الحلقة السادسة عشر
(. خرجت رواء وراحت تطمن على حبيبة وفرحة ، رواء اتأخرت فـ وسيم اضايق وراح يناديها .)
وسيم : رواء ، يا روءة ، بسم الله الرحمن الرحيم ايه ده !!
(. لقي وسيم رواء واقعه على الارض ودماغها فيها جرح .)
وسيم : رواء ردى عليا يا حبيبتى ، رواء يا رواء
(. هنا جت حبيبة وهى شايلة فرحة .)
حبيبة : مالها رواء
وسيم : تقريباً اتكعبلت فى حاجة ودماغها اتفتحت وتقريباً اغمى عليها
حبيبة : طيب خدها وديها مستشفى عمو عبد الوهاب بسرعه
وسيم(وهو بيشيلها) : خدى بالك من فرحه
حبيبة : عدى على جمال خليه يوصلك
وسيم (وهو خارج) : ماشى
(. خرج وسيم وهو شايل رواء وطلع شقة عبد الله وضرب الجرس فتحله جمال .)
جمال : اذيك يا وسـ ... ايه ده مالها رواء
وسيم : تعالى معايا بسرعه وديني المستشفى
جمال بقلق : ايه اللى حصل ؟
وسيم : تقريباً اتكعبلت ودماغها اتفتحت واغمى عليها
جمال : طيب يالا بينا
(. هنا جت وداد .)
وداد : مالها رواء
جمال : مفيش وقت للاسئلة دى كده دمها هيتصفى
وداد : طيب طيب روحوا وانا هاجى وراكوا فى تاكسى
(. ونزل جمال ووسيم ورواء ، جمال هو اللى ساق ووسيم قعد على الكنبه اللى ورا و رواء فى حضنه وجمال متابعهم بـ نظراته فى المرايه .)
__**__**__**__
فـى بيت وداد ....
(. وداد كانت بتلبس عشان تروح لـ رواء المستشفى ، جت عليها حبيبة وهى شايله فرحة .)
حبيبة : انتِ هتروحى لـ رواء المستشفى
وداد : اه هاخد تاكسى والحقهم
حبيبة : طيب احنا هنيجى معاكى
وداد : مين احنا دول ؟
حبيبة : انا وفرحة
وداد : لا خليكي انتِ بـ فرحة هنا وهى هتبقي كويسة
حبيبة : لا هـ نجى معاكى انا وهى جاهزين
وداد : انتِ مالك مصممه كده ؟ مينفعش البنت الصغيره دى تتمرمط معانا فى المستشفى
حبيبة : لازم انا وفرحة نروح يا ماما
وداد : ليه لازم
حبيبة : اهو لازم بقي وخلاص ، واصلاً لو مروحناش معاكى هاخدها انا واروح
وداد : طيب طيب خلاص يالا بينا
(. نزلوا وخدوا تاكسى ولحقوهم على المستشفى .)
*_____________________________________________**___________________________*
فى المستشفي ....
(. دخلت رواء الطوارئ ومعاها دكتور عبد الوهاب ، وفى انتظارها بره وسيم و وداد وجمال وحبيبة شايله فرحه .)
__**__**__
فى الطوارئ ..
(. عبد الوهاب بيحاول بـ كل طاقته يلحق رواء ، الضغط بيوطى جداً وهو بيديها صدمات كهربائية ولكن بلا جدوى ، النبض وقف ، عبد الوهاب اتصدم جداً وحضن بنت اخوه وبكى من الحزن عليها وبعد شوية قرر يستجمع قواه ويخرجلهم .)
وسيم : ايه الاخبار
عبد الوهاب : هو ايه اللى حصل ؟
وسيم : انا خرجت لقيتها واقعه على الارض ودماغها فيها جرح ، تقريباً اتكعبلت فـ اغمى عليها
عبد الوهاب : لا هى اغمى عليها الاول وبعدين وقعت
وسيم بقلق : يعني ايه ؟
عبد الوهاب : البقاء لله ، رواء ماتت
(. وداد صوتت ، وحبيبة حضنت فرحة وقعدت بيها على الارض ومنطقتش من الصدمه ، جمال واقف مذهول مش قادر ينطق .)
