الحلقة الرابعة عشر
فى بيت رواء ....
(. حبيبة كانت عند رواء ، رواء سابت معاها فرحة ودخلت تاخد دش ، خرجت رواء من الحمام لقيت حبيبة شايله فرحة وبتغنيلها .)
رواء باستغراب وقلق : حبيبة
حبيبة : ايوة
رواء : انتِ بتعملى ايه كده ؟
حبيبة : بادى فرحة الببرونه
رواء باستغراب : وانتِ ليه حطاها فى هدومك كده
حبيبة : عشان تفضل دافيه وعشان فرحة تحس انها بترضع طبيعي وتبقي قريبة من قلبى
رواء : ياااه ، ده انا مبعملش كده
حبيبة : عادى دى فكرة جت فى بالى
رواء : تسلميلي يارب
حبيبة : رواء تعالى شيلي فرحة
رواء : فى ايه يا حبيبة انتِ كويسة !!
حبيبة : خديها بس يا رواء
(. خدت رواء فرحة وقامت حبيبة وهى ماسكه بطنها .)
رواء : مالك يا بنتى فيكي ايه ؟
حبيبة : بطنى وجعانى اوى ، الم فظيع
رواء : طيب اجبلك مسكن
حبيبة : خليكي انتِ مع فرحة انا هطلع اكلم عمو عبد الوهاب
رواء : طيب ابقي طمنيني
(. خرجت حبيبة من عند رواء وهى بتبكى من شدة الالم وطلعت شقتهم واتصلت وداد بـ عبد الوهاب وطلعوا على المستشفى .)
*_____________________________________________**___________________________*
فى جامعة جمال ...
(. كانت السنة الدراسيه الجديدة بدأت وجمال مش من عادته الانتظام من اول السنة ولكنه راح عشان يشوف هايدي ، هايدي كانت خارجة من مبنى كليتها وجمال وقفها .)
جمال : اذيك يا هايدي
هايدي : كويسة الحمد لله
جمال : عملتى ايه السنة اللى فاتت
هايدي : نجحت وانت ؟
جمال : نجحت برضه الحمد لله
هايدي : طيب كويس
جمال : ممكن نقعد نتكلم شوية
هايدي : لا معلش معنديش وقت
جمال : مش هاخد من وقتك كتير
هايدي : هو فى حاجة مهمه ؟
جمال : اه عايز نتكلم شوية
هايدي : معدش فيه حاجة نتكلم فيها
جمال : بتهيألى فى حاجات كتير اوى لازم نتكلم فيها
هايدي : بس انا مش .........
جمال يقاطعها : هما عشر دقايق هنقول كلمتين لو مش عجبوكى كأنك مسمعتيهمش
هايدي : اوكى
(. ورااحوا قعدوا فى كافتريا الكلية .)
هايدي : ما تتكلم يا جمال بقالنا كتير قاعدين وانت ساكت
جمال : بصى يا هايدي ، انا جايز مكنش حبيتك زى مانتِ متخيلة بس انتِ اكتر بنت اعرفها واتعلق بيها كده وبرضه انضف بنت قابلتها
هايدي : so
جمال : انا عايز نبدأ صفحة جديدة يا هايدي ، انا هبقي انسان تانى خالص
هايدي : انسان تانى ازاى ؟
جمال : هـ اهتم بيكي وهـ احبك فعلاً ومش هعرف حد غيرك ومش هيحصل بينا اى حاجة من اللى كانت بتضايقك
هايدي : طيب هو انا هـ اقدر اثق فيك تانى ازاى ؟
جمال : مش عارف بس خلي الايام تثبتلك
هايدي : مانا برضه خليت الايام تثبتلى قبل كده وفعلاً ثبتتلى حاجات كتير
جمال : انا بقول نفتح صفحة جديدة
هايدي : الكشكول خلص يا جمال
جمال : كشكول ايه بس !! احنا لسه صغيرين ولسه بنبدأ حياتنا
هايدي : بص يا جمال ، انا حبيتك اه ، اتعلقت بيك جداً ماشى لكن معنديش استعداد اعيش نفس التجربه مع نفس الشخص مرة تانيه والا هبقي غبية
جمال : بقولك هبقي انسان جديد ، يعني حياة جديدة واسلوب جديد
هايدي (وهي بتقوم) : خلي الانسان الجديد والحياة الجديدة مع واحدة جديدة انا منفعش
جمال : يا هايدي انا بحبك
هايدي : عن اذنك (ومشيت)
جمال بعصبية : يوووووووه بقي
*_____________________________________________**___________________________*
فى المستشفى ...
