الحلقة العشرين
تانى يوم فى احدى الكافيهات ...
(. اتصل وسيم بـ الياس وطلب منه يقابله .)
وسيم : اذيك يا الياس
الياس : بخير الحمد لله ، انت عامل ايه وفرحة اخبارها ايه
وسيم : احنا كويسين الحمد لله ، انا اسف انى جبتك كده بس فى موضوع مهم لازم نتكلم فيه
الياس : موضوع ايه خير ؟
وسيم : اتمنى تفهمنى ومتستعجلش فى قرارك
الياس : خير يا باشمهندش قلقتنى
وسيم : انت طبعاً بتحب حبيبة صح ؟
الياس : ايوة طبعاً بس احنا خلاص سيبنا بعض
وسيم : سيبتوا بعض !! ليه
الياس : هى كلمتنى من المستشفى وقالتلى لازم نسيب بعض وقفلت وانا اصلاً مش عارف اوصلها فقولت اسيبها براحتها لحد ما تخرج من المستشفى واقدر اتكلم معاها
وسيم : طيب بص بغض النظر عن انكوا سبتوا بعض انت اكيد بتحبها وعايز ترضيها صح
الياس : اكيد
وسيم : واكيد عايزها تخرج من الحاله اللى هى فيها دى
الياس : بدون شك
وسيم : وهى لازم تبقي جنب فرحة على طول
الياس : فى ايه يا باشمهندس وسيم ؟
وسيم : ايه رأيك تتجوز حبيبة وتعيشوا فى نفس العمارة ، وفرحه تفضل مع حبيبة على طول وبرضه تفضل جنبي
الياس : انت بتقول ايه يا باشمهندس !!
وسيم : بقول الحل اللى يرضي جميع الاطراف
الياس : لا ، ده الحل اللى يرضيك ويرضى فرحة ويرضى حبيبة واهلها واهلك ، لكن ميرضنيش وميرضيش اهلى
وسيم : بمعنى !!
الياس : بمعنى انك قولت جميع الاطراف ودول مش جميع الاطراف
وسيم : انا مش فاهم فين مشكلتك فى قرار زى ده
الياس : مشكلتى ان مينفعش اسيب حياتى واهلى وشغلى فى المنصورة واجى اعيش هنا فى القاهرة
وسيم : بس ده عشان خاطر حبيبة ، لو بتحبها لازم تضحى
الياس : انا ضحيت وهضحى بحاجات كتير اوى عشان بحبها ، المفروض هى كمان تضحى
وسيم : بص يا وسيم ، انا كنت بقول اقتراح مش بفرضه عليك ولك حق القبول او الرفض
الياس : عموماً سيبنى افكر فى الموضوع ده وربنا يسهل
وسيم : خد وقتك
الياس : حبيبة عامله ايه ؟
وسيم : الدكتور بيقول بتتحسن بس الزياره لسه ممنوعه
الياس : ربنا يقومها بالسلامه ويبعد عنها كل سوء
وسيم : يارب
*_____________________________________________**___________________________*
بعد مرور تلت شهور .....
- حبيبة حالتها اتحسنت جداً
- كل الامور مستقرة عموماً
*_____________________________________________**___________________________*
فى المستشفى ...
(. دخل رامز على حبيبة لقاها بترسم .)
رامز : بتعملى ايه ؟
حبيبة : بشخبط
رامز : شخبطى ايه بقي وريني
حبيبة : الياس وحشنى اوى
رامز : الياس !!
حبيبة : بقاله فترة مبيروحش من بالى ، فكرت ارسمه من الذاكرة بس معرفتش
رامز : اشمعنى الياس وحشك اوى كده ؟
حبيبة : معرفش بس جايز عشان عشت مع الياس ايام حلوة وجايز برضه عشان خلانى احس احاسيس جميلة
رامز : طيب ومش نفسك ترجعى الاحاسيس والايام الحلوة دى تانى
حبيبة : نفسي بس الياس مش هيوافق
رامز : ليه ؟
حبيبة : عارف انا سيبت الياس كام مرة ورجعتله
رامز : وده معناه انه اكيد هيوافق يرجعلك طالما وافق اكتر من مرة
حبيبة : او هيكون زهق ومش هيرجعلى تانى
رامز : تاخدى تكلميه
حبيبة : لا مش دلوقتى
رامز : لا كلميه ، احلى حاجة لما نحس حاجة ونعملها على طول منأجلهاش
حبيبة : اكلمه اقوله ايه ؟
رامز : كل اللى انتِ حساه
حبيبة : عارف انا نفسى فى ايه ؟
رامز : ايه ؟
حبيبة : نفسي اتجوز الياس ونعمل فرح متعملش قبل كده ، والبس فستان مفيش عروسة لبست ولا هتلبس زيه ، واقولك زوجتك نفسي وهو يقولى قبلت زواجك و بابا يسلمنى لـ الياس ويقوله خد بالك عليها دى نور عيونى و ..........