وسيم لـ وداد >> متصوتيش ، لـ عبد الوهاب >> مين دى اللى ماتت مين دى ؟
عبد الوهاب : ربنا يصبرك
وسيم : انا عايز اشوفها
عبد الوهاب : حاضر
(. خد عبد الوهاب وسيم ودخله عند رواء وطلب من التمريض يخرجوا بره .)
__**__**__
(. دخل وسيم لـ رواء وهو مش مستوعب ، كان خايف يكشف وشها لـ يتأكد انها رواء فعلاً ، كشف وسيم وش رواء واول ما شافها انهار من العياط .)
وسيم بدموع لـ رواء >> مش قولتي مش هتسبيني ، مش قولتي انك مش عايزه تخرجى بره حضنى سبتيني ليه بقي سبتيني لـ مين يا رواء (بانهيار) ردى عليا يا رواء متسبنيش لوحدى ردى عليا قومى يالا قومى يالا عشان نروح بيتنا (بيمسك ايدها ويبوسها) انتِ زعلانه منى قوليلي زعلانه منى فى ايه وانا اوعدك مش هزعلك تانى يا روااء ردى عليا يا ام فرحة .. يااااارب ياااااارب
__**__**__**__
(. تم الغُسل والدَفنه والعزا كان تانى يوم وعبد الله وحسام هيجوا يحضروا العزا .)
*_____________________________________________**___________________________*
فى بيت وداد ...
(. حبيبة قاعدة بـ فرحة فى اوضتها ومن كتر الصدمه مبتتكلمش ولا بتعيط ، وداد دموعها مبتوقفش وقلبها محروق على رواء .)
فـى اوضة جـمـال ...
(. دخلت وداد على جمال اللى كان قاعد على كرسي وضهره للباب وكان فى الضلمه ونورت وداد النور عليه .)
وداد : جمال
جمال (ضهره لامه) : نعم
وداد : اطلع لـ وسيم متسيبوش يقعد لوحده
جمال : بتهيألى هو فى اشد الحاجة انه يقعد لوحده
وداد : طيب قوم شوفه محتاج حاجة ولا لا
جمال : حاضر
وداد : ربنا يكون فى عونه ويصبره انا عايزة اطلع اواسيه بس مش عارفه اقوله ايه
جمال بعصبيه(بيقوم من على الكرسى) : ليه فاكرين ان وسيم بس هو اللى عايز حد يواسيه ، ليه فاكرين ان هو بس اللى مجروح
وداد : مين هيكون عايز مواساة اكتر من جوزها
جمال بارتباك : انتِ مثلاً ، انتِ مش امها واكتر حاجة تكسر الام موت حد من ولادها
وداد : انا فعلاً حاسة انى هموت من بعد رواء بس بقول كلنا مجروحين وموجوعين على رواء وفراقها بس اكيد مش زى جوزها
جمال : ايوة جوزها ، يعني عاش معاها وكمان خلف منها
وداد : انا مش فاهمه حاجة ، انت فيك ايه
(. فضل جمال واقف شوية بيبص لامه ومش عارف يقولها ايه .)
وداد(بتقرب منه) : مالك يا ابنى
(. اترمى جمال فى حضن امه وفضل يعيط .)
جمال : انا بحب رواء اوى يا ماما ، رواء ماتت وهى فكرانى واخد منها موقف متعرفش انى بعيد عنها عشان بحبها
وداد باستغراب : بتحبها !!
جمال : من وانا عندى ١٥ سنه وانا بحبها ، بحبها اوى يارتنى قولتلها انى بحبها يارتنى
وداد : اهدى يا جمال اهدى يا حبيبي
جمال : لو الواحد يعرف ان الموت كان قريب اوى كده كنت قولتلها حاجات كتير
وداد : ده القدر ولكل اجل كتاب يا ابنى وده برضه النصيب
جمال : وانا مش معترض على النصيب ولا القدر بس كان نفسي تعرف حاجات كتير جوايا قبل ما تمشي وتسيبنا
وداد : هى اكيد حاسة بينا ، ربنا يرحمها
جمال بدموع : يارب
وداد : كفاية يا جمال يا ابنى انا محتاجه اللى يواسيني
جمال (بيخرج من اوضته) : انا اسف
وداد : انت رايح فين ؟
جمال : هروح لـ وسيم
وداد بدموع >> يارب برد نار قلوبنا على فراق رواء ، يارب صبرنا
__**__**__**__
فـى اوضـة حـبيبـة ...
