا حبيبي

وسيم : ويخليكي ليا يا روح قلبى (وحضنها)

رواء : نفسي مخرجش من حضنك ده ابداً

وسيم : وانتِ بتخرجى ليه بقي ؟ خليكي فى حضنى كده

رواء : ياريت الواحد يقدر يفضل فى حضن اللى بيحبهم عمره كله

وسيم : انا بحبك اوى يا روءة ، ربنا ما يحرمنى منك ابداً

رواء : هروح بقي اطمن على حبيبة وفرحة

وسيم : ماشي يا حبيبتى بس متتأخريش عايز اقعد معاكى كتير

رواء : هبص عليهم واجى

وسيم : مستنيكي

(. خرجت رواء وراحت تطمن على حبيبة وفرحة ، رواء اتأخرت فـ وسيم اضايق وراح يناديها .)

وسيم : رواء ، يا روءة ، بسم الله الرحمن الرحيم ايه ده !!

اشوفكم الحلقة الجاية

ارجو التقييم بـ كومنت

*_____________________________________________**___________________________*

بـ قلمى / آلاء الشريفى

(. لو حد عايز ينقل القصة يراسلنى على رسايل صفحة الفيس بوك .)

www.facebook.com/sh5abyt.bnoota

sh5abytalaa.blogspot.com