الحلقة التاسعه
فى اوضة حبيبة ....
(. حبيبة كانت نايمه وطلبت من امها تصحيها الفجر عشان تذاكر شوية .)
وداد : حبيبة ، قومي يا حبيبتي يالا الساعه خمسه
حبيبة : سبيني كمان شوية
وداد : قومى يالا (وشالت البطانيه)
حبيبة : يوووووه يا ماما سبيني
وداد (بتطبق البطانيه) : ايه ده يا حبيبة ؟
حبيبة : فى ايه يا ماما ؟
وداد : انتِ مش شايفة يا بنت ولا ايه ؟
حبيبة : اه دى ادوية بتاعتى
وداد : ادويه ايه !! دى كتير جداً
حبيبة (بتقوم وبتاخدهم من ايد وداد) : كنت بذاكر عليهم
وداد بحزم : حبيبة ايه الادوية دى ؟
حبيبة : قولتلك بذاكر عليهم
(. طلعت وداد الادوية وقرأت اسمائهم ، فيهم ادويه عرفتهم من الاسم وادوية تانيه عرفت بتوع ايه من النشره المرفقة معاه .)
وداد بقلق : انتِ بتاخدى الادوية دى ؟
حبيبة بزهق : اه ارتحتى كده !!
وداد : بتاخديها ليه
حبيبة : تعبانه شوية
وداد : تعبانه مالك ؟ وبتاخدى الادويه دى من نفسك ولا مين كتبهالك ؟
حبيبة : عمو عبد الوهاب هو اللى كتبهالى
وداد : ليه !! فهميني مالك
حبيبة : حكت لـ وداد كل ظروف تعبها من اول المروڤين لحد اخر مرة الجرعه زادت فيها
وداد(بتتحكم فى دموعها وتاخد حبيبة فى حضنها) : الف سلامه عليكي يا حبيبتي ان شاء الله العلاج يجيب نتيجه
حبيبة : ان شاء الله ، انا هدخل الحمام
(. دخلت حبيبة الحمام وراحت وداد اوضتها وقفلت على نفسها وانهارت من الزعل والعياط على حبيبة .)
وداد لنفسها >> يا حبيبتى يا بنتى ، يارب اشفيها وابعد عنها كل سوء ، يارب ارعاها واحفظها واتم شفاها على خير وفرحنى بيها وبذريتها الصالحه يااااارب
*_____________________________________________**___________________________*
الصبح فى عيادة دكتور عبد الوهاب ...
(. وداد فضلت صاحيه من بعد الفجر ومعرفتش تنام ولا تهدى الا لما الصبح جه ونزلت راحت لـ عم حبيبة .)
وداد : انا عرفت كل حاجة خاصة بـ ظروف حبيبة الصحية
عبد الوهاب : ليه قالتلكم بس انا قولتلها متقولش عشان متقلقوش
وداد : انا عرفت بالصدفة وهى اضطرت تحكيلي
عبد الوهاب : طيب وانتِ قلقانى كده ليه ؟
وداد : انت مش عايزنى اقلق
عبد الوهاب ؛ لا مش عايزك تقلقي لان حبيبه مفيش عليها خطوره
وداد : وافرض حالتها اتأخرت واضطرينا نشيل الرحم
عبد الوهاب : يا ام حسام ، اى انثي عندها مشاكل فى الرحم او المبيضين بنحاول معاها كتير جداً حتى لو المحاولات طولت او فشلت او خدت وقت كبير او كلفتنا وقت ومجهود وفلوس لازم نحاول ومنلجأش لـ استئصال الرحم الا بعد ما نفقد الامل تماماً او ان المريضه تطلب كده ، ده بنعمله مع الست اللى اتجوزت وخلفت ما بالك بقي بنوته صغيره لسه حياتها مبدأتش هنتصرف معاها ازاى
وداد : يعني فى امل ؟
عبد الوهاب : ايوة طبعاً احنا بنحاول بالعلاج ولو مجبش نتيجه هنعمل لها عمليه تثبيت للرحم
وداد : يعني لما تتجوز ان شاء الله هتخلف ؟
عبد الوهاب : بس متقعدهاش جنبكم عشر سنين وتقولى هتخلف ولا لا
وداد : يعني المفروض تتجوز بسرعه ؟
عبد الوهاب : مش قصدى كده ، قصدى متتأخرش فى الجواز لان مش عارفين كمان ست سنين هيبقي الوضع عامل ازاى حتى لو اتحسنت
وداد : ابوس ايدك يا عبد الوهاب اعمل اى حاجة بس متشلش الرحم قبل ما حبيبة تخلف لها عيل واحد حتى
عبد الوهاب : انتِ بتوصيني على بنتى يا وداد
وداد : سؤال اخير
عبد الوهاب : خدى راحتك
وداد : هى محتاجه تسافر تتعالج بره ؟
عبد الوهاب : وداد ، حبيبة دى بنت اخويا توأمى يعني بنتى وانا لو حسيت انها محتاجه اى حاجة هعملهالها على طول حتى لو كانت محتاجه عنيا
وداد : ربنا يخليك لينا وليها يارب
عبد الوهاب : عبد الله عرف حاجة ؟
وداد : لا لسه مقولتلوش
عبد الوهاب : وياريت ميعرفش الحالة مش خطيرة بلاش نقلقه
وداد : حاضر ، هستأذن آنا مش عايز منى حاجة
عبد الوهاب : سلميلي على الولاد
وداد : الله يسلمك (ومشيت)
*_____________________________________________**___________________________*
بعد مرور اسبوعين ...
