امومه بلا انجاب (السابعه عشر)

الحلقة السابعة عشر

فى بيت وداد ...

(. وسيم كان  جاى اجازة ، اول حاجة بيعملها بيعدي على فرحة يشوفها وتقريباً من بعد وفاة رواء وهو بيقضى اليوم كله فى بيت عبد الله وبيطلع شقته هو رواء على النوم وساعات بياخد فرحة تنام معاه فى حضنه فى شقته ولما تصحى ينزلها لـ حبيبة  ، وسيم قاعد وحاضن فرحة و وداد وجمال وحبيبة قاعدين معاه .)

وسيم : انا كنت عايز اتكلم معاكوا فى موضوع مهم

وداد : خير ؟

وسيم : هى حاجة بخصوص فرحة واتمنى تساعدونى فيها

حبيبة : طالما بخصوص فرحه انا هـ اساعدك جداً

جمال : خير يا معلم اتكلم

وسيم : انا بقول كفايه عليكم تعب كده

وداد : تعب ايه بس يا ابنى

وسيم : انتوا برضه تعبتوا معانا كتير السنه اللى فاتت

جمال : تعبكوا راحة

وسيم : انا هاخد فرحة

حبيبة بقلق : هـ ايه !! ، هتاخد فرحة ؟

وسيم : ايوة

حبيبة : يعني ايه تاخدها !! ومين هيربيها

وسيم : انا اللى هربيها ، انا هتنقل شغل هنا

وداد : ايوة يا ابنى طيب وانت فى شغلك

وسيم : امى هتقعد بيها 

حبيبة بعصبيه : يا سلام ده على انهى اساس

وسيم : على اساس انها بنتى

حبيبة : بنتك !! بـ امارة ايه ، ده انا قعدت معاها اكتر منك ومن رواء 

وداد : بس يا حبيبه مينفعش الكلام ده

حبيبة بدموع : لا ينفع ، مانا متعبش التعب ده كله ويجي هو ياخدها على الجاهز ، انا اللى اتعبت مع فرحة وانا اللى ربيتها مش انت ولا امها ولا حتى امى

وسيم : بس مهما كان هى بنتى وانا اولى بيها

حبيبة : وانا مش هدهالك

جمال : فى ايه يا حبيبة ، وسيم بيتكلم صح دى بنته

حبيبة : لا مش بنته دى بنتى انا

(. وخدت حبيبة فرحة ودخلت اوضتها وقفلت الباب بالمفتاح .)

وسيم بصوت عالى : ده كان اتفاق بينى وبينكم ان هخدها وقت ما ظروفى تسمح

وداد : اهدى يا وسيم يا ابنى هى بس حبيبة متعلقه بـ فرحة شوية

وسيم : لو سمحتى يا طنط ادخلى هاتيلي فرحة

جمال : اهدى يا وسيم ، حبيبة قفلت على نفسها يعني مش هنعرف ناخد منها فرحة دلوقتى

وسيم : يعني ايه !! 

وداد : اطلع انت استريح وهى شوية وهتجوع او تبقي عايزة تروح الحمام وهتضطر تفتح

وسيم : ماشي

(. طلع وسيم شقته وهو متعصب جداً ، وراحت وداد لـ حبيبة .)

وداد : افتحى يا حبيبة

حبيبة : مش هـ افتح ، مش هـ اسمح لحد ياخدها منى

وداد : طيب افتحى خلينا نتفاهم

حبيبة : مفيش تفاهم ومش هـ افتح

(. يأست وداد من الكلام مع حبيبة ، فضلت حبيبة مستنيه لحد ما امها واخوها ناموا وخرجت من الاوضة دخلت الحمام وخدت اكل وشرب كفايه ليها ولـ فرحة ورجعت تانى قفلت على نفسها .)

*_____________________________________________**___________________________*

فى الامارات ....

(. وصل عبد الله وحسام البيت .)

حسام : اظن دلوقتى تقدر تفهمنى

عبد الله : وانا دلوقتى هـ افهمك لانى تعبت منك ولانى مش هـ احس بالذنب لو انت حالك اتقلب

حسام : مهما خوفتنى برضه انا مُصمم اعرف الحقيقة

عبد الله : لما وداد كلمتنى من مصر وقالتلى انك كشفت الحقيقة وشوفت شهادات الميلاد والخ الخ روحت انا لـ ازابيلا امك وقابلتها

حسام : يعني انت عارف مكانها

عبد الله : متقاطعنيش لحد ما اخلص

حسام : حاضر

عبد الله : سافرتلها وقابتلها وقولتلها ان انتوا عرفتوا انها امكم الحقيقيه

                                                                  FLASH BACK

فى لـبنـان ....