(. دكتور النساء كشف على حبيبة وادالها مسكن عشان الالم اللى عندها ، حبيبة كانت على سريرها وامها وعمها والدكتور عادل واقفين مع بعض فى استقبال الجناح بتاعها بيتكلموا سوا .)
عبد الوهاب : هاا يا دكتور عادل مالها حبيبة
عادل : الرحم اتحرك تانى
وداد : يعني هتعمل تثبيت تانى ؟
عادل : الرحم موقعش بـ التدريج زى ما حصل قبل كده
عبد الوهاب : امال ايه اللى حصل ؟
عادل : الرحم وقع مرة واحدة فى الحوض
عبد الوهاب : طيب والاربطه ؟
عادل : للاسف بقت اضعف من الاول
عبد الوهاب : والحل
عادل : مفيش حل
عبد الوهاب : يعني ......... (وسكت)
عادل : لازم الرحم يتشال
وداد بحسرة : يالهوى !! يا حبيبتى يا بنتى
عبد الوهاب : لا يا عادل اعملها اى حاجة لحد ما تتجوز وتخلف
عادل : حتى لو ثبته تانى لحد ما اتجوزت الرحم مش هيشيل جنين ، الاربطة ضعيفة جداً يا عبد الوهاب وانت شوفتها بنفسك
وداد بدموع : بس كده مستقبل البنت هيضيع
عادل : مستقبلها ولا حياتها عموماً !! وبعدين مين قال ان المستقبل فى الخلفة مافى ناس عمرها ما خلفت خالص وعايشة كويسة
عبد الوهاب : بس البنت هتبقي فى سن اليأس وهى لسه ١٩ سنه
عادل : دكتور عبد الوهاب ، انا اللى شايفه انا الرحم لازم يتشال ولو عايزينى اعملها عملية تثبيت تانى انا معنديش مانع بس انا مش مسئول عن اى حاجة ممكن تحصل
عبد الوهاب : تمام
عادل : عن اذنكم انا (ومشي)
وداد بدموع : يعني خلاص كده مفيش حل تانى !! في بنت عندها ١٩ سنه وتشيل الرحم
عبد الوهاب : وطى صوتك يا وداد لـ البنت تسمعك
وداد : انا مش عيزاها تعرف حاجة ، مش عيزاها تعرف انها هتشيل الرحم
عبد الوهاب : يعني مش هنعملها العملية
وداد : لا نعملها بس من وراها
عبد الوهاب : ازاى يا وداد يعني ؟
وداد : هنقولها انها لازم تعمل عملية تثبيت ونشيل الرحم بس كده
عبد الوهاب : مينفعش لازم تعرف وتبقي موافقه لان دى حاجة مش سهله فوق ده كله فى تغيرات فى جسمها هتحصل وهى بحكم انوثتها اولاً دراستها ثانياً هتكتشفها بسهوله
وداد : انا مش عارفه اعمل ايه ، ربى لا اسألك رد القضاء ولكنى اسألك اللطف فيه
عبد الوهاب : اهدى يا وداد ان شاء الله خير ، ادخليلها بقي عشان متحسش بحاجة وحاولى تمهدى لها حوار العمليه
وداد : يعني هى اكيد هتعملها
عبد الوهاب : لازم تعملها يا وداد
وداد : الطف بينا وبيها يارب
(. مشي عبد الوهاب ودخلت وداد عند حبيبة .)
وداد : اخبارك ايه دلوقتى يا حبيبتى
حبيبة : الحمد لله يا ماما
وداد : تستاهلى الحمد ، ربنا يشفيكي يارب
حبيبة : هو عمو عبد الوهاب فين
وداد : فى مكتبه
حبيبة : ممكن تندهيهولى
وداد : حاضر
(. ومسكت وداد سماعة التليفون اللى فى المستشفى لقيته مش شغال .)