(. حبيبة نيمت فرحة وخدتها فى حضنها .)
حبيبة لـ فرحة >> انا مشاعرى متلخبطه اوى يا فرحة ، خايفة باباكى يتجوز ومراته تاخدك منى وانا مش هقدر ابعد عنك خالص ، حاسة ان رواء اختى وصاحبتي مش ماتت ، ماتت ازاى وانا حاضنه حته منها
(بتبص لـ صورها هى ورواء اللى متعلقه فى اركان الاوضة) >> وحشتيني يا رواء ، انتِ وفرحة الحاجة الحلوة اللى طلعت منها فى الدنيا ، كنت بفرح اوى لما تسيبيلى فرحة اغلب الوقت كنت عارفه انى صعبانه عليكي انى مش هبقي ام طول حياتى ، عارفة يا رواء انا اتمنيت كتير ان فرحة تبقي بنتى بس عمرى ما تمنيت انى اكون مكانك (بدموع) والله عمرى ما تمنيت كده ولا هتمنى ، لو ربنا اراد وفضلت معايا هربيها زى مانتِ كنتى عايزة ودايماً هعرفها انى مش امها وان امها افضل منى بـ كتير
(. فجأة افتكرت حبيبة موقف وانهارت من العياط والموقف ده مش عايز يروح من دماغها .)
FLASH BACK
قبل موت رواء بـ دقائق ...
(. خرجت رواء وراحت تطمن على حبيبة وفرحة .)
رواء : بتعملوا ايه من غيري يا وحشين
حبيبة : كنا بنلعب بس هى دلوقتى بتنام، وبعدين وحشين ليه مانتِ مش عايزة تجى تلعبى معانا
رواء : فرحة بتحبك اوى يا حبيبة
حبيبة : وانا بموت فيها ، انتٍ مضايقه من علاقتى بيها
رواء : انتِ هبله ولا ايه ؟ ده انا مبطمنش عليها غير لما تبقي معاكى
حبيبة : يعني لو اتعلقت بيا هتضايقي
رواء : اطلاقاً يا حبيبة ، انا واثقه انك هتبقي ام كويسة جداً لـ فرحة
حبيبة : ايه الكلام ده ، ربنا ما يحرمك منها
رواء : ربنا ما يحرمها هى منك
حبيبة : ولا منك
رواء : عايزة منى حاجة اعملهالك
حبيبة : لا يا روءة انا هنيمها وانام
رواء(وهى خارجه) : خدى بالك على فرحة يا حبيبه
حبيبة : حاضر
رواء (واقفه على الباب) : خدى بالك عليها اوى
حبيبة : فى ايه يا رواء
(. رواء بترجع تانى وتاخد فرحة من حضن حبيبها وتحضنها بقوة ودموع .)
حبيبة : ايه ده يا رواء مالك يا حبيبتى
رواء : مش عارفه ، حاسة انى قلقانه على فرحة
حبيبة : وهى معايا
رواء : لا والله قلقانه عليها عموماً ، قلقانه على مستقبلها
حبيبة : متقلقيش واتوكلى على الله
رواء : ونعمَ بالله ، خدى بالك انتِ بس منها
حبيبة : حاضر بس انتٍ كويسة ؟
رواء : دايخه شوية ، تقريباً ضغطى واطى
حبيبة : اجى اسندك
رواء : لا لا خليكي مع فرحة (وخرجت)
__**__**__**__
حبيبة بدموع >> يارتني سندتها ، يارتني خرجت معاها كنا زمانها لحقنااها ، كان زمانها مماتتش .. استغفر الله العظيم
يارب ارحمها وصبرنى على فراقها
*_____________________________________________**___________________________*
فى المدافن ...
(. خرج جمال من البيت ونزل على المدافن وراح لـ مدفن رواء وقعد قدامه .)