رامز : وايه ؟ كملى
حبيبة : لا مش هينفع
رامز : ليه ؟
حبيبة : اصل الاحلام الباقيه عمرها ما هتتحقق
رامز : قوليها ؟
حبيبة : كان نفسي اخلف ، كان نفسي اجيب بنوته تبقي بنتى واختى وصاحبتى
رامز : طيب وفرحة ؟
حبيبة : مهما حبيت فرحة ومهما حبتنى انا برضه مش امها ولا هى بنتى ، اصلها مش حته منى
رامز : الامومه مش محتاجه انجاب ، محتاجه الفطرة اللى عند كل انثى
حبيبة : ماما كان عندها حق امومة بلا انجاب فعلاً
رامز : حبيبة ممكن اسألك سؤال
حبيبة : اكيد
رامز : شايفة بكرة ازاى ؟
حبيبة : عارف لما يبقي نظرك ضعيف وقالع النضارة
رامز : اهاا
حبيبة : لو قدامك تورته حلوة اوى ومش لابس النضارة بتكون شايف ايه ؟
رامز : بكون شايفها طشاش
حبيبة : بفرض انها شوكولا ، هتكون شايفها مثلاً بنى ولو عليها اى تذويق هتكون يدوب شايفه بس مش قادر تحدد الوانه ولا شكله ولا ملامحه ، بس انت عارف انه حاجة حلوة اوى
رامز بابتسامه امل : يعني انتِ متأكده ان بكرة حلو بس الرؤيه بتاعته لسه مش واضحه
حبيبة : بالظبط
رامز(بيطلع موبايله) : خدى بقي كلمى الياس
حبيبة : انت مصمم بقي
رامز : جداً
(. خدت حبيبة الموبايل من رامز وبكل خوف وتردد طلبت نمرة الياس واتصلت عليه .)
الياس : حبيبة !!
حبيبة : ايوة انا عرفت ازاى ؟
الياس : انا سجلت الرقم لما كلمتيني منه ، طمنيني صحتك عامله ايه ؟
حبيبة : انا كويسة الحمد لله
الياس : يعني بتتحسنى
حبيبة : الحمد لله
الياس : خدى بالك على صحتك وعلى نفسك
حبيبة : انا اسفة
الياس : حبيبة متتأسفيش على حاجة لانى مش زعلان ومقدر موقفك تماماً
حبيبة : انا بحبك
الياس : وانا بموت فيكي ومش هتجوز حد غيرك
حبيبة : لسه عايز تتجوزنى ؟
الياس : جداً بقي
حبيبة : والاطفال والخلفه ؟
الياس : بص يا بيبة ، احنا هنعيش احلى واجمل سنين حياتنا ووقت ما نحس ان احنا محتاجين طفل يملى وقتنا ممكن نتبنى يا ستى واهو ناخد ثواب
حبيبة : انا بحبك اوى
الياس : وانا بموت فيكي
حبيبة : ربنا يخليك ليا يا حبيبي وانا اسفة لو يوم زعلتك
الياس : حبيبتى انا عارف انتِ بتحبيني قد ايه ، وعارف انك لما كنتى بسبتيني كان بيبقي عشانى
حبيبة : انت ازاى استحملتنى كل ده !! ازاى قادر تستحمل كل اللى انا بعمله
الياس : لو بتحبيني قد ما بحبك مكنتيش قولتي كده
حبيبة : ربنا يخليك ليا وميحرمنيش منك ابداً
الياس : ويجمعنى بيكي على خير
(. قعدوا يحبوا فى بعض شوية وبعدين قفلوا ، حبيبة خدت الموبايل فى حضنها ومددت وبصت للسقف وابتدت تحلم احلام وردية وهى مُبتسمه ، هنا دخل الدكتور رامز .)