وداد : غريبة دى ازاى مفهوش حرارة هروحله المكتب بقي
حبيبة : ماشى
(. خرجت وداد من الجناح اللى حبيبة فيه وبعد ما مشيت شوية قالت لـ واحدة من الممرضات تروح لـ عبد الوهاب تناديه وهى نزلت كافتريا المستشفى تجيب لنفسها شاى ، بعد ما وداد جت وعبد الوهاب جه دخلوا الجناح .)
عبد الوهاب : هي فين حبيبة !!
وداد : انا سيبتها هنا
عبد الوهاب : يمكن فى الحمام
وداد (بتبص فيه) : يالهوى دى مش هنا
(. عبد الوهاب بيبص يلاقي التليفون حرارته مفصوله وبكده فهم ان حبيبة فصلته عشان امها تضطر تخرج وهى تعرف تهرب .)
عبد الوهاب : حبيبة هربت
وداد : يا مصيبتي هربت
عبد الوهاب : ايوة اكيد سمعتنا واحنا بنتكلم عن العمليه عشان كده هربت
وداد : استرها معانا يارب
(. بلغ عبد الوهاب كل اللى فى المستشفى عشان يدوروا على حبيبة محدش لقاها وكلهم قالوا انهم مشافوهاش خالص ، اتصلت وداد بـ رواء وجمال و مارى وكلهم قالوا ان محدش شافها ، وقرر عبد الوهاب انه يبلغ البوليس لو مظهرتش على بالليل .)
*_____________________________________________**___________________________*
فى الامارات ....
(. راح حسام المركز الطبي للاسنان على معاده مع المدير الطبي للمركز .)
حسام : الدكتورة ازابيلا رجعت من الاجازة
المدير : اه
حسام : اقدر اشوفها
المدير : اكيد ، ثوانى
(. بعد شوية جت الدكتورة ازابيلا .)
ازابيلا : مسا الخير دكتور شو فيه
المدير : الاستاذ بيسأل على حضرتك
ازابيلا : اهلين ، مين انت ؟
حسام : انتِ ازابيلا جورج الترك
ازابيلا : ايه(ايوة) انا ، ممكن اعرف مين حضرتك
(. حسام بيطلع صورة من شهادة ميلاده وبيوريها لـ ازابيلا .)
ازابيلا : شو هيدا
حسام : انا حسام ، ابنك
ازابيلا : شو !! ابني
حسام : ايوة ابنك
ازابيلا : ابنى كيف
حسام : انا حسام عبد الله الحديدي
ازابيلا : انا ما الى اولاد كيف انت ابني
حسام بعصبية : امال مين اللى اسمها مكتوب فى شهادة ميلادى ، انتِ ولا مش انتِ
ازابيلا : ايه اسمى بس انا ما اتزوجت من هذا الشخص ولا خلفت منه وممكن يكون تشابه اسماء
حسام : ممكن صورة لحضرتك
ازابيلا : صورة !! ليش
حسام : معلش عايز اشوف انتِ اللى بابا يقصدها ولا لا
ازابيلا : اوكى ، فيك تصورنى
(. طلع حسام موبايله وصورها .)
ازابيلا : هلأ ارتحت !! فيني امشى دكتور
المدير : حضرتك لسه عايزها
حسام : لا شكراً واسف على الازعاج
(. وخرج حسام من المستشفى وهو مصدوم ومذهول ونفسه انه يطلع تشابه اسماء ومتطلعش هى امه .)
*_____________________________________________**___________________________*
بالليل فى احدى الكافيهات (فى المنصورة) ....
(. الياس بيكلم حبيبة فى الموبايل .)