فى جامعه جمال ...
(. جمال راح لـ هايدي الكافتريا .)
جمال (بيسحب كرسي ويقعد) : وحشتيني
هايدي : ثانكس
جمال : ثانكس !! تبقي لسه زعلانه
هايدي : وانا ازعل ليه !! انت معملتش حاجة تزعل
جمال : خلاص بقي يا هايدي حقك عليا
هايدي : ماليش حق عندك اصلاً
جمال : طيب بذمتك موحشتكيش
هايدي : جمال انت عايز ايه ؟
جمال : بقولك وحشتيني
هايدي : انا اللى وحشتك ولا وحشتك البنت الهادية المطيعه اللى مش بتقولك لا ابداً
جمال : وطى صوتك يا هبله احنا فى الجامعه
هايدى : لا والله دلوقتى بقيت عارف احنا فين وبنعمل ايه ؟
جمال : انتِ عامله الخناقه دى كلها عشان ايه !! عشان مبنخرجش
هايدي : مثلاً
جمال : يا بنتى قولتلك بخاف حد يتكلم عليكي
هايدي : ولما بتركن العربيه قبل الجامعه بـ شارعين وتعمل ما بدالك مبتخفش عليا !!
(. اتصدم جمال من كلام هايدي لانها اثبتتله ان كلام مش راكب على بعضه .)
جمال : دى حاجة ودى ..........
هايدي تقاطعه : دى ملهاش الا تفسير واحد ، انك عارفنى هنا عشان تتسلي فى الجامعه ، عشان لما يهفك للمزاج لـ الصياعه تلاقنى اللى تصيع معاها فى نطاق الجامعه لكن نخرج سوا لا مينفعش عشان فى واحدة غيري بتاعه الخروج ولكل مكان بنت شكل
جمال : انتِ دماغك سافرت منك
هايدي : لو سمحت يا جمال انا مش عايزة اشوفك تانى ، وانت يا سيدي مش مُلزم قدامى بـ اى حاجة
جمال : واللى حصل ما بينا ؟
هايدي : اللى حصل ما بينا حصل مع كل واحدة انت عرفتها وانت مضربتنيش على ايدي انا هتحمل نتيجه غلطي(ومشيت)
جمال(بيوقفها) : يا هايدي استنى بس افهمك حاجة
هايدي بدموع محبوسه : مش عايزة اشوفك تانى يا جمال لو سمحت
(. مشيت هايدي وجه صديق لـ جمال كان قاعد بعيد وسامع الحوار .)