رامز : هاا التورته بانت كلها
اكتفت حبيبة بالابتسامه
رامز بتفائل : فاضلك خطوات بسيطه وتاكلى التورته كلها
حبيبة : يعني انا بتحسن
رامز : فى وقت قياسى جداً وعشان كده هكتبلك على خروج
حبيبة : بجد يا دكتور
رامز : ايوة بس بشرط
حبيبة : ايه هى ؟
رامز : اولاً نلتزم بالعلاج والتعليمات وثانياً كل اسبوع هيكون فى جلسه وثالثاً بقي ودى الاهم
حبيبة : ايه ؟
رامز : حتى لو بطلنا العلاج والجلسات وقت ما تحسى انك مكتأبه او هتاخدى اى عقار مهدأ او منوم لازم تجينى او تكلميني
حبيبة : تمام
رامز : انا سعيد جداً بالتطور اللى وصلتيله ، اول مرة اشوف ضحكتك كده
حبيبة : الفضل كله ليك يا دكتور
رامز : الفضل لـ ربنا ولـ ارادتك
(. وكتب رامز على خروج لـ حبيبة على انها كل اسبوع تروحله عشان جلسة استكمال العلاج .)
*_____________________________________________**___________________________*
فى بيت وداد ....
(. حبيبة لسه راجعه من المستشفى ، راح جمال و وداد خدوها .)
وداد : حمد الله على سلامتك يا حبيبة قلب امك
حبيبة : الله يسلمك يا ماما
جمال : بت يا حبيبة
حبيبة : بت فى عينك
جمال : مكنتش اعرف انك غالية عليا وبحبك اوى كده
حبيبة : وانا والله بحبكوا اوى
وداد : ربنا يخليكوا لبعض
حبيبة : عايزة ادخل اوضتى
وداد : انا روقتهالك ونضفتها
جمال : انتِ هتنامى ؟
حبيبة : لا هقعد مع نفسي شوية
جمال : ايه يا بيبه مكفكيش قعدة مع نفسك كل ده
(. هنا الجرس ضرب وكان وسيم وفرحة ، حبيبة اول ما شافت فرحة اتسمرت مكانها وحست ان تعلقها بيها وحبها المرضى ليها رجع تانى .)
وداد : حبيبة انتِ كويسة ؟
حبيبة : هاه !! لا ايه اه
جمال : مالك يا حبيبة
حبيبة لـ وسيم >> ينفع اللى انت عملته ده !! تاخد البنت وتهرب بيها
وداد : حبيبة استنى افهمى الحكايه
حبيبة : حكاية ايه !! هو فى اكتر من اللى حصل
جمال : وسيم رجع تانى وكذا مره ياخد فرحة ويروحلك المستشفى والدكتور يرفض الزياره
وسيم : انا اسف والله ما كنت اقصد ، بس انا فعلاً روحتلك كتير والدكتور كان بيرفض
حبيبة : كان بيرفض عشان يخلصنى من تعلقي بـ فرحة
وسيم : انا اسف حقك عليا
(. خدت حبيبة فرحة فى حضنها ونسيت بالحضن ده كل اللى حصل فى الشهور اللى فاتت وحسيت انها اتولدت من جديد .)
وسيم : حبيبة ممكن نقعد نتكلم شوية
حبيبة : خير
وسيم : موضوع مهم لازم نتكلم فيه سوا
حبيبة : اوكى
وداد : طيب انا هروح اجهز الغدا
جمال : وانا هدخل اغير هدومى
(. قعد وسيم وحبيبة فى الصالون .)
حبيبة : خير
وسيم : حكى لها اللى حصل مع الياس من تلت شهور
حبيبة : انت صاحب الفكرة دى
وسيم : اه انا ومعنديش مانع بس اهم حاجة نبقي فى عمارة واحده
حبيبة : والياس قالك ايه ؟
وسيم : طلب نأجل الموضوع لحد ما انتِ تخرجى من المستشفى بالسلامه
حبيبة بفرحة : طيب انت لسه عند كلامك
وسيم : دى اقل حاجة اكفر بيها عن اللى انا عملته
حبيبة : انا متشكرة اوى يا وسيم ، انا هتكلم مع الياس واقنعه وارد عليك هو هيقابلنى بكرة
وسيم : اوكى
*_____________________________________________**___________________________*
تانى يوم فى احدى الكافيهات ...
(. الياس نزل لـ حبيبة القاهرة عشان يشوفها ، الياس كان مبسوط اوى كان ناقص يطلعلع جناحين ويطير من كتر سعادته انه هيشوف حبيبة .)