الياس : يا حبيبة اسمعى الكلام لازم ترجعى مينفعش تقلقيهم كده
حبيبة بدموع : لو رجعت هيشيلوا الرحم ، هيشيلوا الرحم يا الياس
الياس : يا حبيبتي اكيد ده افيدلك
حبيبة بعصبية : يعني ايه افيدلى ، قولى يعني ايه يتحكم عليا بالموت وانا لسه عايشة
الياس : ده قدر ربنا هتعترضى عليه يعني
حبيبة : انا ليه بيحصل فيا كده !! انا معملتش حاجة استاهل عليها كل ده
الياس : استغفرى ربنا يا حبيبة مينفعش الكلام ده
حبيبة بدموع : استغفر الله العظيم ، استغفر الله العظيم يارب
الياس : حبيبتي لازم ترجعى واكيد محدش هيخليكي تعملي العمليه غصب عنك
حبيبة : كانوا عايزين يعملوها من ورايا
الياس : انتِ فين دلوقتى يا حبيبة
حبيبة : مستخبيه
الياس : ايوة يعني فين او عند مين ؟
حبيبة : مش مهم تعرف
الياس : يعني ايه مش مهم اعرف انتِ اتجننتي ولا ايه
حبيبة : اه اتجننت
الياس : طيب يا حبيبتي على الاقل اتصلى بيهم طمنيهم عليكي
حبيبة (بتاخده على قد عقله) : طيب ماشى
الياس : كلميهم وبعدين كلميني
حبيبة : حاضر (وقفلوا)
(. الياس كان قاعد مع سعيد فى الكافيه ، سعيد نزل المنصورة يقعد يومين تلاته مع الياس ويغيروا جو .)
سعيد : فى ايه مالها حبيبة ؟
الياس : هربانه من اهلها
سعيد باستغراب : هربانه !! جديدة دى
الياس : لازم تعمل عمليه خطيره جداً وهى مش عايزة تعملها فـ هربت عشان ميعملوهاش من وراها
سعيد : يا ساتر يارب ، عمليه ايه دى ؟
الياس : هتشيل الرحم
سعيد : رحم !! رحم ايه دى عندها ١٨ سنه تقريباً
الياس : عندها مرض بيجى لبنت من بين مليون بنت كانت بتاخد علاج ومجبش نتيجه واضطرت تشيل الرحم
سعيد : طيب وانت هتسيبها ولا هتكمل معاها
الياس : والله مانا عارف انا بحاول احسسها انى بحبها وعايزها تحت اى ظرف وان موضوع الخلفه ده مش فارق معايا
سعيد : كده صح عشان ده يحسن من نفسيتها
الياس : مانا فاهم ، المهم دلوقتى تقوم بالسلامه وتبقي كويسة ، اى حاجة تانيه تجي بعدين
سعيد : ربنا يشفيها يارب ويقومها بالسلامه
*_____________________________________________**___________________________*
تانى يوم فى بيت رواء ....
(. رواء كانت بتنيم بنتها ، الجرس ضرب فـ فتحت لقيته جمال .)
جمال : اذيك يا رواء
رواء : الحمد لله يا جمال
جمال : ماما بتقولك مش محتاجه حاجة
رواء : لا الحمد لله ، مفيش اخبار عن حبيبة
جمال : احنا بلغنا بس لسه موصلوش لها
رواء انا هموت من القلق عليها
جمال : ان شاء الله خير
رواء : طيب تعالى شوية
جمال : انا عايز اشوف فرحة ممكن ؟
رواء : اه طبعاً ممكن ، دى بنت اختك ياد انت
(. دخل جمال شاف فرحة ، كانت مستغرقه فى نوم عميق ، شالها وخدها فى حضنه وضمها اوى ، وبعدين ملس على خدها وايدها وباسها فى جبينها .)
جمال : نسخه منك ، زى القمر
رواء : تسلم يا جيمي ، شد حيلك واتجوز وخلف احسن منها
جمال : هو فى حد فى الدنيا ممكن يخلف زيها
رواء : يا سلام !! وفى احلى منها كمان انت بس اللى بتحبها بزياده
جمال بيضمها اكتر : والله بحبها اوى
رواء : مالك يا جمال انت كويس ؟
جمال : اه بس مخنوق شوية بسبب حوار حبيبة
رواء : ربنا يرجعها بالسلامه ، والله انا منمتش طول الليل عماله اصلى وادعيلها
جمال : ربنا يرجعها بالسلامه ان شاء الله ، هطلع بقي عشان ماسبش ماما لوحدها
رواء : طيب وانا اول ما فرحه تصحى هجيبها واجى
جمال : كلميني عشان اجى اشيلهالك
رواء : ماشى يا جيمي
جمال : هو وسيم جاى امتى ؟
رواء : بعد بكرة ليه ؟
جمال : لا عادى
رواء : عادى برضه ولا عشان تختفى
جمال : اختفي !! قصدك ايه ؟
رواء : اصل انت اول ما وسيم بيجي مش بشوفك خالص
جمال : عشان يعنى بيغير عليكي وكده وبرضه عشان اكيد لو محتاجه حاجة وسيم هيعملهالك
رواء : ايه يغير دى ، احنا اخوات يا ابنى
جمال : ااه اخوات ، يالا مش عايزة حاجة
رواء : لا سلامتك سلم على ماما
جمال : الله يسلمك
*_____________________________________________**___________________________*
فى بيت الياس .....