عبد الله : اذيك يا ازابيلا

ازابيلا : شو جابك بعد كل هيدي السنين يا عبد الله

عبد الله : ولادك عرفوا الحقيقه

ازابيلا : انهى حقيقه ؟

عبد الله : انك امهم

ازابيلا : وانا شو بدى اسوى

عبد الله : عايزين نتفق هنقولهم ايه وهنقولهم ليه بعدتى عنهم السنين دى كلها

ازابيلا : بس انا ما بدى اقابلهم 

عبد الله : نعم !!

ازابيلا : عبد الله ، انا غلطت معك ، وعشت ست سنين معك ، كل ما اسأل حالى ليش عيشت معك هى السنين كلها ما بلاقى جواب

عبد الله : بس الوضع مختلف ، معدش ينفع تهربى تانى

ازابيلا : انا ما بهرب ، انا قلتلك ما فيني اعيش معك ، كان بدى امسح ها السنين بكل ما فيها من حلو و سئ من ذاكرتى

عبد الله : ازابيلا ، دول ولادك حتة منك

ازابيلا : اذا قابلتن راح قولهم انى مُلحده وانك عملت الى شهادة طبيه بـ انى مُختله عقلياً

عبد الله : ماينفعش يتصدموا الصدمه دى ، احنا هنقولهم انك مسيحيه وانك متجوزه واحد مسيحي ومعدش ينفع نرجع لبعض

ازابيلا : بس انا مو مسيحيه ومو متزوجه 

عبد الله : امال ايه عايشة مع واحد من غير جواز !!

ازابيلا : هيدي شي ما بيخصك

عبد الله : انا هقولهم على حقيقتك عشان يكرهوكى بزيادة

ازابيلا : انا ما طلبت منهم يحبونى ولا بدى اقابلهم

عبد الله : انا مش فاهم ازاى فى ام قاسيه كده

ازابيلا : انا بس خلفتهم لكن ما عشت معاهم ولا ربيتهم كرمال اكون لهم ام ، انا فقط انجبت

عبد الله : مهما كان ميوصلش بيكي للدرجة دى ، بس ده عادى اذا كنتى كفرتى بـ ربنا مش هتنكرى اولادك وتكرهيهم

ازابيلا(وهى بتقوم) : عبد الله ما بدى اشوفك ولا تتصل فيني مرة ثانيه

عبد الله : سؤال قبل ما تمشى 

ازابيلا : امممم 

عبد الله : ليه رفعتى عليا قضيه تتطالبي فيها بيهم لما انتِ مش عيزاهم

ازابيلا : كرمال انتقم منك بعد الشهادة المزوره اللى عملتا ، كرمال انتقم منك ومن وداد ، وداد اللى كل ما احب رجال تاخده منى ، كرمال يعيشوا معى ويبقوا مُلحدين متلى ويكرهوك واحرق قلبك عليهم

عبد الله : انا اللى مش عايز اشوفك تانى (ومشي وسابها)

__**__**__**__

عبد الله : عرفت ليه بقي مكنتش عايزك تقابلها (بعصبيه) لانها اصلاً مكنتش هتقابلك

حسام : تقصد ايه بالشهادة المزوره

عبد الله : انا لما عرفت انها عايزة ترفع قضيه ، زورت شهادة طبيه تُفيد بـ انها مُختله عقلياً عشان متقدرش تاخدكم بس سبحان الله المحكمه رفضت تضم حضانتها لكم 

حسام : طيب وهى عرفت ازاى لما انت مستخدمتش الشهادة دى

عبد الله : انا بعتلها نسخه كـ نوع من انواع الانتقام

حسام : وايه حكاية ماما وداد انها بتاخد كل راجل تحبه ازابيلا

عبد الله : وداد كانت متجوزة قبل مانا وهى نتجوز ، جوزها الاولانى هو اول حب فى حياة ازابيلا بس مرضيش يتجوزها

حسام : بس انت خليت واحدة تقابلنى على انها هى ونكرتنى يعني نفس اللى امى كانت هتعمله انت عملته ايه الفرق بقي

(. سكت عبد الله عن الكلام شوية .)