حبيبة : مالك ساكت كده ليه
الياس : انا هعيط من كتر الفرحة
حبيبة : وحشتك ؟
الياس : يااااااه وحشتيني اوى يا حبيبه انا كنت ميت من غيرك
حبيبة : بعد الشر عليك يا حبيبي
الياس : انا حمدت ربنا كتير اوى انك رجعتيلي بالسلامه ، عقبال ما ربنا يجمعنا على خير
حبيبة : يارب يا حبيبى ان شاء الله
الياس : انا مستني اليوم ده بفارغ الصبر
حبيبة : اه صحيح ، وسيم حكالى على اللى حصل بينكم
الياس : ان احنا اتقابلنا وكده
حبيبة : اه وقالى على الاقتراح اللى قالهولك
الياس : تمام وانتِ ايه رآيك
حبيبة : انت ايه رأيك يا حبيبي
الياس : اكيد مش موافق
حبيبة : مش موافق !! ليه ؟
الياس : عشان انا مينفعش اسيب حياتى واهلى وشغلى فى المنصورة واجى هنا اعيش وسط ناس معرفهمش وادور بقي على شغل جديد والقرف ده ده غير اصلاً انى شقتى فى المنصورة
حبيبة : بس الحل ده هيخليني اقرب لـ فرحة
الياس : وهيخليني بعيد عن اهلى وانا مقدرش ابعد عن اهلى
حبيبة : ليه يا الياس العفريت هيعضهم
الياس : لا يا ام دم خفيف ، بس انا الولد الوحيد واخواتى البنات صغيرين ولازم ابقي جنبهم واصلاً ده كان اتفاقى معاكى من زمان اننا هنتجوز فى المنصورة
حبيبة : ايوة يا حبيبي ، بس من يوم ما عرفنا بعض فى حاجات كتير اوى اتغيرت واكيد برضه الاتفاقات هتتغير
الياس : لا يا حبيبة ، انا مش هعيش فى القاهرة
حبيبة : بس انا بقولك ده عشان خاطرى ، انا محتاجه ابقي قريبة من فرحة
الياس بعصبيه : يووووه بقي فرحة فرحة فرحة ، كل حاجة فرحة ، حياتك ومستقبلك كله يتلخص فى فرحة ، احنا مكناش خلصنا من ام الموضوع ده
حبيبة : انت بتتعصب عليا كده ليه ؟
الياس : عشان انا تعبت وفاض بيا ، كل ما يحصل اى حاجة واقول مش مشكله المهم اننا نبقي مع بعض وانك لسه بتحبيني لكن الموضوع بدأ بزيد عن حده
حبيبة : طيب طالما انت استحملت كل ده مجتش على دى
الياس : بصى انا استحمل معاكى وعشانك اى حاجة ، بس مش معقول ولا منطقى تشقلبى حياتى وشغلى ومستقبلى عشان خاطر عيلة
حبيبة : عيلة !!
الياس(بدأ يهدأ) : حبيبتى احنا مش كنا خلصنا من الحكايه دى واتعالجتي ، ايه رجعك تانى توقفى حياتك على فرحة
حبيبة : عشان لقيت فرصة كويسة تقربنى منها وتخليني عايشة معاها ، عشان لما شوفتها امبارح احساسي بالامومه ناحيتها اتحرك تانى
الياس : فوقى بقي فوقى حرام عليكي تعبتينا كلنا معاكى ، فرحة مش بنتك واحساس الامومه ده ناتج من الحرمان لكن هى مش بنتك وانتِ مش امها خليكي دايماً فاكرة كده
حبيبة بدموع محبوسة : لا بنتى وانا امها وغصب عنك وعن اى حد
الياس : خلاص خلينا نعتبر انها بنتك وانك اتطلقتى وهى عايشة مع ابوها وانتِ هتتجوزيني ونعيش فى المنصورة وكل فترة هتشوفيها
حبيبة : ايه التخاريف اللى انت بتقولها دى ، انت ليه مش عايز تضحى عشانى
الياس : كل ده ولسه مطلوب منى اضحى ، يا شيخة حرام عليكي
حبيبة : ده انت شايل ومعبى اوى منى ، على فكرة انا مغصبتكش على حاجة
الياس(بهدوء وبيقوم) : حبيبة انا ماشى ، انتِ نكدتى عليا وانا فى قمة سعادتى
حبيبة : استنى بس يا الياس ، والله انا بحبك
الياس : بس عايزة كل حاجة ، اختارى لا انا لا فرحة
حبيبة : ده لوى دراع بقي
الياس : ده المنطق ، لا انا لا هى اختارى
سكتت حبيبة ومعرفتش تقول ايه
الياس : انا ماشى سلام
*_____________________________________________**___________________________*
فى الامارات ....