جمال بدموع >> انا كنت بعيد عنك عشان بحبك اوى ، مكنتش عايزك تشوفى الحب فى عيني ، كنت خايف ابوظلك حياتى
انا بحبك اوى يا رواء ، يارتنى قولتلك كل حاجة ، انا بموت يا رواء ، انا مُت مرتين ، مرة يوم فرحك والنهاردة المرة التانيه ، بس عارفة والله والله كنت ببقي فرحان لما الاقيكي مبسوطه ، انا فرحت بـ فرحة يمكن اكتر منك انتِ ووسيم على الاقل بقدر اخدها فى حضنى واقولها انا بحبك لكن عمرى ما كنت اقدر اعمل معاكى كده ، عمرى حتى ما كنت اقدر اقولك انى بحبك
(. حس جمال بـ صوت خطوات جايه عليه ، فـ اختفى لانه حس انه وسيم ، قعد وسيم قدام القبر وبدأ يكلمها وجمال سامع كل كلمه .)
وسيم >> كنت متعود لما انام بعيد فى حضنك ابقي فى الشغل ، مش متعود ادخل بيتنا وانتِ مش موجوده فيه ولا متعود انام فى السرير لوحدى ، رواء قوليلي انا هعيش من غيرك ازاى !! قوليلي هعمل ايه فى الدنيا لـوحدى !! هعمل ايه بـ فرحة لوحدى ، انا بعت الدنيا كلها واختارتك يا رواء بس الدنيا استكرتك عليا ، رواء انا بحبك وهعيش على امل اليوم اللى هقابلك فيه فى الاخرة
(. هنا جه جمال .)
وسيم : جمال !! انت بتعمل ايه هنا
جمال : روحتلك البيت مالقتكش فـ قولت انت اكيد هنا
وسيم : تعالى اقعد جنبى ، تعالى اقرأ الفاتحة لـ رواء
(. قعد جمال وفضل كل واحد يكلم رواء فى سره لحد ما الفجر أذن عليهم وقاموا صلوا جماعه .)
*_____________________________________________**___________________________*
تانى يوم فى بيت وداد ...
(. حبيبة قاعدة بـ فرحة فى اوضتها بعيد عن دوشة العزا والستات ، الباب خبط عليها ، فتحت حبيبة لقيته وسيم .)
حبيبة : تعالى يا وسيم اتفضل
وسيم : فرحة عامله ايه
حبيبة : فرحة متغيره خالص ، عياط اغلب الوقت ومفيش نوم خالص زى ما يكون قلبها حاسس
وسيم : ربنا يكون فى عونا وعونها
حبيبة : يارب
وسيم : خدى بالك منها يا حبيبه
حبيبة : متخافش يا وسيم دى بنتى
وسيم : لا مش بنتك ، دى بنت رواء
حبيبة : قصدى زى بنتى
وسيم : لازم تفضل عارفة انها بنت رواء مش بنت حد تانى
حبيبة : وانا طول اليوم بكلمها على رواء متقلقش
وسيم : معلش احنا تقلنا عليكي
حبيبة : متقولش كده رواء دى اختى
وسيم : هى دى الاوضة اللى رواء كانت فيها قبل ما تتجوز
حبيبة : اه دى اوضتنا انا وهى
وسيم : اول مرة اشوفها
(. هنا صحيت فرحة .)
حبيبة : اهى فرحة صحيت اهيه ، خدها بقي فى حضنك وخليها معاك شوية
وسيم : ماشى
حبيبة : ربنا يخليكوا لبعض
وسيم : ممكن تعمليلي كوبايه شاى
حبيبة : حاضر
(. وخرجت حبيبة من الاوضة وفضلت فرحة فى حضن ابوها وكانت مُستكينه تماماً ، بعد شوية دخل جمال .)
جمال : وسيم انت هنا
وسيم ؛ اه فى حاجة ولا ايه
جمال : هاه !! لا بس كنت بابا باعتنى ااطمن على حبيبة وفرحة
وسيم : حبيبة بتعملى شاى وفرحة كويسة
جمال : ممكن اشوفها
وسيم : اتفضل (وادهاله)
جمال(بيحضنها) وبيتكلم فى سره >> اااه يا غالية يا بنت الغاليه ، وحشتيني اوى يا رواء
وسيم لنفسه >> ايه حكايه يا جمال ، كل ما اروح مكان يخص رواء الاقيك فيه
(. قطعت حبيبة قعدتهم بدخولها ، جمال نزل العزا ووسيم فضل عشان يشرب الشاى .)
حبيبة : ممكن اسألك سؤال ؟
وسيم : اكيد
حبيبة : انت هتعمل ايه ؟
وسيم : هعمل ايه فى ايه !!