الصديق : هو ايه اللى حصل بينكم بالظبط ؟
جمال : انت بتتجسس عليا ؟
الصديق : لا والله سمعت الحوار بالصدفه
جمال : محصلش الا العادى يعني
الصديق : اللى هو ايه يعني ؟
جمال : ايه يا عم فى ايه !! شوية بوس على احضان استريحت كده
الصديق : هاهاهاها وهى عامله الليله دى كلها عشان مبتخرجوش سوا ، بنات منحله صحيح
جمال : منحلة !! هى من دى اللى منحله ؟
الصديق : هايدي والبنات اللى من عينتها
جمال : على فكرة مش بدافع عنها ولا حاجة بس بقول كلمه الحق
الصديق : اللى هى ايه ؟
جمال : هايدي دى من انضف البنات اللى الواحد عرفهم ، وهى فعلاً مكدبتش لما قالت انى اول حب فى حياتها او اول واحد يلمسها
الصديق : وانت بسلامتك بقي ضربت الودع وعرفت كل ده
جمال : اظن احنا بقينا مخضرمين وعارفين الفرق بين البنت اللى دايسه ومقضياها والبنت اللى اول مرة تعمل كده
الصديق : فكك يا شقيق من الحوارات الفكسانه دى ، البنت الصح مبتعملش الغلط حتى لو كانت السكينه على رقبتها ، واللى بتعمل الغلط مرة بتعمله مليون مرة عندك هايدي مثلاً ممكن فعلاً تكون انت اول شخص تعمل معاه كده بس انتوا هتسيبوا بعض وهى هتتجرح فـ هتبقي عايزة تنسي فـ هتحب تانى وتغلط تانى وتفضل جوه الدايره دى ونادراً بقي لما بنت تفوق لـ نفسها وتقفل على قلبها لحد ما تختار صح
جمال : بس احنا اوساخ برضه ، البنت مهما كانت منحله عمرها ما تتجرأ على شاب الا اذا لعب فى دماغها
الصديق : انا مقولتش ان احنا ملايكه بس انت عارف كويس اوى ان فى بنات هى اللى بتضحك على الولاد
جمال : ايه حصة الفلسفة دى !! معاك حشيش
الصديق : اييوووه كده يا شق بلا هايدي بلا بتاع
جمال : تعالى بقي نقعد فى العربيه
*_____________________________________________**___________________________*
فى الامارات ....
حسام : بابا عايز اقول لحضرتك حاجة
عبد الله : اتفضل
حسام : انا قربت الاقى امى
عبد الله : طيب كويس وهتعمل ايه
حسام : يعنى ايه هعمل ايه ؟
عبد الله : يعني هتروح تعيش معاها ولا ايه !! ماهى اكيد مش هتجى تعيش معانا
حسام : لسه مش عارف
عبد الله بقلق : يعني انت ممكن تسيبنا وتروح تعيش معاها
حسام : مش عارف انا بس قولت اقول لحضرتك انى قربت اوصلها
عبد الله : ماشى
حسام : افرض حبت ترجعلك
عبد الله : استحاله طبعاً
حسام : ماهى هتكون اسلمت
عبد الله : عمر ده ما كان سبب الاذمه بس وداد اللى ضيعت عمرها عليا وعليكوا ، وداد اللى كانت دكتوره اسنان مفيش اشطر منها وقعدت فى البيت تخدمنى وتخدمكم متستاهلش انى اتجوز عليها
حسام : بس دى مراتك الاولانيه وامنا
عبد الله : كانت مراتى دلوقتى متستاهلنيش ولا حتى تستاهلكوا بس انتوا احرار لكن انا مش متجوز الا وداد ومش عايز غيرها
حسام : بس وداد دى مش امى ؟
عبد الله : انت اصلاً متستاهلش وداد تبقي امك ، روح لـ امك الحقيقية وابقي ارفع راسك فوق اوووى يا حسام ، قول للناس ولـ نسايبك انا امى ست ملحده زانيه خاطيه
حسام : بس امى مش مُلحده ولا زانيه ولا خاطيه
عبد الله : خليك عايش فى اوهامك دى كتير ، كدبنى انا وصدق نفسك او كدبنى وصدقها
حسام : بابا انت معندكش دليل واحد يؤكد كلامك يبقي اصدق ازاى
عبد الله : وانا قولتلك معنديش ادله ، عايز تصدق صدق مش عايز انت حر
(. ومشى كام خطوة ورجع تانى .)
عبد الله : لو كان عندى سر مش عايز حد يعرفه كنت زورت شهادات ميلادكوا وكتبتها بـ اسم وداد بس هى مرضيتش (ومشي)
حسام لنفسه >> ياريته سر يا بابا دى اسرار
*_____________________________________________**___________________________*
بالليل فى اوضه حبيبة ...
(. حبيبة بـ تتصل بـ الياس بقالها ساعتين مبيردش وبعد اتصالات كتير رد عليها الياس .)