حسام : ايه الفرق يا بابا عرفنى

عبد الله بعصبيه : كنت هتعرف انتا خلفناك من غير جواز

حسام مصدوم : ايه !!

عبد الله : ايوة ، هى دى الحقيقة اللى كنت بقاتل عشان انت متعرفهاش ، انا وازابيلا مكناش متجوزين ، كان بينا علاقه غير شرعيه حتى مكنتش بـ ورقه عرفى ، عرفت انها حامل فيك نكرت انك ابنى وبعد القضايا والفضايح كانت هى ولدتك وعملنا تحليل DNA وطلعت ابنى ، بعدها اعترفت بيك واتكتبت بـ اسمى وبعد شوية صالحتها ورجعنا لبعض وخلفنا اخواتك

حسام : يعني خلفتونى فى الحرام

عبد الله : احنا كنا صغيرين ، مكنتش عارف عواقب اللى انا بعمله

(. حسام من غير ما يتكلم ولا ينطق ، دخل اوضته وقفل على نفسه وبدأ مع نفسه يحاول يتقبل الصدمه .)

*_____________________________________________**___________________________*

بعد كام يوم ...

(. حبيبة لسه حابسه نفسها هى وفرحة وكل يوم بالليل تتسحب تعمل نفس الفعل .)

(. وسيم وجمال و وداد قاعدين مع بعض بيتناقشوا بخصوص فرحة ، خرجت عليهم حبيبة فجأة وهى شايله فرحة .)

حبيبة : الحقوا الحقونا 

كلهم : فى ايه ؟

حبيبة : فرحة مولعه نار واديتها خافض للحراره وعملت لها كمادات وبرضه حرارتها منزلتش

جمال : يالا بينا على الدكتور

(. خد جمال ووسيم فرحة وراحوا بيها على الدكتور ، ولما رجعوا خد وسيم فرحة وطلع بيها شقته وقفل عليه هو وفرحة .)

__**__**__**__

(. جمال راجع من عند دكتور الاطفال لوحده .)

حبيبة : فين فرحة ؟

وداد : حصلها حاجة ؟

جمال : لا هى كويسه الدكتور بيقول عندها سخنيه ونزله برد وبيقول هتتحسن على بالليل

حبيبة : طيب هى فين ؟

جمال : وسيم خدها وراح شقته

حبيبة : يعني ايه !! يعني خد بنتى منى !!

جمال : يا حبيبة دى بنته ومن حقه ياخدها

حبيبة : بس دى برضه بنتى ، انا تعبت فيها وربيتها اكتر ماهو وامها تعبوا فيها

وداد : اهدى يا حبيبه عشان صحتك

حبيبة بانهيار : مش هـ اهدى ومش هسكت غير لما اخد بنتى

وداد : طيب اهدى يا حبيبتى اهدى بس (وحضنتها)

حبيبة : هاتيلي فرحة يا بنتى ، رجعولى بنتى ، دى بنتى انا يا ماما

وداد : حاضر يا حبيبتى هنجيبهالك

حبيبة (بتسيب حضنها وتزعق) : متاخدنيش على قد عقلى ، لو عايزة تجيبهالى فعلاً اطلعى دلوقتى خديها من وسيم  متسيبهاش تنام بره حضنى

جمال : حاضر

حبيبة بدموع : متقلوش حاضر ، هاتوهالى دلوقتى حالاً

جمال بعصبيه : هو كن فـ يكون ، دى بنته مهما اتعلقتى بيها واتعلقت بيكي هى فى النهايه بنته

حبيبة (وهى داخله اوضتها) : دى بنتى انا ، بنتى انا

(. ودخلت حبيبة اوضتها وهى عماله تعيط ومنهاره تماماً وبدأت تكسر فى كل حاجة فى الاوضة لحد ما اغمى عليها ، خدوها وراحوا بيها المستشفى وطلع عندها انهيار عصبي حاد ، والدكتور ادالها حقنه مهدئة .)

*_____________________________________________**___________________________*

فى بيت وداد ...

(. وداد كانت بتكلم عبد الله .)

وداد : ليه قولتله يا عبد الله

عبد الله : انتِ مش قولتيلي قوله الحقيقة

وداد : مكنتش اعرف انها صادمه كده

عبد الله : يستاهل انا حذرته كتير وقولتله يبطل نخورة ، المهم حبيبة عامله ايه

وداد : حالتها صعبه اوى بعد ما وسيم خد فرحة

عبد الله : هى عندها حق وهو عنده حق

وداد : انا كنت بقول وسيم يتجوز حبيبة

عبد الله : نعم !!