حبيبة : فى تربيه فرحة
وسيم : ااهاا ، هسيبها معاكى ومع طنط وداد لحد ما تكبر شوية وكده كده طول ماانا فى شغلى هى هتبقي معاكوا
حبيبة : تمام
وسيم : ان شاء الله لما تكبر ، يعني لما يبقي عندها اربع سنين هشوف شغل هنا واقعد بيها بقي عشان المدرسه وكده
حبيبة : ربنا يخليك ليها
(. حبيبة كانت مبسوطه اوى من جواها عشان فرحه مش هتبعد عنها على الاقل الفترة دى .)
*_____________________________________________**___________________________*
فى بيت وسيم ....
(. بعد العزا وسيم كان قاعد لـ نفسه بيكلم صورة رواء وفجأة الجرس ضرب ، فتح لقاهم ابوه وامه .)
تحسين(ابوه) : البقاء لله يا ابنى
وسيم : ونعمَ بالله ، اتفضلوا
شاديه (امه) : احنا لما عرفنا الخبر مصدقناش
وسيم : وجيتوا ليه
شاديه : عشان نعزيك ونقف جنبك
وسيم : وموقفتوش جنبى وانا بتجوزها ليه ، محضرتوش فرحها وجايين تحضروا عزاها
تحسين : احنا كنا على امل انك هتجى تصالحنا وتراضينا خصوصاً بعد ما خلفت
وسيم بعصبيه : وانا كنت عملت ايه غلط فى حقكم غير انى اتجوزت البنت اللى بحبها
شاديه : اللى حصل حصل احنا ولاد النهاردة ، فين بنتك ؟
وسيم : عند اهل امها
تحسين : احنا عايزين نشوفها
وسيم : لا
شاديه باستغراب : لا !!
وسيم : ايوة لا ، مالكوش دعوة بـ بنتى ولا بـ حياتى ممكن
تحسين : احترم نفسك ، انت بتكلم ابوك وامك
وسيم : ابويا وامى بامارة ايه !!
تحسين : بامارة اننا جايين نقف جنبك فى المصيبه دى
شاديه : يا ابنى بنتك لسه حتة لحمه حمرة ، محتاجه ست تربيها واكيد محدش هيربيها غيري
وسيم : انا اسف جداً ، بنتى محدش هيربيها غيري
شاديه : ايوة بس فى الاول محتاجه ست
تحسين : واحنا نربيها ليه وابوها موجود ، هو فعلاً لازم يربيها بس انت لازم تتجوز
وسيم : اتجوز !! انا لسه دافن مراتى امبارح حرام عليكوا
شاديه : ابوك مش قصده تتجوز بكرة شوية كده وتتجوز عشان بنتك دى
وسيم : بس بقي كفايه عليكوا ظلم فيا ، ارحمونى
تحسين : واضح انك لسه سافل ولسانك طويل يالا يا شاديه
شاديه : استنى بس يا تحسين
تحسين : يالا وهو لما يبقي كويس هيجي لنا
(. ومشيوا من عنده وراح وسيم لـ صورة رواء .)
وسيم لـ رواء >> شوفتى يا رواء اللى كنتى بتتخانقى معايا عشان اصالحهم عايزنى اتجوز عليكي ، انا عمرى ما هتجوز عليكي بس بعد ما اهدى هروح اصالحهم بس عشان خاطرك .. بحبك اوى يا حبيبتي
*_____________________________________________**___________________________*
فى خـلال سـنـة ....
- حبيبة حالتها النفسية اتحسنت عشان وسيم مخدش منها فرحة
- علاقة الياس وحبيبة كويسة ومستقرة جداً ، والياس اتأكد من حبه لـ حبيبة وانه مستعد يكمل معاها
- حبيبة رجعت الكليه وعملت عذر طبي وقدرت تكمل السنه ، كانت بتسيب فرحه مع امها لحد ما تروح الكورسس والكليه
- حبيبة نجحت بس مش بـ تقدير كويس ولا ترتيب زى كل سنه
- الياس بيشتغل مع واحد صاحب ابوه فى المنصورة وكل فترة بينزل القاهرة لـ حبيبة يشوفها
- حسام بطل يدور على ازابيلا بعد ما نكرته ونسى الموضوع تماماً
- وسيم لسه ماخرجش من حالة الاكتئاب والحزن المسيطره عليه وشايف رواء حواليه فى كل مكان
- جمال بعد صدمة وفاة رواء ، اسلوب حياته اتغير وقرب من ربنا اكتر واهتم بدراسته وساب البنات والحشيش
*_____________________________________________**___________________________*
فى الامارات ...