الياس : ايه يا حبيبة كل دى اتصالات
حبيبة : قلقت عليك ، انت مكنتش بترد ليه ؟
الياس : اكيد لا نايم لا ميت (احمد حلمى ستايل :D )
حبيبة : بعد الشر عليك يا حبيبي
الياس : انتِ بتعملى ايه كده ؟
حبيبة : كنت بذاكر ، انت وحشتنى اوى على فكرة
الياس : وانتِ كمان ، اه صحيح كنت عايزة اقولك على حاجة
حبيبة : خير
الياس : عايزين نخف من مكالماتنا شوية
حبيبة : ليه ؟
الياس : الامتحانات قربت واحنا لازم نركز بقي ، ماهو مش عشان بنحب بعض نسقط
حبيبة : اوكى اللى انت شايفه اعمله
الياس : وكمان مش هنزلك القاهرة بقي غير لما نخلص امتحانات
حبيبة : زى ما تحب
الياس : كملى مذاكرتك وانا كمان هذاكر شوية
حبيبة : انا بحبك اوى
الياس : وانا كمان تصبحى على خير
حبيبة : باى
(. قفلت حبيبة مع الياس وهى مضايقه جداً واتصلت على مارى وحكتلها .)
مارى : بصى هو مش معنى كده انه مبيحبكيش
حبيبة : يا بنتى ده متغير ١٨٠ درجه
مارى : ماهو ممكن يكون من النوع اللى بيزهق بسرعه او من النوع اللى تحبيه يتقل تتقلى يحبك
حبيبة : يعني انا اعمل ايه دلوقتى ؟
مارى : مش هو قالك مش هينزلك القاهرة ولا هتتكلموا كتير صح ؟
حبيبة : صح
مارى : هو بقي متوقع انك هتزنى عليه عشان يجيلك القاهرة وطول اليوم هترنى عليه وتبعتيله رسايل
حبيبة : تمام
مارى : انتِ بقي اعملى زى ماهو عايز مش زى ما هو متوقع
حبيبة : يعني مزنش عليه
مارى : متكلمهوش اصلاً ، هو وقت ما يبقي عايز هيكلمك لكن اياكى طول اليوم تتصلى عليه
حبيبة : اطنشه يعني
مارى : لا اتقلى عليه ، حسسيه انه مش فارق معاكى ساعتها هيقول هى بطلت تحبنى ولا ايه فـ هيرجع يهتم بيكي ويحبك زى الاول
حبيبة : طيب
مارى : ان شاء الله خير متقلقيش
حبيبة : يارب ، هقوم اذاكر بقي
مارى : وانا كمان هذاكر شوية (وقفلوا)
*_____________________________________________**___________________________*
بعد كام يوم فى بيت وسيم و رواء ....
رواء : يعني مش هتروح يا وسيم ؟
وسيم : يا رواء افهمى دول طردونى وقاطعونى ومسألوش عنى اروحلهم تانى ازاى
رواء : الصغير هو اللى بيسأل عن الكبير حتى لو الكبير هو اللى غلط فيه دول ابوك وامك
وسيم : وهما مش عايزنى اروحلهم انا ليه ؟
رواء : اولاً عشان هما ابوك وامك وثانياً عشان مينفعش تعيش من غير ما يكون راضيين عنك وثالثاً عشان انت وعدتنى
وسيم : صدقيني يا رواء كل ما افكر انى اروح برجع فى كلامى مش عارف هيقابلونى ازاى ولا انا هتعامل معاهم ازاى
رواء : طيب حاول ، عشان خاطر ابننا اللى جاى فى السكه انت هتبقي اب وهتعرف يعني ايه اب يعيش وابنه مقاطعه ، عايز ابنك يعمل معاك كده
وسيم : اللى انا واثق منه انى مش هعمل فيه زى ما اهلى عملوا فيا
رواء : معلش يا حبيبي ، خليك انت المسامح وجزائك عند ربنا
وسيم : حاضر يا حبيبتى هحاول اروح بس متضغطيش عليا ممكن
رواء : حاضر بس توعدنى انك تحاول
وسيم : اوعدك انى هحاول
رواء : بس وعد بجد مش زى بتاع المستشفى
وسيم(بيحضنها) : انا بحبك اوى ربنا يخليكي ليا
رواء : وميحرمنيش منك ابداً ، انزل بقي هات صينيه الغدا من عند ماما وداد
وسيم : صنية !! وانا حاضنك يا رواء !! تصدقي قفلتيني
رواء : هههههه معلش يا روحى اصلها مستنيه من بدرى وجمال مش موجود
وسيم : ماشى يا حبيبتي هطلع اجيبها
*_____________________________________________**___________________________*
فى احدى الكافيهات ...