وداد : ايوة هى بتحب فرحه ومتعلقه بيها وهو مسيره يتجوز

عبد الله : بس اكيد هـ يتجوز واحدة بيحبها وهيبقي عايز يخلف اخوات لـ فرحة

وداد : مين قال اصلاً انه هـ يحب بعد رواء 

عبد الله : ايوة صح طالما مش هيحب بعد رواء نجوزه حبيبة ، ويعيشوا فى تعاسه ابديه هما الاتنين

وداد : انا بقول رأيي انت حر فى بنتك

عبد الله : بنتنا يا هانم ، اسمها بنتنا ، انتِ كلامك منطقى وصح بس ازاى وسيم ممكن يتجوزها

وداد : احنا نقوله من ورا حبيبة

عبد الله : لا طبعاً انسى انا مش هرخص بنتى للدرجة دى حتى لو ماتجوزتش عمرها كله

وداد : انا بفكر فى مصلحتها

عبد الله : وانا بفكر فى كرامتها

(. قعدوا يتكلموا فى مواضيع متفرقه لحد ما قفلوا .)

*_____________________________________________**___________________________*

بعد مرور شهر ....

- وسيم اختفى من الشقة تماماً هو وفرحة ومحدش عارف هما فين 

- حبيبة جالها اكتئاب حاد بسبب بُعد فرحة وبقت بتاخد مهدئات ومنوم

- علاقة الياس وحبيبة متوترة بسبب اكتئاب حبيبة

- حسام بدأ يتعايش مع الحقيقة بس لسه واخد موققف من ابوه

*_____________________________________________**___________________________*

فى احدى الكافيهات ...

الياس : وحشتيني اوى يا حبيبة

حبيبة : وانت كمان

الياس : انتِ هتفضلى فى الحالة دى كتير

حبيبة : لحد ما فرحة ترجعلى

الياس : ايه السواد اللى تحت عينك ده

حبيبة : ارهاق وقلة نوم

الياس : هو انتوا مش عارفين وسيم وفرحه راحوا فين

حبيبة : اختفوا خالص

الياس : مش يمكن راح عند اهله

حبيبة : ماحنا منعرفش اهله

الياس : ازاى يعني 

حبيبة : وسيم كان مقاطع اهله والخطوبه تمت بسرعه والجواز بعدها على طول ، عمرنا ما زورنا اهله ولا حتى رواء زارتهم

الياس : غريبة دى اشمعنى قرر يصالحهم دلوقتى

حبيبة : عشان يحرق قلبي على فرحة

الياس : انتِ برضه اتعلقتى بيها زياده عن اللزوم

حبيبة : وهى كمان اتعلقت بيا ، دى اول كلمه نطقتها بيبه وكانت بتقولى ماما

الياس : معلش ربنا يعوضك

حبيبة : فيها ايه لو كان وسيم سابهالى ماهو ممكن يتجوز تانى ويخلف غيرها لكن انا .....

الياس يقاطعها : انتِ كمان هتتجوزى

حبيبه بعصبيه : بس عمرى ما هخلف

الياس : هنتبنى طفل او اتنين يا ستى

حبيبة : انت ازاى لسه بتحبنى وعايز تتجوزنى

الياس (بيمسك ايدها) : والله العظيم بحبك ومش عايز حاجة من الدنيا غيرك

حبيبة : وانا كمان بحبك اوى

الياس : متبعديش عنى تانى بقي

حبيبة : حاضر

الياس : وعد يا حبيبتى

حبيبة : وعد يا حبيبي

*_____________________________________________**___________________________*

فى مستشفى دكتور عبد الوهاب ...

(. وداد دخلت على حبيبة لقيتها مغمى عليها خدوها وراحوا بيها المستشفى ، كشف عليها عبد الوهاب وخرج ووشه باين عليه القلق والتوتر .)

وداد : حبيبه مالها ؟

عبد الوهاب : هتبقي كويسة ان شاء الله

وداد : فى ايه يا عبد الوهاب ؟ ايه اللى حصل

عبد الوهاب : ................

اشوفكم الحلقة الجاية

ارجو التقييم بـ كومنت

*_____________________________________________**___________________________*

بـ قلمى / آلاء الشريفى

(. لو حد عايز ينقل القصة يراسلنى على رسايل صفحة الفيس بوك .)

www.facebook.com/sh5abyt.bnoota

sh5abytalaa.blogspot.com