(. حسام وروان بيتكلموا سكايب .)
روان : انا مش مصدقة خلاص باقى خمس شهور ونتجوز
حسام : ربنا يجمعنا على خير
روان : يارب يا حبيبى
حسام : كنت عايز اسألك على حاجة
روان : ايه يا حبيبي
حسام : لما نتجوز ان شاء الله وتجى هنا الامارات ، عايزة تعيشي فى شقة لوحدك ولا معندكيش مانع تقعدى فى نفس الشقة اللى فيها بابا
روان : حبيبي انا معاك مكان ما تروح ، فى نفس الشقة موافقة فى شقة تانيه انا معنديش مشكله
حسام : لا انا عايزك انتِ تختارى
روان : خلاص نقعد مع باباك فى نفس الشقة ، اصلاً انا بموت فى عمو عبد الله
حسام : خلاص يا حبيبتى ومتقلقيش مش هتحسى انه مش بيتك
روان : وانا مش قلقانه ومش شايله اى هم وانا معاك
حسام : انا عندى ليكي مفاجأة رهيبه
روان : ايه يا حبيبي فرحنى
حسام : انا جاى اجازة طويله وكمان حجزت لينا فى شرم الشيخ اسبوعين بحالهم
روان : انت بتتكلم بجد ولا بتهزر
حسام : والله بتكلم بجد ، شهر العسل ده هديه من بابا انا كنت ناوى احجز تلت ايام بس بابا كملهم اسبوعين هديه
روان : ده انا بموت فى باباك
حسام : يا جزمة طيب وانا
روان : بحبك اوى يا حبيبي
حسام : وانا بموت فيكي يا روح قلبى
__**__**__**__
(. بعد شوية جه عبد الله .)
حسام : بابا روان وافقت ان هى تعيش هنا معانا
عبد الله : انت مش بتاخد بدل سكن
حسام : باخده فلوس
عبد الله : انا بقول تكمل عليه وتاخد شقة ليك انت وروان وانا فى الاول ممكن اساعدك
حسام : بس هو وافقت
عبد الله : يا ابنى هى وافقت عشان بتحبك ، بس هى من حقها يبقي لها بيت مستقل
حسام : اللى حضرتك تشوفوه بس انا شايف انها طالما موافقه خالص
عبد الله : وانا شايف انك تبدأ تجهز السكن الجديد عشان لما عروستك تجى ان شاء الله
حسام : بابا هو مينفعش تشوفلى شغل فى مصر
عبد الله : ايه اتخنقت
حسام : انا بكره الغربة اوى
عبد الله : سيبها لـ وقتها ماشى
حسام : اوكى ماشى
*_____________________________________________**___________________________*
فى جامعة جمال ...
(. هايدي بقالها كتير مشافتش جمال ولما بتشوفوه صدقه بيعمل مش شايفها ، والنهاردة قررت تتكلم معاه دورت عليه ولقيته قاعد فى الكافتريا .)
هايدي : مهما كان اللى بينا كان المفروض تديلي فرصة اعزيك فى وفاة اختك
جمال : اذيك يا هايدي
هايدي : من السنة اللى فاتت وانت بتتجنبنى وتتجاهلنى ممكن اعرف ليه
جمال : وانتِ ليه بعد سنة قررتى تتكلمى معايا
هايدي : عشان عرفت من قريب ان اختك توفيت
جمال : بس هى توفت من سنة
هايدي : صدقنى لسه عارفة من قريب وكنت عايزة اعزيك بس حسيت انها متأخره
جمال : انتِ مسمحانى يا هايدي
هايدي : انا لسه بـحـ..........
جمال يقاطعها : لا لا لا انا سؤالى واضح ، مسمحانى ؟
هايدي : اكيد مسمحاك بس انت لسه بتحبنى ؟
جمال : عايزة الصراحة ؟
هايدي : اكيد
جمال : لحد اخر مرة قولتلك فيها انى بحبك كنت حاسس فعلاً انى بحبك لحد ما ماتت رواء اكتشفت انى محبتش حد غيرها
هايدي : مش فاهمه حاجة ؟
جمال : انا محبتكيش يا هايدي ، بس صدقيني كنت فاكر انى بحبك
هايدي : وليه مبقتش تحبنى
جمال : قولت انى كنت فاكر بس اكتشفت انى مبحبكيش
هايدي : بس انا والله لسه ......