(. حسام قاعد فى مطعم بياكل ، دخلت ازابيلا اللى كان قابلها وفاكرها امه ، لقاها راحت قعدت مع ناس واتغديت معاهم وبعد ما خلصوا مشيوا كلهم ماعدا واحد ، حسام راح له وبدأ يتكلم معاه .)
حسام : مساء الخير
الشخص : مساء النور
حسام : لو سمحت كنت عايز اسأل حضرتك عن دكتورة اسنان كانت موجوده مع حضرتك بس مشيت
الشخص : شو بيها
حسام : اصل انا كنت عملت اسنانى عندها بس مش فاكر اسمها
الشخص : هى اسما دكتور وردة
حسام : وردة !!
الشخص : ايه ورده
حسام : شكراً جداً
(. اتصل حسام بـ ابوه من رقم غريب وقاله انه موظف فى المركز الطبي للاسنان وقاله ان دكتور على عايز يقابله ضرورى فى المركز بخصوص ابنه حسام ، وعلى الفور اتحرك عبد الله لـ المركز .)
__**__**__**__**__
فـى مكتب دكتور على ...
عبد الله : خير يا على
على : خير انت
عبد الله : انت مش كلمتنى وقولتلى انك عايزنى بخصوص حسام
على : لا مكلمتكش
عبد الله : انا قصدى خليت حد من موظفينك يكلمنى
على : محصلش ومفيش حاجة اصلاً بخصوص حسام
(. هنا دخل حسام .)
حسام : انا اللى اتصلت بـ حضرتك يا بابا عشان اكشف اللعبه اللى انتوا لعبتوها عليا
عبد الله : لعبه !!
حسام : اه لعبه ، اللعبه اللى حضرتك ودكتور على ودكتوره ورده مشتركين فيها
على : امممممم ابوك كان لازم يعمل كده
حسام بعصبيه : يعمل كده ليه !! ايه اللى انت مش عايزنى اعرفه ، ايه السر اللى خايف انى اكشفه
عبد الله : وطى صوتك
حسام : بتهيألى يا بابا آن الاوان بقي اعرف
عبد الله : وطالما انت عايز تعرف ، انا هعرفك كل حاجة بس ياريت متقولش يارتنى ماعرفت ولا تندم
حسام : مش هندم
عبد الله : نتكلم فى البيت
حسام : ماشى ، اللى يصبرنى سنتين بحالهم يصبرنى الساعتين دول
عبد الله : يالا بينا ، مع السلامه يا على
على : سلام
(. وخرجوا من المركز ، كل واحد ركب عربيته وكانوا ورا بعض فى طريقهم لـ البيت .)
*_____________________________________________**___________________________*
فى بيت وداد ...
(. وسيم كان جاى اجازة ، اول حاجة بيعملها بيعدي على فرحة يشوفها وتقريباً من بعد وفاة رواء وهو بيقضى اليوم كله فى بيت عبد الله وبيطلع شقته هو رواء على النوم وساعات بياخد فرحة تنام معاه فى حضنه فى شقته ولما تصحى ينزلها لـ حبيبة ، وسيم قاعد وحاضن فرحة و وداد وجمال وحبيبة قاعدين معاه .)
وسيم : انا كنت عايز اتكلم معاكوا فى موضوع مهم
وداد : خير ؟
وسيم : هى حاجة بخصوص فرحة واتمنى تساعدونى فيها
حبيبة : طالما بخصوص فرحه انا هـ اساعدك جداً
جمال : خير يا معلم اتكلم
وسيم : .............................
اشوفكم الحلقة الجاية
ارجو التقييم بـ كومنت
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على رسايل صفحة الفيس بوك .)
www.facebook.com/sh5abyt.bnoota
sh5abytalaa.blogspot.com
القصة حلوة و انا متابعاكى بقالى فترة
ردحذفبس عندى تعليق انهاردة المشهد بتاع موت رواء متاداش صح مش عارفة كان عادى اوى حساه مفهوش مشاعر اوى
انا كنت بدات اظن ان حبيبة هى الى ضربتها عشان جالها حالة نفسية