(. سعيد رايح يقابل الياس فى كافيه ، دخل لقي معاه واحده .)
سعيد : مساء الخير
الياس والبنت : مساء النور
سعيد : لما انت مشغول طلبت منى اجى ليه
البنت : لا خلاص انا اصلاً قايمه
الياس : هشوفك تانى
البنت : اكيد خلينا على اتصال باى (ومشيت)
سعيد : مين دى ؟
الياس : حتة كده
سعيد : وحبيبة ؟
الياس : مالها حبيبة ؟
سعيد بعصبيه : يعني ايه مالها !! انت مش مرتبط بيها وهى بتحبك
الياس : ماشي وانا يعني ماجرمتش دى مجرد صديقه
سعيد : صديقه برضه !! عليا انا يا الياس
الياس : فى ايه يا سعيد بتدافع عن حبيبة باستماته كده ليه
سعيد : عشان حرام عليك تظلم واحده كل ذنبها انها بتحبك
الياس : وانت ايه اللى حارقك فى كده انا حر
سعيد : لا مش حر ، طالما ارتبطت بيها وخلتها تحبك تبقي تخلصلها وتحبها بجد
الياس : انت ليه محسسنى ان حبيبة دى اختك او من بقيه عيلتك
سعيد : ياريتها اختى ولا من بقيه عيلتى فعلاً عشان اعرف اجيبلها حقها من واحد زيك
الياس : واحد زيي !! هى وصلت لكده
سعيد : الياس متضحكش على نفسك ولا على البنت الغلبانه لو مبتحبهاش سيبها
الياس : والله !!
سعيد : انا مروح عايز حاجة
الياس : انت شارب ايه ياد انت
سعيد : مش متنيل ، انا ماشى سلام
الياس لنفسه >> الواد ده مش طبيعي ، ماله كده !! يا ترى فى ايه (وخرج وراه)
الياس : استنى يا سعيد
سعيد : سبنى يا الياس انا عايز امشى لوحدى
الياس : طيب انا زعلتك فى ايه
سعيد : يوووووه سبنى بقي
الياس : يا جدع بطل معيله بقي
سعيد : تاكسى
(. ووقف سعيد تاكسى ومشى وساب الياس لوحده والياس مش فاهم اى حاجة .)
___**___**___
فـى التاكسى ...
سعيد بيكلم نفسه >> عيل ***** مش عارف يتقي ربنا فى بنات الناس ، طيب ما تقول لنفسك يا سعيد مانت كل شويه تسيب واحدة وتروح لغيرها ، ايوة بس بنبقي عارفين ان احنا مش هنتجوز ولا هنكمل مع بعض بس هو اوهم البنت انه بيحبها وهيتجوزها وفى الاخر يعرف عليها واحدة تانيه انا على الاقل بعرف واحدة بس وبخلصلها وانا ببقي عارف اننا مش هنكمل مع بعض لكن ده بيعرف خمسه سته والكل فاهم انه بيحبهم .. ربنا يهديني ويهديه
*_____________________________________________**___________________________*
بعد اسبوع فى الامارات فى الامارات ...
(. حسام كان بره واتأخر جداً وابوه قلق عليه وفضل مستنيه .)
عبد الله : انت كنت فين كده قلقتنى عليك
حسام : كنت فى مشوار
عبد الله : وقافل الزفت الموبايل ليه ؟
حسام : فصل شحن
عبد الله : مالك يا حسام
حسام واقف وساكت
عبد الله : مالك يا ابنى رد عليا فى ايه
حسام : ..........................
اشوفكم الحلقة الجاية
ارجو التقييم بـ كومنت
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
www.facebook.com/sh5abyt.bnoota
sh5abytalaa.blogspot.com
يووووووووه لا مش كل مره تعملى فينا الحركه دي الله يرضى عنك ويكرمك ويخليلك بنتك وتدخلى الجنه نزلى حلقه تانى
ردحذفايوه نزلي حلقه تانيه الحلقه دي قصيره اوووى
ردحذفصغيره بس جميله
ردحذف