الياس : انا هموت من القلق عليها
سعيد : برضه موبايلها لسه مقفول
الياس : اه وده معناه انها مرجعتش البيت وانا معرفش مكانها ومحدش فيهم عارف مكانها
سعيد : اهدى يا الياس ان شاء الله هتبقي كويسة
الياس : مكنتش اعرف انى بحبها كده يا سعيد
سعيد : ربنا يطمنك عليها ان شاء الله هترجع بالسلامه
الياس : يارب
(. قعد الياس وسعيد يلعبوا بلايستيشن وقطع لعبهم رساله وصلت لـ موبايل الياس )
الياس : يارب تبقي هى
سعيد : يارب خير
الياس بيقرأ >> انا مش هرجع لهم ولا هرجعلك ولا عيزاهم ولا عيزاك ، وحتى لو رجعت مش هعمل العملية الا لما اتجوز واخلف ومش هتجوزك ومش عايزة اتجوزك
الياس لـ سعيد >> ايه المسج العجيبة دى ، انا مش فاهم حاجة
سعيد : بص يا معلم تقريباً كده والله اعلم ان حبيبة جاتلها صدمه نفسيه بسبب حوار العملية ده خصوصاً انها لسه صغيره وهتشيل الرحم وكده فـ هى تقريباً برضه مش عارفه بتعمل ايه ولا بتقول ايه وشكلها كده خدت موقف من الكل
الياس : بنت المجنونه ، مش مهم انا بس ترجع لاهلها
سعيد : لما تبدأ تتقبل الوضع هترجع لاهلها
(. هنا الباب خبط وكانت احلام جايبة لهم نسكافيه .)
احلام لـ الياس : النسكافيه
الياس : شكراً يا ماما
احلام : مين دى اللى هتشيل الرحم ؟
الياس : انتِ بتتجسسى عليا يا ماما
احلام : سمعتكوا بالصدفة ، بتحب واحدة هتشيل الرحم ، عايز تقطع خلفك بايدك
الياس : انتِ شيفانى اتجوزتها
احلام : بس بتحبها وعايز تتجوزها
الياس : مش وقته الكلام ده يا ماما ممكن
احلام : ماشي يا الياس بس خد بالك الجوازه دى على جثتى
(. ومشيت ودخل هو لـ سعيد .)
الياس : يوووووه
سعيد : فى ايه ؟
الياس : امى سمعتنى وعرفت بـ حوار حبيبة
سعيد : حوار ايه ، العمليه !!
الياس : ايوة واكيد هتقول لـ ابويا وبكده الموضوع هيكبر ومش هيوافقوا على اى واحدة اختارها سواء حبيبة او غيرها
سعيد : متسبقش الاحداث ان شاء الله خير
الياس : ربنا يهديكي يا حبيبة
*_____________________________________________**___________________________*
فى الامارات ....
(. عبد الله قاعد حزين ومهموم جداً بسبب اختفاء حبيبة ، وقرر ميقولش لـ حسام عشام ميقلقوش هو كمان ، حسام كان راجع من شغله .)
حسام : سلام عليكم
عبد الله : وعليكم السلام
حسام : بابا كنت عايز اوريك حاجة
عبد الله : حبيبة اختك مش كلمتك
حسام : لا ليه ؟
عبد الله : عادى ، انت كنت عايز توريني ايه ؟
حسام : تقدر تعرف الصورة دى بتاعة مين (واداله الموبايل)
عبد الله بقلق : انت جبت الصورة دى منين ؟
حسام : جبتها وخلاص ، مين دى يا بابا !!
عبد الله : ......................
اشوفكم الحلقة الجاية
ارجو التقييم بـ كومنت
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
www.facebook.com/sh5abyt.bnoota
sh5abytalaa.blogspot.com
0 التعليقات :
إرسال تعليق