جمال يقاطعها : انتِ متعاطفه معايا عشان اختى ماتت بس انا هصارحك بحاجة
هايدي : حاجة ايه ؟
جمال : اللى ماتت دى مش اختى ، دى بنت عمى اللى اتربيت معانا بس انا بحبها من وانا عيل لكن هى حبت واحد تانى واتجوزته وخلفت وانا برضه مش قادر انسى ، كنت بحاول انساها فى وشوش البنات اللى بعرفهم لحد ما قابلتك حسيت فعلاً انى بدآت انساها لحد ما ماتت ، بعد ما ماتت مبقتش قادر اشوف غيرها ، حاسس انى بخونها رغم انها متعرفش انى بحبها
هايدي : ربنا يرحمها
جمال : انا اسف بس مش هقدر اضحك عليكي ، انا عاهدت ربنا وعاهدت رواء انى مش هعمل حاجة غلط ولا حرام تانى
هايدي : ربنا يوفقك
جمال : مش زعلانه منى
هايدي : بالعكس انا احترمتك جداً ، ربنا يوفقك فى حياتك
جمال : ويوفقك ويرزقك باللى احسن منى
*_____________________________________________**___________________________*
بالليل فى اوضة حبيبة ....
(. حبيبة اتصلت بـ الياس .)
حبيبة : ينفع اللى حصل ده
الياس : بتحبيني يا حبيبة ؟
حبيبة : ايه السؤال ده ، اكيد بحبك
الياس : لا ، انتِ بتهيألك انك بتحبيني بس انتِ مبتحبنيش ، انتِ بس حابه وجودى جنبك
حبيبة : ايه الكلام ده يا الياس
الياس : دى الحقيقة
حبيبة : لا طبعاً انا بحبك بدليل .............
الياس يقاطعها : بدليل انك معرفتيش تختارى بيني وبين فرحة
حبيبة : انتِ ازاى عامل مقارنه بينك وبين طفله صغيره
الياس : حبيبة شوفى انتِ عايزة ايه واعمليه وانا مش هزعل فى كل الاحوال
حبيبة : بس انا بحبك ، والله بحبك
الياس : طيب انا بقولك خديلك كام يوم كده فكرى وشوفى انتِ عايزة ايه
حبيبة : عيزاك انت
الياس : فكرى كويس برضه لان لو قولتى انك عيزانى فى حاجات كتير اوى هتتغير
حبيبه : زى ايه
الياس : انتِ عارفة كويس
حبيبة : بس انا مش هبعد عن فرحة
الياس : انا قولت فكرى
حبيبة : اوكى تصبح على خير
الياس : وانتِ مش اهله (وقفلوا)
*_____________________________________________**___________________________*
بعد كام يوم شقة وسيم ...
(. وسيم كان قاعد بيتفرج على التلفزيون وفجأة جرس الباب رن .)
وسيم : حبيبة
حبيبة : وسيم انا جيالك فى موضوع مهم جداً
وسيم : خير ، فرحة كويسة !!
حبيبة : متقلقش كويسة الحمد لله ، اكلت ونامت
وسيم : امال فى ايه قلقتيني
حبيبة : مش هينفع على الباب ومش هينفع ادخل
وسيم : طيب اطلعلك شقتكم
حبيبة : انت فاضى نخرج بره شوية
وسيم : حبيبة تعالى ادخلى مفيش مشكله يعني ، انتِ اختى الصغيره
حبيبة(دخلت) : هو الموضوع بسيط اوى
وسيم : خدى راحتك ، فى ايه بقي ؟
حبيبة : .........................
اشوفكم الحلقة الجاية
ارجو التقييم بـ كومنت
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
www.facebook.com/sh5abyt.bnoota
sh5abytalaa.blogspot.com
جميلة جدا .. ياه مكنتش تبقى اطول ؟!
ردحذفيلا الحلقة الجاية تعوض دى .. بانتظارها بفارغ الصبر
القصة دى حلقاتها مش طويلة اوى :)
حذفجمييييله جدا بس بليييييز ياالاء الحلقات تبقي اطول شويه
ردحذف